दिब्य दरस 4 - गढवली नयो नियम

स्वर्ग कु नजारा

¹ जब यु सब बात हवे गैनी, त मि यूहन्ना ल देखि कि स्वर्ग मा एक द्वार खुल्यूं च; फिर मिल उ ही पैली आवाज दुबरा सूंणि जु कि एक तुरै की आवाज जन छै। वेल मि बट्टी बोलि, मि मा इख मथि औ, अर मि उ बात त्वे तैं दिखौलु, जौं बातों तैं यूं बातों का बाद पूरो हूंण जरूरी च।

² मि मसीहियों कु आराधना का दिन पिता परमेश्वर की आत्मा ल मेरी अगुवाई कैरी; अर मिल स्वर्ग मा एक सिंहासन अर सिंहासन पर कै तैं बैठयूं देखि।

³ उ जु सिंहासन पर बैठयूं छो, उ भौत कीमती ढुंगों का जन दिखै दींदो छो, जौं तैं यशब अर माणिक्य ढुंगा बुल्दींनि। वे सिंहासन का चौ तरपां एक मेघधनुष छो, अर दिखण मा पन्ना ढुंगा का जन छा।

⁴ चौबीस सिंहासन वे तैं घेरी के छा; अर यूं सिंहासनों पर चौबीस दाना-सयाणा सफेद कपड़ा पैरी के बैठयां छा, अर ऊंका मुंड पर सोना का मुकुट छा।

स्वर्ग मा आराधना

⁵ वे सिंहासन मा बट्टी बिजलियां अर गिडगिडांण की आवाज निकलदी अर सिंहासन का संमणी आग का सात दिवडा जलणा छा, जु पिता परमेश्वर की सात आत्माएँ छिनी,

⁶ यांका अलावा, सिंहासन का संमणी कुछ छो जु कि बर्फ का जन स्पष्ट कांच से बणयां समुन्द्र जन दिखदो छो, अर उ बड़ो सिंहासन ऊं सब का बिल्कुल बीच मा छा, अर ऊंका चौ तरपां मिल चार ज्यून्दा प्राणियों तैं देखि जौका देह पूरा ढंग से आँखों बट्टी ढ़कयां छिनी।

⁷ यूं ज्यून्दा प्राणियों मा बट्टी पैलो प्राणी सिंह का जन दिख्योंदु छो, अर दूसरो ज्यूँदो प्राणी बछड़ा का जन छो, तिसरा ज्यून्दा प्राणी को मुक मनिख का जन छो, अर चौथो ज्यून्दो प्राणी उड़दा गरुड़ का समान छो।

⁸ अर चरी ज्यून्दा प्राणियों का छः-छः फांकुड छा, ऊं पर सभि जगह आँखा छा, इख तक कि ऊंका फंकुड़ों का मूड़ी भि; अर उ रात-दिन बगैर आराम करयां बुल्णा रौंदा छा, “पवित्र, पवित्र, पवित्र प्रभु परमेश्वर, सर्वशक्तिमान, उ व ही पिता परमेश्वर च जु बगत की शुरुआत बट्टी लेकर अब तक अर कभी नि बदलद जु आंण वलो च।”

^9-10 जु सिंहासन पर बैठयूं छो, उ उन ही च जु हमेशा-हमेशा कु ज्यून्दो च। जब उ ज्यून्दो प्राणी वे तैं महिमा अर आदर अर धन्यवाद दींद। त उ चौबीस दाना-सयाणा सिंहासन पर बैठयां छिनी, वेका संमणी गिरी जंदींनि अर वेकी आराधना करदींनि। उ यु बोलि के अपड़ा-अपड़ा मुकुट सिंहासन का संमणी डाली दींदिनि,

¹¹ हे हमारा प्रभु परमेश्वर, तिल सभि चीजों की रचना कैरी, तेरी ही इच्छा का अनुसार, उ बणये गैनी अर उ मौजूद छिनी, इलै ही तू महिमा अर आदर अर सामर्थ पांणा का योग्य छै।