दिब्य दरस 19 - गढवली नयो नियमस्वर्ग मा पिता परमेश्वर की स्तुति 1 जब तागतबर स्वर्गदूत ल बुल्ण खत्म कैरी त मिल सूंणि उ इन छो जन स्वर्ग मा भौत सैरा लोग बुल्णा हो; हल्लिलूय्याह! उद्धार अर महिमा अर सामर्थ हमारा परमेश्वर ही की च। 2 वेकी स्तुति कैरा किलैकि पिता परमेश्वर सा सभि फैसला सच्चा छिनी। वेल बदनाम वेश्या को न्याय कैरी किलैकि वेल दुनिया का लुखुं तैं पाप कनु कु उकसै। पिता परमेश्वर ल वेश्या को न्याय कैरी के बदला लये किलैकि वेका दास वीं का द्वारा ल्वे बुगांण का कारण मरै गै छा।” 3 फिर दुसरी बार ऊंल बोलि, पिता परमेश्वर की स्तुति हो, बाबेल तैं नाश कन वली आग बट्टी निकलण वला धुवां कभी भि बंद नि होलो। 4 अर चौबीसों दाना-सयाणों ल अर चरी ज्यून्दा प्राणियों ल गिरी के पिता परमेश्वर तैं दण्डवत् कैरी; जु सिंहासन पर बैठया छा, अर बोलि, “आमीन! पिता परमेश्वर की आराधना हो!” 5 अर फिर मिल कै तैं बुल्द सूंणि, अर इन लगि जन य आवाज पिता परमेश्वर का सिंहासन बट्टी ऐ हो। वेल बोलि, “हे हमारा पिता परमेश्वर का सेवकों तुम जु वेका नौं को सम्मान करदा, चाहे बड़ा हो या छुटा हो। परमेश्वर की स्तुति कैरा!” 6 फिर मिल जु सूंणि व भौत बड़ी संख्या लुखुं का चिल्लांण का जन लगद छै। यु एक बड़ा झरना की आवाज का जन जोरदार छो अर बादल का गिगडांण का जन छो। ऊंल बोलि, “परमेश्वर की स्तुति हो! सर्वशक्तिमान पिता परमेश्वर हमारो राजा च।” 7 आवा, हम आनन्दित अर मगन हो, अर वेकी स्तुति कैरा, किलैकि जु चिनखो च वेको ब्यो हूंण वलो च। ब्योली श्रंगार कैरी के अफ तैं सजै के वेको तैयार कैरेले। 8 चिनखा ल वे तैं साफ चमकदार मलमल का द्वारा बणयां कपड़ा पैरणु कु दींनि, जु शुद्ध च, जु विश्वास कन वलो कु अच्छा कामों को चिन्ह च। किलैकि वे चमकदार मलमल को मतलब, पिता परमेश्वर का लुखुं का धार्मिक काम छिनी। 9 स्वर्गदूत ल मि बट्टी बोलि, “यु लिख, कि धन्य छिनी उ, जु चिनखा का ब्यो का जश्न मनांणु कु दावत मा बुलै गैनी।” फिर वेल मि बट्टी बोलि, “यु सच्चा वचन च जु पिता परमेश्वर की तरपां बट्टी आंद।” 10 जब मिल सूंणि जु मि बट्टी बात कनु छो, त मि वेकी आराधना कनु कु, वे आदिम का संमणी झुकि ग्यों। वेल मि कु बोलि, “मि तैं प्रणाम नि कैर।” मि भस पिता परमेश्वर को एक सेवक छो जन तू छै अर तेरा विश्वासी भयों का जन जु यीशु का द्वारा प्रकट किये गै सच्ची शिक्षाओं पर विश्वास करदींनि अर मणदींनि। भस पिता परमेश्वर ही च जै की त्वे तैं महिमा कन चयणी च। किलैकि परमेश्वर आत्मा च जु पिता परमेश्वर का लुखुं तैं यीशु का द्वारा बतये गै अर सत्य कु प्रचार कना का योग्य बणद। सफेद घोड़ा पर सवार 11 फिर मिल स्वर्ग तैं खुल्यूं देखि, अर दिखदु कि एक सफेद घोड़ा च; अर वे पर एक सवार च, उ जै पर तुम भरोसा कैर सकदा, उ जु झूठ नि बुल्द; उ वेका अनुसार जु पिता परमेश्वर की नजर मा सै च, परमेश्वर धार्मिकता का दगड़ी न्याय करद अर दुश्मनों का विरुद्ध लड़ै करद। 12 वेका आँखा आग की लपटों का जन चमकदार छै, अर उ भौत सैरा मुकुट पैरयूं छो। अर वेको एक और नौं वे पर लिख्युं छो, पर भस उ ही वे नौं को मतलब जंणदु छो। 13 उ ल्वे मा डुबयां चोला पैरयूं छो, अर वेको नौं “पिता परमेश्वर कु वचन” च। 14 स्वर्ग का भौत सैरा सैनिक, वेका पिछनै-पिछनै छा। उ भि सफेद घोड़ों पर सवार छा अर उ सफेद मलमल को कपड़ा पैरयां छा जै मा बिल्कुल भि दाग नि च। 15 सवार का गिचा बट्टी एक तेज तलवार निकलदी जैको इस्तेमाल ऊं जातियों तैं हरांणु कु करलो, अर उ लोखर का जांठा दगड़ी ऊं पर राज्य करलो। यूं तैं सर्वशक्तिमान परमेश्वर का भयानक गुस्सा की दाखमधु का कुण्ड मा अंगूरों तैं निचोड़ण जन होलो। 16 अर वेको चोला अर दे जांघ पर यु नौं लिख्युं छो “प्रभु अर राजाओं को राजा च।” जानवर अर वेकी सेना कु हरण 17 फिर मिल एक स्वर्गदूत तैं सूरज पर खड़ो देखि। अर वेल आसमान का बीच मा बट्टी उड़ाण वला सभि मांस खांण वला सभि चलखुडों तैं बड़ा शब्दों ल पुकारी के बोलि, “आवा पिता परमेश्वर की वीं बड़ी दावत कु कठ्ठा हवे जावा जु पिता परमेश्वर ल तुम कु तैयार कैरी, 18 आवा अर राजाओं, सिपै का झुंडों, अगुवों, ताकतवर सैनिकों, घोड़ों अर वेका सवारों कु मांस खा। तुम हर किस्म का मुरयां लुखुं को मांस खा सकदा मतलब, दास अर स्वतंत्र, बड़ा अर छुटा सभि कु मांस खावा।” 19 फिर मिल वे जानवर तैं देखि जु समुद्र बट्टी भैर ऐ छो, अर धरती का राजाओं अर ऊंका सेनाओं तैं देखि। उ घोड़ा पर बैठण वला अर वेकी सेना का विरुद्ध लड़ै कु एक दगड़ी ऐनी। 20 अर उ दुसरो जानवर अर वेका दगड़ी उ झूठो संदेश दींण वलो जु अफ तैं पिता परमेश्वर का तरपां बट्टी बुल्ण वलो बुल्द पकड़ै गै, वेल जानवर का तरपां बट्टी झूठा चमत्कार दिखै अर ऊं सभि लुखुं तैं भरमै, जौनु जानवर की छाप अपड़ा कपाल पर लगै छै अर जु वेकी मूर्ति की आराधना करदा छा, यु द्वी ज्यूंदा ही वीं आग की झील मा, जु गन्धक ल जल्दींनि डलै गैनी। 21 येका बाद, वेल जु घोड़ा पर बैठयूं छो अपड़ा गिचा बट्टी निकलण वली तलवार कु इस्तेमाल कैरी के दुसरा सभियूं तैं मार दींनि। तब आसमान का सभि चलखुडों ल तब तक शवों कु मांस खांदी रैनी जब तक कि ऊंको पुटगो पूरो नि भुरे गै। |
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.