मरकुस 13 - गढवली नयो नियममन्दिर का विनाश की भविष्यवाणी ( मत्ती 24:1-2 ; लूका 21:5-6 ) 1 जब यीशु यरूशलेम शहर का मन्दिर बट्टी भैर निकलणु छो त वेका चेलों मा बट्टी एक चेला ल वेमा बोलि, “गुरु जी देखा कन बड़ा ढुंगा से बंणि सुन्दर अर कथग बड़ी इमारत छिनी” 2 यीशु ल वेकु बोलि, “तुम जु यूं बड़ा-बड़ा ढुंगो की बड़ी-बड़ी इमारत तैं दिखणा छा इख ढुंगा मा ढुंगा भि नि रांण जु ढुलै नि जालो।” संकट अर क्लेस ( मत्ती 24:3-14 ; लूका 21:7-19 ) 3 जब यीशु वे जैतून डाला का डांडा बट्टी परमेश्वर बट्टी प्रार्थना कैरी के यरूशलेम शहर का मन्दिर का संमणी बैठयूं छो, अर जब यीशु, पतरस अर याकूब का दगड़ी मा कुई नि छो, तब यूहन्ना अर अन्द्रियास ऐनी अर ऊंल अलग मा जै कै वेमा पूछि, 4 “हम तैं बतौ कि यूं बातों ल कब हूंण? अर जब यु बात पूरी हूंण वली हवेलि वेको क्य चिन्ह होलो” 5 यीशु ल ऊंमा बोलि, “चौकस रावा कि कुई तुम तैं नि भरमै द्यो।” 6 भौत लोग मेरा नौं का अधिकार कैरी के आला अर ऐ के बुलला, मि मसीह छो अर भौत लुखुं तैं विश्वास बट्टी धोखा दींदिनि। 7 जब तुम लड़ै अर लड़ैयूं कि चर्चा सुणल्या त नि घबरैयां किलैकि यूंकु हूंण जरूरी च पर वे बगत तुरंत दुनिया कु अंत नि होलो। 8 किलैकि एक जाति दुसरी जाति अर राज्य पर राज्य एक दुसरा पर हमला करला हर कखि भ्यूंचोळ होला अर अकाल पुड़ला यु त शुरुवात पिड़ा होलि जन बच्चा पैदा हूंण से पैली हूंदी। 9 पर तुम अपड़ा बारा मा चौकस रयां किलैकि लोग तुम तैं पकड़ी के यहूदियों का मिलणा का भवन मा सौंपला अर तुम महासभा मा पिटे जैला किलैकि तुम मेरा चेला छा मेरा खातिर राज्यपालों का अर राजाओं का संमणी तुम्हरी अजमैश करे जाली कि ऊंकु गव्है हो। 10 मेरा बारा मा शुभ सन्देश दुनिया का खत्म हूंण से पैली जरूरी च कि सभि देशों का जातियों तैं पैली प्रचार करे जौं। 11 जब उ तुम तैं पकड़ी के ली जाला अर तुम तैं आधिकारियों मा सौंपला त तुम फिकर नि करयां कि हम ल क्य बुल्ण पर सै बगत पर तुम तैं जु कुछ तुम तैं वीं बगत पर बुल्ण तुम तैं बतै द्ये जालो उन ही बुल्यां किलैकि बुल्ण वला तुम नि हवीला बल्कि पवित्र आत्मा होलो। 12 भैय तैं भैय अर बुबा तैं नौंना मराणु कु सौंपला अर बच्चा अपड़ा ब्वे-बुबा की आज्ञाओं का खिलाफ हवे कै ऊं तैं मरवे द्याला। 13 अर मेरा चेला हूंणा का खातिर सभि लुखुं ल तुम बट्टी दुश्मनी कन पर जु आखिर तक जु धीरज रखि के मि पर विश्वास रखलो वे तैं ही परमेश्वर उद्धार दयालो। महासंकट अर काल ( मत्ती 24:15-21 ; लूका 21:20-24 ) 14 एक दिन जब तुम वे तुच्छ मनिख तैं दिखल्या, जैका कारण प्रर्थान भवन तैं छोड़े जालो, उ उख खड़ो होलो जख वे तैं खड़ो हूंणो कु कुई अधिकार नि च, पढन वलो समझी ल्यो तब जु यहूदिया प्रान्त मा हूंनु उ डांडों मा भाजि जा। 15 जु छत पर हूंनु उ अपड़ा घौर बट्टी कुछ समान लींणु कु मूड़ी घौर का भितर नि उतरुनु अर उख बट्टी भागि जा। 16 अर जु पुंगड़ा मा हो उ अपड़ा कपड़ा लींणु कु घौर कु पिछनै नि लौटु। 17 यु ऊं महिलाओं कु भौत भयानक बगत होलो जु दुबस्ता हवेलि अर जु दूध पिलांदि हवेलि ऊंकु भगण भौत मुश्किल होलो। 18 ऊं दिनों मा लोग भौत बुरा ढंग से पीड़ित होला, लुखुं ल कभि इन दुःख नि देखि होलो पिता परमेश्वर का दुनिया बनांण से अब तक लुखुं पर इन पिड़ा कभि नि हवे होलि इलै पिता परमेश्वर बट्टी प्रार्थना करयां कि यु जाड़ों मा नि हो जब कखि भि जांण कठिन हो। 19 किलैकि उ दिन इन कलेश का होला कि ई धरती का बनांण बट्टी जु कुछ परमेश्वर ल रचि ल त अभि तक न हवे नि अगनैं हूंण। 20 जु परमेश्वर ल ऊं मुसिबतों का बगत तैं भौत जल्दी से खत्म कनु को फैसला नि ल्या हूंद त नथरी सब मुरण वला छा, प्रभु ऊं दिनों तैं घटालो त कै भि प्राणि को उद्धार नि हूंण छो पर ऊं चुणयां मनिख्युं का खातिर जौं तैं वेल चुणि ऊं दिनों तैं घटैये गै। 21 वे बगत मा जु कुई तुम कु बुललो “देखा मसीह इख च” या देखा उख च त यकीन नि करयां। 22 किलैकि झूठा मसीही अर झूठा भविष्य बतांण वला आला अर सामर्थ का चिन्ह अर शैतान का झूठा चमत्कार दिखाला कि हवे साको त परमेश्वर का चुणयां लुखुं तैं भि भरमै द्याला। 23 पर तुम चौकस रयां मिल सभि घटनाओं तैं तुम तैं पैली बट्टी बतयले। मनिख का नौंनो कु जी उठण ( मत्ती 24:29-31 ; लूका 21:25-28 ) 24 ऊं दिनों मा वे कलेश खत्म हूंणा का बाद सूरज अर जून अपड़ो उज्यला दींण बंद कैरी दयाला। 25 अर आसमान बट्टी गैणा मूड़ि पोड़न लगि जाला अर आसमान कि सैरी शक्ति अर चिन्ह हिलैये जाला। 26 तब मि मनिख कु नौंनो बदलो मा दिख्योलू अर बड़ी सामर्थ अर महिमा का दगड़ा आंण दिखयोलू। 27 वे बगत उ अपड़ा स्वर्गदूत तैं भेजि के धरती का यु छोर बट्टी आसमान का वे छोर तक चौदिशों बट्टी अपड़ा चुणयां लुखुं तैं कठ्ठा करलो। अंजीर का डाला की मिसाल ( मत्ती 24:32-35 ; लूका 21:29-33 ) 28 बेडु का डाला बट्टी सीखा जब वेकी फौंकि कुंगळी हवे जंदींनि अर पता निकलण लगि जंदींनि त तुम जांणि जणदां कि गर्मी कु मौसम आंण वलो च। 29 इन ही कै जब तुम यूं बातों तैं हूंण दिखल्या त जांणि लियां कि मि मनिख कु नौंनों कु आंण नजीक च ऐ ही गै। 30 मि तुम मा सच बुल्णु छौं जब तक यु सभि बात नि हवेलि तब तक यूं लुखुं मा बट्टी तब तक भौत स इन छिनी जु ईं घटना का हूंण तक नि मुरला। 31 आसमान अर धरती टळि जालि पर मेरी बुलीं बातों ल कभि भि नि टळण। बिज्यां रावा ( मत्ती 24:36-44 ) 32 अर कै तैं भि वे दिन अर सै बगत कु नि पता जब मि दुबारा औलु न स्वर्गदूत अर न मि जु नौंनो छो भस परमेश्वर पिता वे बगत तैं जंणदु। 33 देखा बिज्यां रावा अर पिता परमेश्वर बट्टी प्रार्थना करदी रावा किलैकि तुम नि जंणदयां कि उ बगत कब आलो जब मि वापिस औलु। 34 मि तुम तैं एक मिसाल सुणांदु जु अब मेरा जांणा का बाद मेरा वापिस आंणु कु एक उदाहरण च या वे मनिख कि तरौं दशा च जु परदेश जांदी बगत अपड़ो घौर छोड़ी कै जौं अर अपड़ा नौकरों तैं हक दे द्यो अर हरेक तैं वेका काम बतै द्यो अर फटक का चौकिदार तैं सजग राणो कु आज्ञा द्यो। 35 यीशु अपड़ा चेलों मा बोलि, इलै सजग रावा तुम नि जंणदयां कि घौर का स्वामि ल कब वापिस आंण रुमुक बगत या अधा राती मा या सूरज निकलण से भौत पैली। 36 देखा इन नि हो कि उ अचानक ऐ जौं अर तुम तैं सियूं देखु। 37 अर जु मि तुम कु बुल्णु छौं उ ही सभियूं कु बुल्णु छौं चौकस रा। |
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.