मत्ती 14 - गढवली नयो नियम

यूहन्ना बपतिस्मा दींणवला की हत्या

¹ ईं घटना का बाद जब राजा हेरोदेस चौथाई देश कु राजा छो वेला यीशु कि चर्चा सूंणि

² अर वेल अपड़ा सेवकों कु बोलि, कि “यूहन्ना बपतिस्मा दींण वलो मुरयां लुखुं मा बट्टी ज्यूँदो हवे गै इलै वे बट्टी यु सामर्थ का काम का चमत्कार प्रगट हूंदींनि।”

यूहन्ना की हत्या

³ किलैकि हेरोदेस ल अपड़ा भैय फिलिप्पुस की जनन हेरोदियास का बानौं से यूहन्ना तैं पकड़ी के बंधि अर जेल मा डालवै छो।

⁴ किलैकि यूहन्ना बपतिस्मा दींणवला ल हेरोदेस कु बोलि छो कि, “अपड़ा भैय कि जनन तैं रखण त्वे कु ठिक नि च।”

⁵ इलै हेरोदेस यूहन्ना तैं मरण चांदु छो पर लुखुं से डरदु छो किलैकि उ वे तैं परमेश्वर का तरपां बट्टी बुल्ण वलो मंणदु छो।

⁶ पर जब राजा हेरोदेस अपड़ा जन्मदिन ऐ त हेरोदियास की नौंनि भितर ऐ अर नाचि के हेरोदेस तैं अर वे दगड़ी बैठण वला मेहमनों तैं खुश कैरी।

⁷ त तब वेल खुश हवे के अर वीं बट्टी सौं खै “कि जु कुछ तु मि बट्टी चैलि मि त्वे तैं दयुलु।”

⁸ तब वीं ल अपड़ी ब्वे का उखसौंण से बोलि, मि कु इखि यूहन्ना बपतिस्मा दींण वला को मुंड काटि के मि कु मंगवै दे।

⁹ राजा भौत उदास हवे पर अपड़ी सौं का कारण अर दगड़ा मा बैठण वला मेहमनों का कारण अपड़ा सेवकों तैं आज्ञा दींनि कि ईं नौंनि कु यूहन्ना कु मुंड कटवे दिये जौ।

¹⁰ तब राजा ल तुरंत एक सिपै तैं आज्ञा दे के भेजि कि यूहन्ना कु मुंड कटवै के लौ।

¹¹ वेल जेल मा जै के वेको मुंड काटि अर एक थाळ मा रखि के लै अर वीं नौंनि तैं दे दींनि अर वीं नौंनि ल अपड़ी ब्वे तैं दींनि।

¹² जब यूहन्ना का चेलों तैं यु पता चलि त ऐनी अर वेकी लांश तैं ली गैनी अर कब्र मा रखि अर जै के यीशु तैं यु समाचार दींनि।

पाँच हजार लुखुं तैं खिलांण

¹³ जब यीशु ल यु सूंणि त तब उ नाव मा चढ़ी के एकांत जंगल मा चलि गै अर लोग भि यु सूंणि के गौं-गौं बट्टी पैदल ही वेका पिछनैं चलण लगि गैनी।

¹⁴ वेल उख बट्टी निकली के एक बड़ी भीड़ देखि अर ऊं पर तरस खै अर ऊंका बिमारों तैं खूब कैरी।

¹⁵ जब शाम हवे गै त वेका चेला वेमा ऐ के बुल्ण लगि गैनी “यु एकांत जंगल च अर रुमुक हवे गै ऊं तैं विदा कैर कि चारों तरपां का गौं मा अर बस्तियों मा जै के अफ कु कुछ खांणु मोल ल्या।”

¹⁶ पर यीशु ल ऊंकु बोलि, “ऊंको जांण जरूरी नि च तुम ही ऊं तैं खांणु कु द्या।”

¹⁷ ऊंल यीशु मा बोलि, “इख हम मा पाँच रुट्टि छिन अर द्वी माछों तैं छोड़ी के और कुछ नि च।”

¹⁸ यीशु ल बोलि “ऊं तैं इख मि मा ल्या।”

¹⁹ तब वेल लुखुं तैं घास मा बैठुणु कु बोलि अर ऊं पाँच रुट्टियुं तैं अर द्वी माछों तैं अपड़ा हथ मा लींनि अर स्वर्ग जनै देखि के परमेश्वर कु धन्यवाद कैरी अर रुट्टि द्वी टुकड़ों मा तोड़ी-तोड़ी के चेलों तैं दींदी गैनी अर चेलों ल लुखुं तैं दींनि।

²⁰ जब सभि खै के तृप्त हवे गैनी त चेलों ल बचयां टुकड़ो से भुरयां ठुपरा भरिके उठैनि।

²¹ अर खांण वला जनन अर बच्चों तैं छोड़ी के पाँच हजार आदिम का लगभग छा।

पांणी पर यीशु कु चलण

²² तब वेल वे बगत अपड़ा चेलों तैं नाव पर चढ़ौणु कु मजबूर कैरी कि उ, ऊं बट्टी पैली छाला पर चलि जौनु जब तक कि उ लुखुं तैं विदा कैर।

²³ उ लुखुं तैं विदा कैरी कै उ एक एकांत डांडा मा पिता परमेश्वर बट्टी प्रार्थना कनु कु गै अर अफी-अफी रुमुक जुग तक उखि रै।

²⁴ त नाव गलील झील का बीच मा लैहरुं मा डगमगाणि छै किलैकि हव्वा संमणी बट्टी आंणि छै।

²⁵ अर यीशु राती खुलणा का बगत उ गलील झील पर चलदी ऊंका संमणी ऐ।

²⁶ चेला यीशु तैं झील मा चलद देखि के घबरै गैनी अर बुल्ण लगि गैनी कि “यु दुष्टात्मा च” अर भौत डौर के चिलांण लगि गैनी।

²⁷ तब यीशु ल तुरंत ऊं दगड़ी बात कैरी अर बोलि “ढाडस बांधा: मि छौं डैरा न।”

²⁸ पतरस ल ऊं तैं जवाब दींनि, कि “हे प्रभु जु तु छै त मि तैं अफ मा पांणी पर चलणै की आज्ञा दे।”

²⁹ वेल बोलि, “औ तब पतरस नाव पर बट्टी उतरी के यीशु का संमणी जांणु कु पांणि पर चलण लगि गै।”

³⁰ पर बथौं तैं देखि के डौर गै अर जब डुबंण लगि गै त चिल्लै कै बुल्ण लगि गै “हे प्रभु मि तैं बचौ”

³¹ यीशु ल तुरंत अपड़ो हथ बड़ै के वे तैं थामि दींनि अर वेकु बोलि, “हे अधुरा विश्वासी तिल शक किलै कैरी”

³² जब उ नाव पर चढ़ी गैनी त बथौं थमि गै।

³³ ईं बात पर ऊंल जु नाव मा बैठयां छा यीशु तैं आराधना अर प्रणाम कैरी कै बोलि, “तु सच्ची मा परमेश्वर कु नौंनो छै।”

यीशु द्वारा गन्नेसरत मा अनेक रोगियों तैं खूब कन

³⁴ तब उ छाला पर उतरी के गन्नेसरत मा पौंछिनी।

³⁵ उख लुखुं ल वे तैं पछयांणी दींनि अर अमणी-संमणी का सभि देशों मा यु खबर भेजि अर सभि बिमारों तैं वेका संमणी लैंनि

³⁶ अर लोग यीशु बट्टी बिनती कन लगि गैनी कि उ, ऊं तैं अपड़ा कपड़ा का चौला तैं छूंण द्यो अर जथग वे तैं छूंदा छा उ सभि खूब हवे गैनी।