लूका 2 - गढवली नयो नियमबैतलहम मा यीशु कु जन्म ( मत्ती 1:18-25 ) 1 ऊं दिनों मा रोमी सम्राट औगुस्तुस कैसर ल अपड़ा सारा साम्राज्य की जनगणना की राजाज्ञा निकली, की सारा रोमी साम्राज्य का सभि लुखुं का नौं लिखै जौं। 2 या पैली नौं लिखवाई वीं बगत हवे जब क्विरिनियुस सीरिया प्रान्त को राज्यपाल छो। 3 अर सब लोग अपड़ा नौं लिखौंणु कु अपड़ा पूर्वजों का नगरों कु गैनी। 4 अर यूसुफ भि इलै की उ राजा दाऊद का वंशज छो अर गलील जिला का नासरत नगर बट्टी यहूदिया प्रान्त मा राजा दाऊद का नगर बैतलहम शहर कु गै। 5 कि अपड़ी गर्भवती मंगेतर मरियम का दगड़ी नौं लिखाणु कु गै। 6 जब उ बैतलहम मा छा तब वीं का प्रसव का दिन पूरा हवेनि। 7 अर वीं ल अपड़ा पैला नौंना तैं जन्म दींनि अर वे तैं कपड़ा मा लपेटी के चौंरि मा रखि किलैकि वेकु धर्मशाला मा जगह नि छै। चरवाहों तैं स्वर्गदूतों कु सन्देश 8 अर वे देश मा कुछ बखरौल छा जु राती तपड़ मा रै की अपड़ा झुण्ड की रखवलि करदां छा। 9 अर प्रभु को एक स्वर्गदूत ऊंका संमणी खड़ो हवे अर प्रभु को महिमा को उज्ज्वल ऊंका चौतरफी चमकी अर तब उ भौत डैरी गैनी। 10 तब स्वर्गदूत ल ऊंमा बोलि डैरा न किलैकि देखा मि तुम तैं बड़ो आनन्द कु शुभ सन्देश प्रचार सुणौंणु छौं जु सब लुखुं कु होलो 11 कि आज बैतलहम शहर मा जु राजा दाऊद कु शहर च तुम कु एक उद्धारकर्ता जन्मीयूं च अर उ ही मसीह प्रभु च। 12 अर ये चिन्ह से तुम तैं पता चलि जालो की उ नौंनो कु च कि तुम एक नौंना तैं कपड़ा मा लिपटयुं अर चौंरि मा पोड़य्युं पैल्या। 13 तब एक-एक कैरी के वे स्वर्गदूत दगड़ी स्वर्गदूतों कु दल परमेश्वर की बड़ै करदी अर इन बुल्ण दिखेगे 14 सबसे ऊंचो, “स्वर्ग मा परमेश्वर की बड़ै अर धरती मा ऊं मनिख्युं मा जौं बट्टी उ खुश च शान्ति हो।” चरवाहों कु बैतलहम मा जांण 15 जब स्वर्गदूत ऊंका संमणी बट्टी स्वर्ग कु चलि गैनी त गडरियों ल आपस मा बोलि, चला हम बैतलहम गाैं जै के यु शुभ संदेश प्रचार ज्वा हुईं च अर जै तैं प्रभु ल हम तैं बतै देखि। 16 अर ऊंल तुरंत जै के मरियम अर यूसुफ तैं अर नौंना तैं पोड़य्युं देखि। 17 यूं देखि के ऊंल व बात ज्वा यु नौंना का बारा मा ऊंमा बुलै छै प्रगट कैरी। 18 अर उ सभि जौं ल उ सूंणि के जु बखरौल ल ऊंमा बोलि उ भैंचक्क मा पड़ि गैनी। 19 पर मरियम यूं सब बातों तैं अपड़ा मन मा रखि के सुचणी रै। 20 अर बखरौल जन स्वर्गदूतों ल ऊंमा बोलि छो उन ही सब सूंणि के अर देखि के परमेश्वर की बड़ै कैरी कै वापिस चलि गैनी। यीशु को खतना अर नौं रखण 21 नौंना यीशु का जन्म का बाद आठ दिन पूरा हवेनि अर वे नौंना को खतना कु बगत ऐ त वेको नौं यीशु रखे गै जु स्वर्गदूत ल वेका औंण से पैली बोलि छो। मन्दिर मा यीशु कु अर्पण 22 अर जब मूसा द्वारा लिखीं परमेश्वर की व्यवस्था का अनुसार वेका शुद्ध हूंणा का दिन पूरा हवेनि त तब यूसुफ और मरियम यरूशलेम शहर मा ली गैनी कि वे तैं परमेश्वर का संमणी लौनु। 23 जन कि मूसा द्वारा लिखीं परमेश्वर की व्यवस्था मा लिख्युं च कि हर एक पहिलौठो प्रभु कु पवित्र ठैरुलो। 24 अर मूसा द्वारा लिखीं परमेश्वर की व्यवस्था का अनुसार कबूतर का द्वी बच्चा लै कर बलिदान कैरा। शमौन कु गीत 25 वे बगत यरूशलेम शहर मा शमौन नौं को एक आदिम छो अर उ आदिम धर्मी अर भक्त छो अर इस्राएल का लुखुं तैं शान्ति कि बाट जुगल्णु छो अर पवित्र आत्मा वेका दगड़ी छो। 26 पवित्र आत्मा ल वे तैं बतै कि जब तक तु प्रभु का मसीह तैं दिखण से पैली नि मुरलि। 27 अर वे दिन पवित्र आत्मा का द्वारा वेकी अगुवाई हवे अर उ परमेश्वर बट्टी यरूशलेम शहर का मन्दिर मा ऐ अर जब यूसुफ अर मरियम वे नौंना यीशु तैं भितर लैंनि कि वेकु मूसा द्वारा लिखीं परमेश्वर की व्यवस्था कि रीति का अनुसार भेंट चढ़ौणु। 28 त वेल नौंना तैं यीशु की खुचल्या मा पकड़ी के परमेश्वर कु धन्यवाद कैरी कै बोलि, 29 “हे प्रभु अब तु मि तैं अपड़ा सेवक तैं अपड़ा वचन का अनुसार शान्ति से विदा कैरी दे। 30 मिल वे उद्धारकर्ता तैं देखेलि जै तैं तिल सभि लुखुं तैं बचांणु कु भेजि, कु च। 31 जै तैं तिल सब देशों का लुखुं का संमणी तैयार कैरी। 32 उ अन्यजातियों पर परमेश्वर तैं प्रकट कन वलो उज्यला च अर इस्राएल का लुखुं का घराना कु प्रताप हूंनु।” 33 अर यीशु का ब्वे बुबा यूं बातों से वेका बारा मा शमौन ल बुलै के हकदक हवे गै छो। 34 तब शमौन ल ऊं तैं आशीष दे के वेकी ब्वे मरियम मा बोलि, “उ त इस्राएल का लुखुं का घराना मा भौत लुखुं का विनाश अर उद्धार अर उ परमेश्वर की तरपां से एक चिन्ह का रूप मा भि जै गै छो, इलै भौत लोग वेको विरोध करला जैका विरोध मा बात किये जाली।” 35 एक भयंकर दुःख, एक तलवार की ढंग वरन तेरा प्राण पर तलवार कि चोट पुड़ेली। हन्नाह बट्टी गव्है 36 आशेर का गोत्र मा बट्टी हन्नाह नौं कि फ्नुएले की नौंनि एक परमेश्वर का तरपां बट्टी बुल्ण वली छै व भौत दानि छै अर ब्यो हूंणा का बाद सात बरस तक अपड़ा स्वामि दगड़ी रै सैकी। 37 व चौरासी बरसों बट्टी विधवा छै अर यरूशलेम शहर का मन्दिर तैं कभि नि छोड़िदि छै पर आराधना अर परमेश्वर बट्टी प्रार्थना कैरी कै रात दिन आराधना करदी छै। 38 अर व वे बगत पर उख ऐ के परमेश्वर कु धन्यवाद कन लगि गै अर ऊं सभियूं से जु यरूशलेम शहर का लुखुं तैं छुटकारा का मसीह तैं भिजणु कु परमेश्वर की जुगाल कन लगि गै। नासरत बट्टी वापिस लौटण 39 अर जब यूसुफ अर मरियम मूसा द्वारा लिखीं परमेश्वर की व्यवस्था का अनुसार सब कुछ पूरो कैरेली छो त फिर गलील जिला का अपड़ा नासरत नगर कु चलि गैनी। 40 अर उ नौंनो बढ़दी अर मजबूत अर बुद्धि से परिपूण हूंणु रै अर परमेश्वर कि दया वे पर छै। नौंनो यीशु मन्दिर मा 41 यीशु का ब्वे-बुबा हर साल फसह कु त्यौहार मा यरूशलेम शहर जांदा छा। 42 जब उ बारह बरस कु हवे त तब उ वे तैं त्योहार कि रीति का अनुसार यरूशलेम शहर कु गैनी। 43 अर जब यीशु का ब्वे-बुबा ऊं दिनों तैं पूरा कैरी कि आंण लगि गैनी त फिर उ नौंनो यीशु यरूशलेम शहर मा ही रै गै अर यु वेका ब्वे-बुबा नि जंणदा छा। 44 उ इन समझिके कि उ और यात्रियों का दगड़ा मा होलो त तब उ एक दिन को पड़ाव पूरो कैरी कि निकली गैनी अर वे तैं अपड़ा कुटुम्बियों अर जांण पैछाण वलो का इख खुज्योंण लगि गैनी। 45 पर जब नि मिली त खुज्योंद-खुज्योंद यरूशलेम शहर कु फिर वापिस लौटि गैनी। 46 अर तीन दिन का बाद ऊंल वे तैं यरूशलेम शहर का मन्दिर का चौक मा उपदेशकों का बीच मा बैठयूं अर ऊंकी सुणद अर ऊं बट्टी सवाल करद पै। 47 अर जथग वेकी सुनणा छा उ सब वेकी समझ अर वेका उत्तरों से हकदक रै गैनी। 48 तब वेका ब्वे-बुबा वे तैं देखि के हकदक हवे गैनी अर वेकी ब्वे ल वेमा बोलि, “हे नौंना तिल हम दगड़ी इन किलै कैरी? देख तेरु बुबा अर मि परेशान हवे के त्वे तैं खुज्योंणा छा।” 49 यीशु ल ऊंमा बोलि, “तुम मि तैं किलै खुज्योंणा छा? क्य नि जंणदा कि मि तैं अपड़ा बुबा का भवन मा रांण जरूरी च।” 50 पर जु बात वेल ऊंमा बोलि, ऊं बातों कु मतलब ऊं नि समझी सकिनि। 51 तब उ, ऊं दगड़ी नासरत नगर लौटि के ऐ गै अर ऊंका भस मा रै अर वेकी ब्वे ल यु सब बात अपड़ा मन मा रखिनि। 52 अर यीशु बुद्धि अर डील-डौल मा अर परमेश्वर अर मनिख्युं का कृपा मा बढ़दी गै। |
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.