लूका 15 - गढवली नयो नियम

हरचयां ढिबरा की मिसाल

¹ सभि चुंगि लींण वला अर पापी वेमा आंदा छा, कि वेकी सुनांणु।

² पर फरीसी अर मूसा की व्यवस्था तैं सिखांण वला कुड़कड़ै कै बुल्ण लगि गैनी “यु त पापियों तैं मिल्द जुलदो च अर ऊंका दगड़ा मा खांणु भि खांदु।”

³ तब वेल ऊं तैं या मिसाल सुणै

⁴ तुम मा इन कु होलो जै मनिख कि सौ ढिबरा हो, अर ऊंमा बट्टी एक हरचि जौं त उ निन्यानबे तैं एक सुरक्षित एकांत जंगल मा छोड़ी के उ पौड़ो पर जै के वीं हरचिं ढिबरा तैं नि खुज्यालो, जब तक खुज्यालो, जब उ मिली जौ?

⁵ अर जु इन हो कि व मिली जौं त उ बड़ा आनन्द से वीं तैं कांध मा उठै दींदु

⁶ अर अपड़ा घौर मा ऐ के अपड़ा दगड़ियों तैं अर आस-पड़ोस तैं कट्ठा कैरी कै बुल्द मेरा दगड़ा मा खुशी मनावा किलैकि मेरी हरचयूं ढिबरो मिली गै।

⁷ मि तुम मा सच बुल्णु छौं कि इन कै एक मन फिराण वला पापी का बारा मा स्वर्ग मा इन ही आनन्द होलो जथग निन्यानबे धर्मियों का बारा मा भि नि हूंद जौं तैं मन फिरौंण कि जरुरत नि च।

हरचयां सिक्का की मिसाल

⁸ जु क्य जनन मा दस चांदी का सिक्का हो अर ऊंमा बट्टी एक हरचि जौ त व दिवडा जलाली अर घौर मा झाडू लगाली अर तब तक ध्यान से खुजाली जब तक वे तैं खुज्यै नि द्यो अर उ मिली नि जौ?

⁹ अर जब उ मिली जांदु त व अपड़ा दगड़ियों अर अपड़ा आस-पड़ोस तैं कट्ठा कैरी के बुल्दी मि दगड़ी आनन्द मनावा किलैकि मेरू हरचियुं चांदी कु सिक्का मिली गै।

¹⁰ मि तुम मा बुल्णु छौं कि इन कै एक मन फिराण वला पापी का बारा मा परमेश्वर का स्वर्गदूतों का संमणी आनन्द हूंद।

उड़ाऊ नौंना की मिसाल

¹¹ फिर वेल एक अर मिसाल दे “एक मनिख का द्वी नौंना छा।”

¹² ऊंमा बट्टी छुटा नौंना ल बुबा कु बोलि, “हे बुबा जी, जैजात मा कु जु भि हिस्सा मेरू हो उ मि तैं दे द्यावा” बुबा ल द्वीयूँ नौंनों तैं अपड़ी धन दोलत बांटि दींनि।

¹³ अर कुछ दिनों का बाद ही छुटा नौंना ल सभि कुछ कट्ठा कैरी अर दूर का मुल्क चलि गै अर उख बुरा कामों मा अपड़ी सैरी धन दौलत उड़ै बिछै दींनि।

¹⁴ जब वेल सभि कुछ खर्च कैरी दींनि त वे देश मा घौर अकाल पोड़ि गै वेमा खांणु कु कुछ नि बची।

¹⁵ अर उ एक मनिख का इख काम कनु कु गै जु वे देश कु नागरिक छो। वेल वे तैं अपड़ा पुंगडा मा सुंगरु चराणु कु भेजि दींनि।

¹⁶ अर उ इदगा भूखो छो की उ वे तैं भोज की फलियों तैं खांणु कु भि खुश छो जु सुंगरु खांदा छा वे तैं कुई भि कुछ नि दींदु छो।

¹⁷ जब वे तैं समझ ऐ त बुद्धिमानी से सुनण लगि गै तब बुल्ण लगि गै “मेरा बुबा का कथग ही मजदूरों तैं ये से जादा रुट्टि मिलदी छै इलै कि अर मि इख भुखी मुरण छौं।”

¹⁸ मि अब उठि के अपड़ा बुबा मा जौलु अर वेमा बुललु हे बुबा मिल परमेश्वर का विरोध मा अर तेरा खिलाफ मा पाप कैरी।

¹⁹ अब मि तेरा नौंना हूंण लैख भि नि रौं मि तैं एक मजदूर कि तरौं रखि दे।

उड़ाऊ नौंनो कु लौटण

²⁰ तब उ वे देश तैं छोड़ी के अर अपड़ा बुबा मा जांणु कु वापिस चलि गै उ अभि दूर ही छो, कि वेका बुबा ल वे तैं देखि के तरस खै अर नौंना की अर दौड़ि कै वे तैं गौला लगै अर वेकी भुकि पीनि।

²¹ नौंनो ल बुबा कु बोलि, “पिता जी मिल परमेश्वर तक विरोध मा अर तेरा खिलाफ मा पाप कैरी अर अब मि तेरा नौंना हूंण का लैख नि रै ग्यों।”

²² पर वेका बुबा ल अपड़ा नौकरों कु बोलि, “झट से अच्छो कपड़ा निकलै वे तैं पैरावा अर वेका अंगुली मा अंगुंठी अर खुठौं मा जुता पैरावा।”

²³ अर बछड़ा कु बड़ो भोज तैयार कैरी कि हम खां अर अनन्द मणां।

²⁴ किलैकि मेरू यु नौंनो जैका बारा मा सुचदा छा की मोरि गै छो पर अब ज्यूँदो हवे गे: हरचि गै छो, अब मिली गै अर उ अनन्द मनांण लगि गैनी।

बड़ा नौंनो की शिकैत

²⁵ पर ये दौरान जब यु सब हूंणु छो वेको बड़ो नौंनो पुंगड़ा मा काम कनु छो। जब उ आंदी बगत घौर का नजीक पौंछि त वेल गाणा बजांण अर नाचणै की आवाज सूंणि।

²⁶ त वेल एक नौकर बुलै अर पूछि यु क्य हूंणु च?

²⁷ वेल वेकु बोलि, “तुमारो भुल्ला घौर वापिस अयुं च अर तुमारा बुबा ल पल्या बछड़ा तैं मारि किलैकि उ सूखि सन्ति घौर वापिस ऐ गै।”

²⁸ यु सूंणि के उ गुस्सा मा भुरे गै अर घौर मा भितर नि जांणु छो अर इलै वेको बुबा भैर ऐ के वे तैं भितर जांणु कु मनांण लगि गै।

²⁹ वेल बुबा कु बोलि, देखा मि इथग बरसों बट्टी तुमारी सेवा कनु छौं अर कभि भि तुमारो बुल्युं नि टाली तुम ल मि तैं कभि भि कुछ भि अच्छो नि दींनि कि मि भि अपड़ा दगड़ियों का दगड़ी आनन्द मणांदु।

³⁰ पर जब तुमारो यु नौंनो ऐ, जैल तुमारी धन दौलत बुरा कामों मा उड़ैयेलि अर वापिस अयुं च त तुम ल वेको बछड़ा कु बड़ो भोज तैयार कयुं च।

³¹ बुबा ल बड़ा नौंना मा बोलि, हे मेरा नौंना तु त सदनी मेरा दगड़ा मा छै अर जु कुछ मेरू च उ सब तेरु ही त च।

³² पर अब आनन्द मगन हूंण चयणु च किलैकि तेरु यु भैय जै कु मिल सोचि छो, कि मोरि गै छो पर फिर ज्यूँदो हवे गै हरचि गै छो पर अब मिली गै।