यूहन्ना 9 - गढवली नयो नियमयीशु द्वारा जन्म का अंधा तैं दृष्टिदान 1 जब यीशु अपड़ा चेलों का दगड़ी जांणु छो, त वेल एक मनिख तैं देखि, जु जन्म बट्टी अन्धो छो। 2 अर वेका चेलों ल वेमा पूछि, “हे गुरु, कैल पाप कैरी छो, कि यु अंधों जन्मी, ये मनिख ल या वेका ब्वे-बुबा ल? 3 यीशु ल जवाब दींनि, न येल पाप कैरी छो अर न वेका ब्वे-बुबा ल, पर यु इलै अंधों पैदा हवे कि परमेश्वर का काम वे पर प्रगट हूंनु। 4 जैल मि तैं भेजि, मि जल्दी से वेका द्वारा मि तैं सौंपी जाला कामों तैं पूरो कन च उ रात औंण वली च जैं मा कुई काम नि कैरी सकदु। 5 जब तक मि दुनिया मा छौं तब तक दुनिया कु उज्यला मि छों। 6 यु बोलि, के यीशु ल भूमि पर थूकि अर वे थूक ल माटो गून्दी अर ऊं माटो वे अंधा का आँखों पर लगै के 7 जा अर अपड़ो मुक शीलोह का कुण्ड मा ध्वे ले” (शीलोह को मतलब भिजे गै च) तब वेल जै के ध्वे अर दिखदी लौटि ऐ। 8 तब वे आदिम का पड़ोसी अर अन्य लुखुं जौं ल वे तैं भीख मंगद देखि छो एक दुसरा बट्टी बुल्ण लगि गै क्य यु उ ही नि च जु बैठी के भीख मंगणु रौंदु छो? 9 कुछ लुखुं ल बोलि, “यु उ ही च” और ल बोलि, “न, पर वे जन च” पर वेल बोलि, मि उ ही छौं जु बैठी कै भीख मंगदु छों। 10 तब उ वेमा पुछण लगि गैनी, त्वे तैं नजर कनके मिली? 11 वेल जवाब दींनि, यीशु नौं कु एक आदिम ल माटो गून्दी अर मेरा आँखों पर लगै के मि मा बोलि, शीलोह कुण्ड मा जै के ध्वे ले, मि कुण्ड ग्यूं अर मिल अपड़ा आँखा ध्वैनि अर दिखण लगि ग्यों। 12 ऊंल वेमा पूछि, उ आदिम कख च? वेल बोलि, “मि नि जंणदु।” फरीसियों द्वारा चंगाई की जाँच-पड़ताल 13 जै दिन यीशु ल माटो छाणी अर वे आदिम तैं खूब कैरी उ यहूदियों को विश्राम कु दिन जु परमेश्वर कु पवित्र दिन च छो इलै लोग वे आदिम तैं फरीसियों का संमणी ली गैनी। 14 जै दिन यीशु ल माटु छाणके वेका आँखा खोलि छा उ यहूदियों को विश्राम को दिन जु परमेश्वर को पवित्र दिन छो इलै। 15 फरीसियों ल भि वेमा पूछि, यु दिखण का योग्य कनके हवे वेल ऊंमा बोलि, वेल मेरा आँखों पर माटो लगै फिर मिल अपड़ा आँखा ध्वैनि अर अब दिखणु छौं। 16 ईं बात पर कुछ फरीसी यीशु का बारा मा बुल्ण बैठी गैनी कि यु मनिख परमेश्वर का तरपां बट्टी नि च किलैकि यु यहूदियों का विश्राम का दिन जु परमेश्वर कु पवित्र दिन च नि मंणदु। पर दुसरा लुखुं ल बोलि, पापी मनिख इन चिन्ह चमत्कार कनके दिखै सकदु? अर ऊंमा फूट पोड़ि गै। 17 ऊंल वे अंधा मा फिर बोलि, वेल तेरा आँखा तैं खोलि तु वेका बारा मा क्य बुल्दी? वेल बोलि, कि उ परमेश्वर का तरपां बट्टी बुल्ण वलो च। 18 पर यहूदियों का अगुवों तैं विश्वास नि हवे कि उ अन्धो छो अर अब दिखदु च जब तक कि ऊंल वेका ब्वे-बुबा तैं बुलै के 19 वेका ब्वे-बुबा बट्टी पूछि, “क्य यु तुमारो नौंनो च जै कु तुम बुल्दा छा कि अंधों जन्मी छो? फिर अब कनके दिखणु च?” 20 वेका ब्वे-बुबा जवाब ल दींनि हम त जंणदा छा कि यु हमारो नौंनो च अर अन्धो जन्मी छो 21 पर हम यु नि जंणदा कि अब कनके दिखद अर न यु जंणदा कि कैल वेका आँखा खुलींनि। उ खुद कु जवाब दींणु कु काफी बड़ो च; वेमा बट्टी पूछिल्या; उ अपड़ा बारा मा अफी बोलि दयालो। 22 यु बातों तैं वेका ब्वे-बुबा ल इलै बोलि, किलैकि उ यहूदी अगुवों बट्टी डरदा छा; किलैकि यहूदी अगुवा एकमत हवे गै छा कि जु विश्वास कैरी की यीशु ही मसीह च त यहूदियों का मिलणा का भवन मा बट्टी निकाले जौं। 23 इलै वेका ब्वे-बुबा ल बोलि, उ सवालों का उत्तर दींणु कु काफी बड़ो च वेमा बट्टी पूछिल्या। 24 तब यहूदी अगुवों ल वे मनिख कु जु अंधों छो दुसरी बार बुलै के वेमा बोलि, परमेश्वर का संमणी वादा कैरी के तु सच बतालो; हम त जंणदा छा कि उ मनिख पापी च। 25 पर वेल जवाब दींनि कि मि नि जंणदु कि उ पापी च कि नि च मि एक बात जंणदु छौं कि मि पैली अन्धो छो पर अब दिखणु छौं। 26 ऊंल वेमा फिर बोलि, वेल त्वे दगड़ी क्य कैरी? अर कनके तेरा आँखा खूब हवेनि? 27 वेल ऊंमा बोलि, मि त तुम मा बोलि चुकि ग्यों अर तुम ल नि सूंणि अब दुसरी बार किलै सुनण चांणा छा? क्य तुम भि वेका चेला हूंण चांणा छा? 28 तब उ वेको बुरो भलो बोलि कि तु ही वेकु चेला छै हम त परमेश्वर का तरपां बट्टी बुल्ण वला मूसा कु चेला छा। 29 हम जंणदा छा कि परमेश्वर मूसा बट्टी बात कैरी पर हम यु मनिख तैं नि जंणदा कि कख बट्टी अयुं च। 30 वेल ऊं तैं जवाब दींनि य त अचम्भो कन वलि बात च कि तुम नि जंणदा कि उ कखौ च तब भि वेल मेरा आँखा खुलींनि। 31 हम जंणदा छा कि परमेश्वर पापी लुखुं कि नि सुंणदो पर जु कुई परमेश्वर कु भक्त हो अर वेकी मनसा पर चलदो च त उ वेकी सुणदु च। 32 जब बट्टी दुनिया कि सृष्टि किये गै छै या कभि सुनण मा नि ऐ कि कैल जन्म का अंधा का नजर दींनि। 33 यु मनिख परमेश्वर कि तरपां बट्टी च इलै यु चमत्कार कनु च। 34 ऊंल वे तैं जवाब दींनि, “तु त बिल्कुल पापों मा जन्मीयूं छै तु हम तैं क्य सिखांणि छै?” तब ऊंल वे आदिम तैं यहूदियों का मिलणा की जगह बट्टी भैर निकाली दींनि। आत्मिक अंधौपन 35 यीशु ल जब यु सूंणि, कि ऊंल वे आदिम तैं यहूदियों का मिलण का भवन बट्टी भैर निकाली दींनि, अर जब यीशु की वे बट्टी भेंट हवे त यीशु ल बोलि, क्य तु मि मनिख कु नौंनो पर विश्वास करदी छै? 36 वेल जवाब दींनि, “श्रीमान, मि तैं बतौ की उ परमेश्वर कु नौंनो को च, कि मि वे पर विश्वास कैर सकु?” 37 यीशु ल वेमा बोलि, तु पैली ही वे तैं देख चुकि गै, अर मि ही परमेश्वर कु नौंनो छों, जु अब त्वे दगड़ी बात कनु छों। 38 वेल बोलि, “हे प्रभु, मि त्वे पर विश्वास करदु छों।” अर तेरी आराधना कर त्वे तैं दण्डवत करदु। 39 तब यीशु ल बोलि, मि ईं दुनिया मा जांच अर न्याय कनु कु अयुं छौं, बल्कि अंधा लोग दिखण लगि गैनी अर जु लोग दिखदा छिन उ अंधा हवे जां 40 जु फरीसी वेका दगड़ी छा ऊंल यु बात सूंणि के वेमा बोलि, क्य तु बुल्णी छै की हम भि अंधा छा? 41 यीशु ल ऊंमा बोलि, “जु तुम अंधा हूंद त पापी नि ठैरदा पर अब बुल्णा छा कि हम दिखदा छा अर इलै अब तुम्हरो पाप माफ नि किये जालो।” |
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.