यूहन्ना 19 - गढवली नयो नियम

कोड़ा लगवांण अर मजाक उड़ाण

¹ यां पर पिलातुस ल सिपैयूं तैं आज्ञा दे के, की यीशु तैं लिजा अर वे पर कोड़ा मारा।

² सिपैयूं ल यीशु तैं बैंगनी जु शाही कपड़ा छा पैरेनि जन राजा पैरदो अर वेको ठट्टा कैरी अर झिबलांण कु मुगट बूणि कै वेका मुंड मा रखि

³ अर इन बोलि के यीशु तैं प्रणाम कन लगि गैनी “हे यहूदियों का राजा प्रणाम” इन बोलि के वे तैं छकड़ भि मरिनि।

⁴ तब पिलातुस ल फिर भैर ऐ के लुखुं मा बोलि, “देखा मि वे तैं फिर तुमारा संमणी भैर लांदु इलै कि तुम तैं जांणि सक्यां कि मि वेमा कुई भंगार नि दिखणु छौं।”

सूली पर चढ़ौणु कु सौंपण

⁵ तब यीशु कांडों कु मुकुट अर बैंगनी कपड़ा पैरी के भैर लैनि अर पिलातुस न ऊंकु बोलि, “यु मनिख तैं देखा”

⁶ जब प्रधान याजक ल अर मन्दिर का रखवला ल यीशु तैं देखि त चिल्लै कै बोलि, “वे तैं सूली पर चड़ौ सूली पर” पिलातुस न ऊं लुखुं मा बोलि “तुम ही वे तैं सूली पर चड़ा किलैकि मि त वे पर कुई भंगार नि पांणु छौं।”

⁷ यहूदियों का अगुवों ल वे तैं जवाब दे “हमारी भि व्यवस्था छिन अर ऊं व्यवस्था का अनुसार उ मरै जांण लैख च किलैकि वेल अफ तैं परमेश्वर को नौंनो बतै।”

⁸ जब पिलातुस न यु बात सुंणिनि त अर भौत ही जादा डौर गै

⁹ अर फिर राजा का महल का भितर गै अर यीशु मा बोलि, “तु कख बट्टी छै” पर यीशु ल कुई जवाब नि दे।

¹⁰ पिलातुस ल यीशु बट्टी बोलि “मि मा किलै नि बुल्णी छै? क्य तु नि जंणदी कि त्वे तैं छोड़णो कु अधिकार मि मा च अर त्वे तैं सूली पर चड़ाणो कु भि अधिकार मि तैं च।”

¹¹ यीशु ल जवाब दे “जु मि तैं परमेश्वर की तरपां बट्टी नि दिये जांदु, त तेरु मि पर कुछ अधिकार नि हूंदो इलै जैल मि तैं तेरु हथ पकड़वै च वेको पाप जादा च।”

¹² यु कारण बट्टी पिलातुस ल वे तैं छोड़ी दींण चै, पर यहूदियों ल चिल्लै-चिल्लै कै बोलि, “जु तु यु तैं छोड़ी दीलि त तु कैसर कु दगड़िया नि; जु कुई भि राजा हूंण का दावा करदु च उ कैसर कु दुश्मन च।”

¹³ यूं बातें तैं सूंणि कै पिलातुस यीशु तैं भैर लै, अर उ न्याय आसण पर बैठी, जु की ढुंगों कु एक चौंरि छै जैकु इब्रानी भाषा मा गब्बता बुल्दा छा वे जगह पर छों।

¹⁴ यु फसह को त्यौहार कु दिन छो अर दुफरा का बगत का लगभग छो; तब वेल यहूदियों मा बोलि, “देखा, यु ही च तुमारो राजा!”

¹⁵ पर उ चिलांण लगि गैनी “वे तैं मर डाला, वे तैं मर डाला!” वे तैं सूली पर चढ़ावा! पिलातुस ल ऊंमा बोलि, “क्य मि तुमारा राजा तैं सूली पर चढ़णै” प्रधान याजक ल जवाब दींनि, “कैसर तैं छोड़ी कै हमारो अर कुई राजा नि च।”

¹⁶ तब पिलातुस ल यीशु तैं सूली पर चढ़ाणा कु ऊंका हवाला कैरी दींनि कि उ सूली पर चढ़ै जौं।

सूली पर चढ़ै जांण

¹⁷ तब उ यीशु तैं ली गैनी। अर उ अपड़ी सूली तैं उठै कै वीं जगह तक भैर लीगि जैकु, “खोपड़ी कि जगह” बुल्दा छिन अर इब्रानी भाषा मा गुलगुता बुलै जांदु।

¹⁸ उख ऊंल यीशु अर द्वी डाकूओं तैं सूली पर चढ़ै एक तैं दैंणि अर एक तैं बैं तरपां अर बीच मा यीशु चढ़ै दींनि।

¹⁹ अर राज्यपाल पिलातुस ल यीशु का मुंड का सूली का मथि एक भंगार की एक तख्ती लिखीं के ठोकी दींनि जै पर लिख्युं छो “नासरत को यीशु नासरी यहूदियों कु राजा।”

²⁰ यु भंगार-चिठ्ठी भौत यहूदियों ल पैढ़ी किलैकि वीं जगह जख यीशु सूली पर चढै गै छो यरूशलेम शहर का संमणी छो अर चिठ्ठी इब्रानी भाषा अर लतीनी अर यूनानी भाषा मा लिख्युं छो।

²¹ तब यहूदियों का प्रधान याजक ल पिलातुस मा बोलि, “यहूदियों कु राजा नि लिख पर इन लिख कि येल बोलि, मि यहूदियों कु राजा छौं।”

²² पिलातुस ल न जवाब दे “मिल जु लिखीं येले, उ बदली नि सकदु।”

²³ जब सिपै यीशु तैं सूली पर चढ़ै चुकि गैनी त ऊंल यीशु का अर चरी सिपैयूं ल एक-एक बांठा लै द्या अर कुर्ता भि लै द्या, कुर्ता तैं सिलियूं नि छो बल्कि उ मथि बट्टी मूड़ि तक बणयुं कपड़ा कु एक ही टुकड़ा बट्टी बणयुं छो।

²⁴ इलै सिपैयूं ल एक दुसरा बट्टी बोलि, “हम यु तैं नि फडुला पर इलै चिठ्ठी डाली की यु कैकु होलो” यु इलै हवे कि परमेश्वर का वचन मा लिखै गै छो उ सच हो, ऊंल मेरा कपड़ा आपस मा बांटि दींनि अर मेरा कपड़ा पर चिठ्ठी डाली तब सिपैयूं ल इन ही कैरी।

यीशु की अपड़ी ब्वे तैं सलाह

²⁵ पर यीशु का सूली का संमणी वेकी ब्वे अर वेकी ब्वे की बैंण, क्लोपास की जनन मरियम जु मगदल गौं की छै खड़ी छै।

²⁶ जब यीशु ल अपड़ी ब्वे अर वे चेला तैं जै बट्टी उ प्रेम रखदु छो संमणी खड़ो देखि त ऊंल अपड़ी ब्वे कु बोलि, “हे नारी देख यु तेरु नौंनो।”

²⁷ तब वेल चेला कु बोलि, “या तेरी ब्वे च।” तब उ चेला वीं तैं अपड़ा परिवार का हिस्सा बंणै कै अपड़ा घौर ली गै।

कामों कु पूरो हूंण

²⁸ यांका बाद यीशु ल यु जांणि के की अब वेल अपड़ो सैरो काम खत्म कैरी येले इलै कि परमेश्वर का वचन मा लिखीं बात सच साबित हो, यीशु ल बोलि, “मि तिसलो छौं।”

²⁹ उख एक सिरका ल भुर्युं एक भांडों रख्युं छो सिपैयूं ल सिरका मा भिज्युं रुवां कु एक गुंडो निंगला डगुला पर रखि के ऊंका गिच्चा पर लगै।

³⁰ जब यीशु ल उ सिरका चूसि तब ऊंल बोलि, “पूरो हवे गै” अर वेल मुंड झुकै कै अपड़ा प्राण छोड़ी दींनि।

भाला बट्टी बिधै जांण

³¹ उ यहूदियों कु तैयारी कु दिन छो, अर हैंका दिन यहूदियों को विश्राम कु दिन छो जु परमेश्वर कु पवित्र दिन छो अर त्यौहार द्वी ही छा यु यहूदी लुखुं कु एक विशेष दिन च अर उन ही चांदा छा की यु दिन कु शव तैं सूली पर नि रो इलै ऊंल पिलातुस बट्टी बोलि, कि ऊं मनिख का टंगड़ा तुड़वै द्या कि ऊं जल्दी मोरि जौं अर शव तैं भुयां उतारे जै सका।

³² इलै सिपैयूं ल जै के जु यीशु का दगड़ा मा सूली पर चड़ाये गै छा ऊं द्वी का खुट्टा तोड़ी दींनि।

³³ पर जब उ यीशु मा ऐनी अर ऊंल देखि कि उ मोरि गै त ऊंल वेका खुट्टा नि तुड़िनि।

³⁴ पर एक सिपै ल वेकी पंणकोखि पर भाला कि चोट मारि अर उख बट्टी वे बगत ल्वे अर पांणी निकली।

³⁵ जै आदिम ल यु सब देखि, वेल गव्है दींनि, कि तुम भि यीशु पर विश्वास कैर सका अर वेकी गव्है सच हो। अर उ जंणदु च कि उ सचै बट्टी बुल्दो की तुम विश्वास कैरा।

³⁶ यु बात इलै हवे कि परमेश्वर का वचन मा जु लिख्युं च ऊं सच हवे जौ, “वेकी कुई हड्डी तुड़ै नि जालि।”

³⁷ फिर एक अर जगह पर परमेश्वर का वचन मा यु भि लिख्युं च “जैल वे तैं बेधि छो वे पर नजर कैरा।”

यूसुफ का कब्र मा यीशु तैं दफनै जांण

³⁸ यूं बातों का हूंण का बाद अरिमतियाह गौं का यूसुफ ल जु यीशु को चेला छो पर यहूदियों का अगुवों का डर से यूं बातें तैं छिपै के रखि, पिलातुस बट्टी बिनती कैरी, कि मि यीशु का शव तैं लै जौं, पिलातुस ल वेकी बिनती सूंणि, अर उ ऐ के ऊंका शव ली गै।

³⁹ अर नीकुदेमुस जु कि राती का बगत यीशु मा ऐ छो तैंतीस किलोग्राम का लगभग मिल्युं, भीनी खुशबुदार चिज्युं अर एल्वा लै ऐ।

⁴⁰ तब ऊंल यीशु की लांश तैं यहूदियों का दफनौंणै की रीति का अनुसार, वे पर खुशबुदार चिज्युं तैं लगै के कपड़ै की पटियों ल लपैटि।

⁴¹ वीं जगह का संमणी जख यीशु सूली पर चढ़ै गै छो, एक बगिचा छो; वे बगिचा मा एक नई कब्र छै पैली कभि इस्तेमाल नि किये गै छो।

⁴² इलै ऊंल यीशु का शव तैं वे कब्र की गुफा मा रख दींनि किलैकि उ संमणी मा छै अर यहूदियों का सब्त कु तैयारी को दिन भि छो।