इब्रानी 9 - गढवली नयो नियम

सांसारिक तम्बू

¹ व पैली वाचा जु भौत बगत पैली, मूसा का द्वारा इस्राएल देश का लुखुं तैं दिये गै छै। वेमा परमेश्वर की आराधना कनु कु पूरा नियम-कानून छा अर ईं धरती पर आराधना कु लुखुं का द्वारा बणये गै मिलाप कु एक पवित्र तम्बू भि छो।

² यु मिलाप वला तम्बू जानवरों की खाल ल बणयूँ छो; वे तम्बू का बीच मा, ऊंको एक पर्दा लटकयूँ छो अर द्वी भितरों मा बटयूं छो एक धूपदान वलो कमरा छो जै का सात फौंका छा; उख एक मेज छो जै पर पिता परमेश्वर तैं चढ़ै जांण वली रुठी रखै जांदी छै; यु कमरा तैं पवित्र जगह बुलै जांदु छो।

³ अर दुसरा मिलाप वला तम्बू मा जु पर्दा का पिछनै छो, वे तैं परम पवित्र जगह बुलै जांदु छो।

⁴ यु दुसरा कमरा मा, एक सोना की वेदी छै, जैको इस्तेमाल धूप जलांण कु किये जांदु छो, अर उख एक संदूक भि छो जु भितर-भैर सोना कु बणयूँ छो; वे संदूक तैं वाचा कु संदूक बुलै जांदु छो, संदूक का भितर तीन चीज छै; सबसे पैली, एक सोना कु भांडो छो जै मा एक विशेष किस्म को खांणु छो जै तैं “मन्ना” बुल्दा छा; यु मा हारुन की जांढी भि छै, जै मा अंकुरित पत्ता भि छा; आखिर मा, यु मा ढुंगा की द्वी पठाल भि छै, जै पर पिता परमेश्वर ल दस आज्ञाएँ लिखीं छै, जु वेल मूसा तैं द्ये छै।

⁵ यांका अलावा सोना का सन्दूक का मथि द्वी करूब छा, जूंका फांकुड वे सन्दूक का मथि फैलयां छा, जु ईं बात का चिन्ह छा कि पिता परमेश्वर की महिमा ईं जगह पर च; ऊंका खुल्यां फांकुड सन्दूक का ऊपरी हिस्सा तैं ढकदा छा जै पर ल्वे छिड़कै जांदु छो कि लुखुं का पापों तैं माफ किये जौं; पर हम यूं सभि चीजों तैं एक-एक कैरी कै नि बतै सकदा।

दुनिया की सेवा कनै की एक सीमा

⁶ इन ही कै ऊंल ऊं सभि चीजों तैं मिलाप वला तम्बू का द्वी भितरों मा तैयार कैरी; यहूदी याजक रोज अपड़ी धार्मिक विधियों तैं पूरो कनु कु पैला कमरा मा जांद छा,

⁷ पर भस महायाजक पूरा साल मा एक बार परम पवित्र जगह मा जांदु छो; जब उ भितर जांदु छो त उ हमेशा अफ दगड़ी जानवरों कु ल्वे ले के जांदु छो अर उ यु तैं अपड़ा पापों की माफी कु अर लुखुं का पापों की माफी कु पिता परमेश्वर तैं बलिदान चढ़ांदु छो जु उ अनजाना मा करदा छा।

⁸ यूं रीतियों का द्वारा जु पिता परमेश्वर चांदो छो कि याजक कैरा, पवित्र आत्मा हम तैं कुछ बतांद; मतलब यु कि स्वर्ग मा पिता परमेश्वर की वास्तविक परम पवित्र यरूशलेम शहर कु मन्दिर तब तक लुखुं कु खुली नि च जब तक ईं धरती पर मिलाप वला तम्बू अर ऊंकी विधियों तैं मणदींनि, अर यांको दीं पूरी व्यवस्था जब तक की पूरी न किये जौं।

⁹ यु सभि चीज बसयूं बातों तैं बतौंदी जु कि अब मसीह का कारण पूरी हूंणी च; किलैकि उ सभि भेंट अर बलिदान जु ऊं लुखुं का द्वारा पिता परमेश्वर तैं चढै जांदी छै जु वेकी आराधना करदा छा अर भक्त छा, उ लुखुं का मनों अर दिलों तैं शुद्ध कना का लैक नि छै।

¹⁰ किलैकि व पुरणी व्यवस्था भस यूं बातों पर जुड़ीं छै मतलब य कि एक आदिम तैं क्य खांण-पीण चयणु च अर दुसरा शुद्धिकरण का बारा मा; या विधि जैको कै भि आदिम बट्टी कुछ भि लींण-दींण नि च; यु तैं तब तक अभ्यास मा रखै गयै जब तक कि एक बढ़िया व्यवस्था नि बंणि जौं।

स्वर्ग कु तम्बू

¹¹ पर जब मसीह महायाजक हवे के ऐ, जु नई वाचा की सभि अच्छी-अच्छी चीजों तैं दींद, जु पैली बट्टी ही छै, त वेल और भि जादा महान अर मिलाप वला तम्बू मा प्रवेश कैरी; यु मनिख्युं द्वारा नि बणै गै अर ई दुनिया बट्टी जुड़ियूं नि च।

¹² अर मसीह ल परम पवित्र जगह मा भस एक बार अर हमेशा कु प्रवेश कैरी; उ अफ दगड़ी बखरों अर बछड़ों कु ल्वे ले के नि गै; वेको बलिदान वेका अपड़ा ल्वे कु छो, अर यांका द्वारा वेल हम तैं पापों बट्टी हमेशा कु छुड़ै।

¹³ मूसा की व्यवस्था का अनुसार, उ लोग जु विधि का अनुसार अशुद्ध हूंदा छा, उ पिता परमेश्वर की आराधना कना का योग्य नि हूंदा; फिर भि ऊं तैं साफ समझै जालो, जु ऊं पर बखरों अर बल्दों का ल्वे अर एक चढयां बछड़ों कु राखो छिड़कै जौं।

¹⁴ जरा सोचि के देखा, कि मसीह कु ल्वे हमारा दिलों तैं ऊं कामों बट्टी कथग शुद्ध करलो जु मौत का तरपां लिजांदी, कि हम जीवित पिता परमेश्वर की आराधना कैरी साका; किलैकि हमेशा की आत्मा की सामर्थ का द्वारा, मसीह ल हमारा पापों कु अपड़ा आप तैं एक सिद्ध बलिदान का रूप मा पिता परमेश्वर तैं भेंट का रूप मा चढ़ै।

¹⁵ इलै ही मसीह ल लुखुं का दगड़ी जुड़ण वली एक नई प्रतिज्ञा तैं बांधि, कि उ लोग जु पिता परमेश्वर का द्वारा बुलै गै छा, ऊं अनन्त आशीषों तैं पै साका जौको वादा पिता परमेश्वर ल कैरी छो; यु इलै हवे सकद किलैकि मसीह ऊं तैं ऊंका पापों का दण्ड बट्टी छुडांणु कु मरै गै जु ऊंल पैली वाचा का अधीन रै के कैरी छो।

¹⁶ हम जंणदा छा कि जु कुई आदिम अपड़ी मौत से पैली अपड़ी दौलत कु बंटवरा की वसीहत लिखद, त यु जरूरी च कि पैली वेकी मौत हो कि वेका आज्ञाओं तैं पूरो किये जै साको।

¹⁷ तब वारिस उ सभि कुछ पै सकद जु वसीयत मा वे तैं दिए गै छै; किलैकि जु वसीयत लिखण वलो अभि ज्यूँदो हो, त यु संभव नि च कि वेका द्वारा दीं आज्ञाओं तैं पूरो किये जौं।

¹⁸ इलै इख तक कि पिता परमेश्वर का द्वारा दीं पैली वाचा पक्की हूंण से पैली एक ल्वे का द्वारा बलि को दींण जरूरी छो।

¹⁹ सबसे पैली, मूसा ल सब लुखुं तैं व्यवस्था की हर आज्ञा का बारा मा बतै; यांका बाद वेल बछड़ों कु ल्वे ले अर वे तैं पांणी मा मिलै; फिर वेल यु तैं व्यवस्था की किताब (चाम्रपत्र) अर सभि लुखुं पर छिड़कणु कु लाल ऊंन अर जूफा नौं का डाला का फौंको कु इस्तेमाल कैरी।

²⁰ जब मूसा यु कनु छो, त वेल लुखुं कु बोलि, “यु ल्वे वीं वाचा तैं शुरू करद जै तैं मनणु की आज्ञा पिता परमेश्वर ल तुम तैं द्ये।”

²¹ अर ईं रीति ल ही मूसा ल मिलाप वला तम्बू अर आराधना की सेवा का सैरा सामान पर ल्वे छिड़की।

²² अर मूसा की व्यवस्था का अनुसार, लगभग हर चीज तैं विधि का अनुसार ल्वे बट्टी साफ किये जांण चयणु च; ल्वे बुगयां बगैर, पिता परमेश्वर लुखुं तैं ऊंका पापों बट्टी माफ नि कैरी सकद।

मसीह का बलिदान का द्वारा पापों की माफी

²³ इलै यु जरूरी छो कि मिलाप वला तम्बू अर वेमा की सभि चीजों तैं विधि का अनुसार शुद्ध कनु कु पशुबलि दिए जौं अर यु स्वर्ग की चीजों की नकल च; पर स्वर्ग मा कि ऊं चीजों तैं विधि अनुसार साफ कनु कु, जानवरों का ल्वे बट्टी जादा बढ़िया बलिदान की जरूरत छै।

²⁴ वेका कारण, मसीह वीं पवित्र जगह मा नि गै जै तैं लुखुं ल बणै, जु कि सच्चा स्वर्गीय मन्दिर की भस एक छवि च; पर उ स्वर्ग मा गै ज्यां बट्टी उ हमारा फैदा कु पिता परमेश्वर का संमणी मौजूद हवे साकी।

^25-26 महायाजक हर साल एक जानवर कु ल्वे का दगड़ी परम पवित्र जगह मा जांद छो; पर मसीह अपड़ा आप तैं बार-बार बलिदान चढ़ौणु कु नि गै। जु वे तैं इन कन पुड़दो त फिर वे तैं दुनिया की रचना का बगत बट्टी कई बार दुःख उठांण पुड़दो; पर अब ई आखरी दुनिया मा, मसीह हम कु अपड़ा बलिदान की मौत का द्वारा पाप की शक्ति तैं हमेशा कु मिटाणु कु एक बार सभियूं कु प्रकट हवे।

²⁷ अर जन हरेक आदिम कु एक बार मुरण निश्चित च; उन ही मौत का बाद, पिता परमेश्वर हर एक आदिम कु न्याय का द्वारा जांच करलो।

²⁸ उन ही के, मसीह भि भस एक बार बलि चढ़ै गै कि उ सभि लुखुं का पापों तैं दूर कैरी के उद्धार करलो; जब उ दुबरा आलो तब उ पाप कु बलिदान हूंणु कु न बल्कि ऊं तैं बचांणु कु ऐ जु वेको जग्वाल कना छा।