इब्रानी 8 - गढवली नयो नियमस्वर्गीय महायाजक 1 अब जु बात हम बुल्णा छा, वेमा सबसे बड़ी बात या च, कि हम मा निश्चय ही इन एक महायाजक च, जु स्वर्ग पर महामहिमन पिता परमेश्वर का सिंहासन का दैंणा बैठयूं च। 2 हमारो महायाजक परम पवित्र स्वर्गीय मन्दिर मा सेवा करद, मतलब की सच्चा मिलाप का तम्बू मा, जु मनिख्युं का द्वारा न बल्कि पिता परमेश्वर का द्वारा बणै गै। 3 किलैकि हर एक महायाजक तैं पापों की माफ कु भेंट अर बलिदान चढ़ौणे की जरूरत च, इलै ही जरूरी च, कि हमारा महायाजक, यीशु मा भि कुछ चढ़ौणु कु हो। 4 अर जु मसीह धरती पर हूंद त कभी यहूदी याजक नि हूंद, इलै कि धरती पर मूसा की व्यवस्था का अनुसार, पैली ही याजक च जु भेंट तैं चढौदींनि। 5 जु याजक का रूप मा उ काम करदींनि, उ भस वेकी एक नकल च जु स्वर्ग म च, पर यु उन नि च जन स्वर्ग म च, किलैकि जब मूसा मिलाप वला तम्बू तैं बनांणु कु तैयार हूंणु छो, तब पिता परमेश्वर ल वे तैं या चेतावनी द्ये, “देख स्वर्गीय मन्दिर कु जु नमूना त्वे तैं पोड पर दिखै गै छो, वेका हिसाब से सभि कुछ बणौ।” 6 पर जु याजक की सेवा कु काम हमारा महायाजक यीशु मसीह तैं मिली, उ वे काम से कई जादा बड़ो च जु दुसरा याजकों तैं दिये गै छो, किलैकि यीशु उ ही च जु नई प्रतिज्ञा का आधार पर, पिता परमेश्वर का संमणी हम कु एक भौत उत्तम वाचा तैं जुड़ण वलो च। नई वाचा 7 किलैकि जु व पैली वाचा निर्दोष हूंदी, त दुसरी वाचा की जरूरत ही नि हूंदी। 8 पर पिता परमेश्वर लुखुं पर भंगार लगै के बुल्द, “प्रभु बुल्द, देखा उ दिन औंदींनि, कि मि इस्राएल का लुखुं का दगड़ी, अर यहूदा का लुखुं का दगड़ी, मि एक नई प्रतिज्ञा बन्धुलु 9 व वाचा उन नि होली जन मिल ऊंका पुरखों दगड़ी वे बगत कैरी छै, जब मिल ऊंको हाथ मिस्र देश बट्टी निकलण दफा पकड़ी छो, किलैकि प्रभु बुल्द, उ मेरी वाचा का दगड़ी विश्वासी नि रैनी, अर मिल ऊं दगड़ी मुक फेरी दींनि। 10 फिर प्रभु बुल्द, कि जु नई प्रतिज्ञा आंण वला दिनों मा इस्राएल देश का लुखुं का दगड़ी मि करुलु, व या च, कि मि ऊं तैं मेरी व्यवस्था का बारा मा सुचण दयुलु, अर उ वे तैं अपड़ा मनों मा रखला, अर मि ऊंको पिता परमेश्वर बणलु उ मेरी आराधना करला, अर उ मेरा लोग होला। 11 अर हर एक अपड़ा देश का लुखुं तैं अर अपड़ा रिश्तेदारों तैं यु शिक्षा नि दयाला, कि तू प्रभु तैं पछयांण, किलैकि छुटा बट्टी बड़ा लुखुं तक, उ सभि स्वीकार कैरी दयाला कि मि ऊंको पिता परमेश्वर छों। 12 किलैकि मि ऊंका पापों तैं माफ कैरी दयुलु, अर ऊंका पापों तैं फिर याद नि करुलु।” 13 पिता परमेश्वर ल यु तैं एक नई प्रतिज्ञा बोलि, इलै वेल पैली वाचा तैं पुरणों कैरी; अर जु कुछ भि पुरणों छो अर घिसयूँ-पिटयूँ छो उ लुप्त हूंणु कु तैयार च। |
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.