इब्रानी 1 - गढवली नयो नियमनौंना कु स्वभाव 1 पुरणा बगत मा पिता परमेश्वर ल पुरणों बट्टी अर कई प्रकार ल परमेश्वर का तरपां बट्टी बुल्ण वलो का द्वारा बात कैरी, 2 पर यूं आखरी दिनों मा हम बट्टी अपड़ा नौंना का द्वारा बात कैरी। पिता परमेश्वर ल अपड़ा नौंना का द्वारा सैरी दुनिया की रचना कैरी अर सैरी सृष्टि कु वारिस ठैरे। 3 नौंनो ही पिता परमेश्वर की महिमा कु प्रकाश च, अर वेमा हम देख सकदा कि पिता परमेश्वर कन च, अपड़ा सामर्थी वचनों का द्वारा, उ वे सब तैं जु वेल बणै संभलदो; वेल लुखुं तैं ऊंका पापों बट्टी शुद्ध कैरी, अर वांका बाद स्वर्ग मा महिमामय पिता परमेश्वर का दैंणा विराजमान हवे। 4 इलै पिता परमेश्वर ल नौंना तैं एक इन नौं दींनि जु स्वर्गदूतों बट्टी भि भौत जादा महान च, जैका द्वारा हम देख सकदां कि नौंनो ऊं बट्टी भौत जादा महान च। यीशु स्वर्गदूतों बट्टी भि महान 5 परमेश्वर का वचन मा कभी कैल नि बतै कि पिता परमेश्वर ल उ सब कै स्वर्गदूत बट्टी बोलि, जु पिता परमेश्वर ल अपड़ा नौंना बट्टी बोलि, “तू मेरू नौंनो छै; आज मि त्वे तैं अपड़ा नौंना का रूप मा प्रगट करदु” अर फिर, पिता परमेश्वर ल इन अपड़ा कै भि स्वर्गदूत बट्टी नि बोलि, “मि वेको पिता बणलु, अर उ मेरू नौंनो बंणि जालो।” 6 अर यां से पैली कि, पिता परमेश्वर ल अपड़ा बड़ा महान अर पैला नौंना तैं दुनिया मा भेजि, त बुल्द, “पिता परमेश्वर का सभि स्वर्गदूत वे तैं दण्डवत् कैरी के वेकी आराधना कैरा।” 7 अर स्वर्गदूतों का बारा मा पिता परमेश्वर बुल्द, “स्वर्गदूत मेरा सेवक ही त छिनी, जु मि चौ त ऊं तैं ब्थौं, अर धधकती, आग का जन बणै सकदु।” 8 पर नौंना का बारा मा बुल्द, “हे परमेश्वर, तेरु राज्य हमेशा तक बणयूँ रौ, उ अपड़ा राज्य का मथि न्याय से राज्य करद। 9 तू अच्छा कामों तैं कन वला दगड़ी प्रेम करदी पर अधर्म का कामों बट्टी नफरत करदी; यु ही कारण मि, तेरु पिता परमेश्वर ल, तेरु परमेश्वर बट्टी, त्वे तैं तेरु दगड़ियों का बीच मा चुणि अर जैतून का तेल बट्टी तेरु अभिषेक कैरी।” 10 पिता परमेश्वर यु भि बुल्द कि, हे प्रभु, शुरुआत मा तिल दुनिया की रचना कैरी, अर तिल उ सभि कुछ बणै जु आसमान मा च। 11 उ त खत्म हवे जाला; पर तू हमेशा ज्यूँदो रैलि अर उ सभि कपड़ोंं का जन पुरणा हवे जाला। 12 अर तू ऊं तैं चदरा का जन लपेटैली, अर उ “कपड़ोंं का जन बदली जाला; पर तू नि बदलली अर तू हमेशा ज्यूँदो रैलि।” 13 अर पिता परमेश्वर ल अपड़ा कै स्वर्गदूत बट्टी बोलि, “तू मेरा दैंणा हथ जु सम्मान की जगह च पर विराजमान हो, जब तक कि मि तेरु दुश्मनों तैं पूरा ढंग से तेरु अधीन नि कैरी द्यो” 14 तब, स्वर्गदूतों कु हूंणो को क्य फैदा? स्वर्गदूत उ छिनी जु पिता परमेश्वर की सेवा करदींनि; जु पिता परमेश्वर ऊं तैं ऊं लुखुं की देखभाल कनु कु भिजद जु उद्धार पांण वला छिनी। |
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.