गलातियों 4 - गढवली नयो नियम

मसीह मा परमेश्वर का आजाद नौंना

¹ मि यु समझदु, कि एक अमीर मनिख कु एक नौंनो च। जब तक उ छुटो बच्चा च, तब तक वेमा अर एक दास का बीच मा कुई फर्क नि हूंद, जबकि उ एक बगत बाद अपड़ा बुबा की पूरी सम्पत्ति कु मालिक बंणि जालो।

² जब तक पिता परमेश्वर का द्वारा तय करयूँ बगत नि आंद, तब तक उ नौंनो अपड़ा रक्षकों अर अधिकारियों का अधीन रौंद।

³ उन ही हम भि, बच्चों का जन छा, त हम ऊं रीति-रिवाजों अर नियमों का गुलाम छा जु यु दुनिया मा छा।

⁴ पर जब उ बगत आलो ज्यां कि योजना पिता परमेश्वर ल बंणै छै, त पिता परमेश्वर ल खुद अपड़ा नौंना तैं ईं दुनिया मा भेजि, अर जनन ल वे तैं पैदा कैरी, अर उ एक यहूदी का रूप मा पैदा हवे अर व्यवस्था का अनुसरण करदी रै।

⁵ कि उ हम तैं छुड़ै साको, जु मूसा की व्यवस्था का अधीन रौंदा छा, अर वेल हम तैं अपड़ा ही नौंना का रूप मा खुचिली लै लींनि।

⁶ अर किलैकि हम वेकी संतान छा, इलै कि परमेश्वर ल अपड़ा नौंना कि पवित्र आत्मा तैं हमारा हृदय मा भेजि, जु आत्मा परमेश्वर तैं “हे बुबा, हे पिता बोलि के धै लगान्दो च।”

⁷ इलै, हम अब गुलाम नि छा, पर हम पिता परमेश्वर का नौंना बंणि ग्यां; अर इलै, उ हम तैं सभि कुछ दयालो जु कुछ वेल अपड़ा बच्चों कु रख्युं च।

मण्डलि कु पौलुस की चिन्ता

⁸ जब तुम पिता परमेश्वर तैं नि जंणदा छा, तुम वे बगत ऊं देबतों का दास छा, जु असली मा परमेश्वर छैं ही नि छिनी।

⁹ पर जब तुम पिता परमेश्वर का दगड़ी जुड़ीं ग्यां, अर पिता परमेश्वर ल हम तैं अपड़ा नौंना का रूप मा स्वीकार कैरी, त फिर तुम कमजोर अर निर्बल आदि शिक्षाओं का दास बनण कु किलै लौटणा छा? क्य तुम तैं दुबरा ऊंको ही दास बनणै की लालसा च?

¹⁰ तुम लोग कुछ खास दिनों या मैना या मौसमों या बरसों कु पालन कैरी के पिता परमेश्वर का पक्ष कनु कु यत्न कना छा।

¹¹ जु कुछ तुम कना छा वेका कारण मि परेशान छों कि जु मेहनत मिल तुम कु कैरी उ बेकार नि ठैरु।

¹² हे विश्वासी भयों, मि तुम बट्टी बिनती कनु छौं, अपड़ा आप तैं व्यवस्था बट्टी आजाद कैरा जन मिल कैरी, किलैकि मि व्यवस्था बट्टी उन ही आजाद हवे ग्यां जन तुम अन्यजाति स्वतंत्र हुयां तुम ल मेरी अच्छी देखभाल कैरी।

¹³ पर तुम तैं याद होलो, कि यु मेरी बिमारी का कारण छो कि मि पैली बार तुम मा ओ अर शुभ सन्देश प्रचार कैरी।

¹⁴ अर जबकि मेरी बिमारी तुम कु एक परेशानी छै, पर फिर भि तुम ल मि बट्टी घृणा नि कैरी अर न मि तैं दूर कैरी; पर तुम ल मि तैं उन ही स्वीकार कैरी जन तुम खुद यीशु मसीह तैं स्वीकार करदा छा, मांणा मि पिता परमेश्वर कु एक स्वर्गदूत छो, जन तुम अफ यीशु मसीह तैं स्वीकार करदा।

¹⁵ वे बगत तुम भौत खुश छा! तुम्हरी उ खुशी अब कख च? मि सच मा यु बोलि सकदु छों कि, तु मि कु सब कुछ बलिदान कैरी दींद, यख तक की अपड़ा आँखों तैं भि।

¹⁶ त क्य बट्टी तुम सच बुल्णा का कारण मि अब इन छों कि तुम मि तैं अपड़ो दुश्मन समझदियां?

¹⁷ झूठा शिक्षक बुल्दा त छिनी हम तुम तैं दगड़िया त बनांण चांणा छा, पर भलि इच्छा बट्टी न; ऊंको मतलब त तुम तैं मि बट्टी अलग कन च कि तुम ऊंका चेला बंणि जां।

¹⁸ हमेशा ही भला उद्देश्य कु खुश हूंण अच्छो हूंद अर भस वे ही बगत न, जब मि तुम दगड़ी रौंदु।

¹⁹ हे मेरा प्रियों, जन एक जनन प्रसव का बगत दर्द महसूस करदी, उन ही के मि एक बार फिर तुम कु पिड़ा सौणु छो। मि ईं पिड़ा मा तब तक रौलु जब तक तुम मसीह मा मजबूत नि हवे जणदां।

²⁰ मि भौत चांदु छों कि अब तुम दगड़ी रौं, कि मि तुम बट्टी नम्र ढंग बट्टी बात कैर साको। किलैकि मि तुमारा प्रति भौत परेशान छौं।

द्वी प्रतिज्ञा : सारा अर हाजिरा

²¹ अर तुम जु मूसा द्वारा लिखीं परमेश्वर की व्यवस्था का अधीन हूंण चांणा छा! मेरी बात सूंणा! मि तुम तैं बतौलु कि मूसा की व्यवस्था की किताब मा क्य लिख्युं च।

²² पिता परमेश्वर का वचन मा लिख्युं च, कि अब्राहम का द्वी नौंना छा; वेका एक नौंना कु जन्म हाजिरा बट्टी हवे छो, ज्वा एक दासी छै अर दुसरा नौंना कु जन्म सारा बट्टी हवे छो, ज्वा वेकी जनन छै।

²³ पर दासी कु नौंनो, मनिख जाति की इच्छा का अनुसार साधारण नौंना का जन पैदा हवे छो पर वेकी जनन बट्टी पैदा हुयुं नौंना कु जन्म खुद पिता परमेश्वर की करार तैं पूरो कनु कु हवे छो।

²⁴ या मिसाल कुछ और सिखांद; यु द्वी जनन (सारा अर हाजिरा) पिता परमेश्वर अर वेका लुखुं का बीच द्वी नियमों का जन छिनी। जु पिता परमेश्वर ल सीनै डांडा पर कैरी, अर जु लोग ईं करार का अधीन छिनी, उ नौकरों का जन छिनी। उ अरब मा सीनै डांडा का जन छिनी अर उ धरती पर यहूदी कु यरूशलेम शहर की एक तस्वीर च। यु शहर अर येका लोग, मतलब यहूदी, व्यवस्था दास छिनी।

²⁵ आज भि यरूशलेम शहर का लोग पिता परमेश्वर का दगड़ी सै ठैरयां जांण कु यहूदी व्यवस्था कु पालन कना का कारण दास छिनी। उ हाजिरा का जन दास छिनी जु अरब देश का सीनै डांडा पर बंधि करार तैं बतौंदींनि।

²⁶ पर स्वर्गीय यरूशलेम अब्राहम की जनन सारा का जन छिनी, अर वेका नौंना गुलाम नि छिनी। यु यरूशलेम हमारी ब्वे का जन च, जु विश्वास करद।

²⁷ किलैकि पिता परमेश्वर का वचन मा लिख्युं च, “हे बांझ जनन, तु जींल कभी भि बच्चा तैं जन्म नि दींनि, तिल बच्चा का दर्द की पिड़ा तैं अनुभव नि कैरी; आनन्द बट्टी पुकार अर ऊंची आवाज बट्टी चिल्लो, किलैकि उ जनन जैका आदिम का वीं तैं छोड़ द्ये की सन्तान, वीं जनन की सन्तान, जु अपड़ा आदिम का दगड़ी रौंदी, वीं जनन की सन्तान बट्टी जादा च।”

²⁸ हे विश्वासी भयों, अब्राहम कु नौंनो इसहाक का जन जु पिता परमेश्वर की करार का अनुसार पैदा हवे छों, हम भि वीं करार का अनुसार पिता परमेश्वर की सन्तान बंणि ग्यां।

²⁹ पर अब तुम तैं ऊं लुखुं का द्वारा सतै जांणु च जु चांणा छा कि तुम मूसा की व्यवस्था कु पालन कैरा, उ ही जन इश्माएल ल, मतलब मनिख इच्छा बट्टी पैदा हुयां नौंना ल इसहाक तैं, मतलब आत्मा की सामर्थ बट्टी पैदा हुयां नौंना तैं सतै।

³⁰ पर पिता परमेश्वर का वचन क्य बुल्द कि, “दासी जनन अर वेका नौंना तैं दूर भेजि द्ये, किलैकि दासी कु नौंनो अब्राहम की जायदात को हकदार नि होलो, बल्कि जु वेकी जनन बट्टी पैदा हवे छो उ जायदात को हकदार होलो”

³¹ इलै हे मेरा विश्वासी भयों, हम दासी जनन का बच्चा नि छा, जौं तैं मूसा की व्यवस्था तैं मनणु जरूरी च। पर हम वीं जनन का बच्चा छा, जु बुबा की जनन च अर अपड़ा विश्वास का कारण पिता परमेश्वर तैं ग्रहणयोग्य च।