खास चेलों 25 - गढवली नयो नियम

फेस्तुस का संमणी

¹ फेस्तुस राज्यपाल का रूप मा यहूदिया प्रान्त मा अयां तीन दिन हवीनि, फिर उ कैसरिया शहर बट्टी यरूशलेम शहर कु चलि गै।

² वे बगत प्रधान याजक ल, अर यहूदी अगुवों ल, अर पौलुस का खिलाफ मुकदमा द्ये।

³ अर वे बट्टी बिनती कैरी के पौलुस तैं यरूशलेम शहर मा बुलै, किलैकि उ वे तैं बट्टा मा ही मरणै कि ताक मा छा।

⁴ पर फेस्तुस ल जवाब दींनि, “पौलुस कैसरिया शहर कि जेल मा कैदी च, अर मि खुद जल्द उख जौलु।

⁵ तुम मा जु खास आदिम छिनी उ मि दगड़ी ऐ सकदींनि, अर जु यु आदिम ल कुई गलत काम कैरी हो त तभि वे पर भंगार लगयां।”

⁶ फेस्तुस कुई आठ दस दिन यरूशलेम शहर मा रै के कैसरिया शहर कु लौटि गै, हैंका ही दिन न्याय आसण पर बैठी के पौलुस तैं लौंणे कि आज्ञा दींनि।

⁷ जब पौलुस ऐ, त जु यरूशलेम शहर बट्टी यहूदी अगुवा ऐ छा, उ वेका चौतरफी खड़ा हवे के वे पर भौत बुरा-बुरा भंगार लगैनी, जौं को उ सबूत भि नि दे सकदा छा।

⁸ पर पौलुस ल जवाब दींनि, “मिल न त यहूदियों की व्यवस्था तैं अर न यरूशलेम शहर का मन्दिर को, अर न कैसर का विरुद्ध कुई अपराध कैरी।”

⁹ तब फेस्तुस ल यहूदी अगुवों तैं खुश कने कि मनसा ल पौलुस बट्टी पूछि, “क्य तु चांणि छै कि यरूशलेम शहर कु जां; अर उख मेरा संमणी तेरु न्याय किये जौं?”

पौलुस कु कैसर तैं दुहाई दींण

¹⁰ पौलुस ल बोलि, “मि कैसर का न्याय आसण का संमणी खड़ो छो; अर मेरी पेशी को न्याय इख ही हूंण चयणु च। जन कि तू भि ठिक ढंग ल जंणदी छै कि मिल यहूदियों का विरोध मा कुई अपराध नि कैरी।

¹¹ जु मि अपराधी छौं अर जु मिल मृत्यु दण्ड लैक कुई अपराध करयूं च, त मि तैं मृत्यु दण्ड स्वीकार च; जु यूं यहूदियों का द्वारा लगयां अपराध सै नि च, त कै तैं भि यु अधिकार नि च कि उ मि तैं यूं तैं सौंपी द्यो। मेरी बिनती च कि मेरू न्याय खुद कैसर का द्वारा किये जांण चयणु च।”

¹² तब फेस्तुस ल मंत्रियों कि सभा दगड़ी बात कैरी के जवाब दींनि, “तिल कैसर का द्वारा न्याय किये जांणै की मांग कैरी, तब तिल अब कैसर मा ही जांण।”

अग्रिप्पा का संमणी पौलुस

¹³ कुछ दिनों का बाद राजा अग्रिप्पा अर वेकी छुटी बैंण बिरनीके कैसरिया शहर मा ऐ, कि फेस्तुस राज्यपाल का दगड़ी मुलाकात कैरो।

¹⁴ उ उख भौत दिन तक रैनी फेस्तुस ल पौलुस को मामला राजा तैं बतै, “यख एक आदिम च जै तैं फेलिक्स ल कैदी बणै के छोड़ी येले।”

¹⁵ जब मि यरूशलेम शहर मा छौं उख प्रधान याजक ल अर यहूदी दाना-सयाणों ल मि पर भंगार लगै, अर ऊं मि तैं मृत्यु दण्ड दींणै की मांग कैरी।

¹⁶ “पर मिल ऊं तैं जवाब दींनि, कि रोमियों कि या रीति नि, कि कै भि आदिम तैं दण्ड कु सौंपी द्ये, कि भंगारी तैं न्यायधीश का संमणी अपड़ा भंगार लगांण वलो का संमणी मुलाकात हो कि भंगारी तैं जवाब दींणु को मौका मिलो ज्यांको वे पर भंगार लग्युं हो।

¹⁷ इलै जब यहूदी अगुवा मि दगड़ी इख कैसरिया शहर मा ऐनी, त मिल जरा भि अबेर नि कैरी, पर दुसरा ही दिन न्याय आसण पर बैठी के आज्ञा दींनि, पौलुस तैं अदालत मा लै के आवा।

¹⁸ जब वेका विरोधी खड़ा हवीनि त तब ऊंल इथग बुरी बातों को भंगार नि लगै जथग कि मि सुचणु छौं।

¹⁹ पर ऊंका बीच अपड़ा धर्म तैं लै के अर यीशु नौं को एक आदिम का बारा मा कुछ झगड़ा छो, जु मोरि गै छो; पर पौलुस दावा कनु च कि उ ज्यूँदो च।

²⁰ किलैकि मि तैं पता नि छो, यूं बातों की खोज कनके कैरू, इलै मिल पौलुस तैं पूछि, क्य तु यरूशलेम शहर जैलि कि उख यूं बातों को न्याय कन चयणु च?

²¹ पर जब पौलुस ल बिनती कैरी, वेकी जांच खुद कैसर का द्वारा करये जांण चयणु च; त मिल आज्ञा दींनि, कि जब तक वे तैं कैसर मा नि भेजि दियुं, वेकी रखवली किये जौं।”

²² तब राजा अग्रिप्पा ल फेस्तुस बट्टी बोलि, “मि भि वे आदिम कि सुनण चांणु छों” तब फेस्तुस राज्यपाल ल बोलि, “तु भोल सूंणि लीली।”

²³ इलै दुसरा दिन, राजा अग्रिप्पा अर छुटी बैंण बिरनीके बड़ी धूम-धाम ल कि सिपैयूं का दल का सेनापतियों अर शहर का खास आदिमों का दगड़ी कचहरी मा पौंछिन। जब फेस्तुस ल आज्ञा दींनि, कि वे पौलुस तैं लै आवा।

²⁴ फेस्तुस ल बोलि, “हे राजा अग्रिप्पा अर सैरा लुखुं जु इख हम दगड़ी छिनी, तुम यु आदिम तैं दिखणा छा, जैका बारा मा सैरा यहूदियों ल यरूशलेम शहर मा अर इख भि चिल्लै-चिल्लै के हम बट्टी बिनती कैरी की येको ज्यूँदो रांण ठिक नि च।

²⁵ पर मि जांणि ग्यों कि येल इन कुछ भि नि कैरी जु कि मरै जौं; अर जब वेल खुद ही कैसर बट्टी बिनती कैरी, त मिल वे तैं रोम शहर मा भिजणै की ठांणी दींनि।

²⁶ पर मि तैं वेका बारा मा कुछ भंगार नि मिली जु मि कैसर तैं लिख साको, इलै मि यु तैं तुम्हरा संमणी अर खास कैरी के हे राजा अग्रिप्पा तेरु संमणी लै के अयुं छों, कि जांच का बाद मि तैं कुछ लिखणु कु मिलो।

²⁷ किलैकि कैदी तैं भिजण अर जु भंगार वे पर लगै गैनी, ऊं तैं नि बतयां, मि तैं यु ठिक नि लगणु च।”