खास चेलों 13 - गढवली नयो नियम

बरनबास अर शाऊल को भिजे जांण

¹ अन्ताकिया शहर का विश्वासियों की मण्डलि मा कई परमेश्वर का तरपां बट्टी बुल्ण वला अर कई शिक्षक छा। उ शिक्षक बरनबास अर शमौन, जैको दुसरो नौं नीगर भि छो, अर लूकियुस कुरेनी, अर देश का चौथाई भाग का हेरोदेस राजा को मुहबोला भैय जु दगड़ी बड़ा हवीनि मनाहेम, अर शाऊल।

² जब उ उपवास मा रै के पिता परमेश्वर की आराधना कना छा, त पवित्र आत्मा ल बोलि, “मि कु बरनबास अर शाऊल तैं वीं सेवा कु अलग कर जै कु मिल ऊं तैं बुलै।”

³ तब ऊंल उपवास अर पिता परमेश्वर बट्टी प्रार्थना कैरी के शाऊल अर बरनबास का मुंड मा हथ रखि के ऊं तैं पिता परमेश्वर की सेवा कु भेजि दींनि।

पौलुस की पैली प्रचार यात्रा

⁴ इलै शाऊल अर बरनबास पवित्र आत्मा का द्वारा अन्ताकिया शहर बट्टी सिलूकिया बंदरगाह तक भिजै गैनी; अर उ उख बट्टी समुद्री जहाज मा बैठी के साइप्रस टापू का सलमीस बंदरगाह कु चलि गैनी।

⁵ अर सलमीस शहर मा पौंछि के, पिता परमेश्वर का वचन यहूदियों का मिलणा का भवन मा जै के सुनांण लगि गै; अर यूहन्ना मरकुस वेकी मदद कनु कु वे दगड़ी छा।

⁶ यांका बाद ऊंल पूरा टापू बट्टी हवे के पाफुस शहर मा पौंछि गैनी। उख ऊंकी मुलाकात बार-यीशु नौं का एक यहूदी जादूगर का दगड़ी हवे, जु झूठो दावा करदो छो की उ परमेश्वर का तरपां बट्टी बुल्ण वला च।

⁷ उ सिरगियुस शाऊल का दगड़ी भि काम करदो छो जु वे द्वीप को राज्यपाल छो, जु बुद्धिमान आदिम छो। वे राज्यपाल ल बरनबास अर शाऊल तैं बुलै के पिता परमेश्वर को वचन सुनांण चाहे।

⁸ पर जादूगर बार-यीशु जै को यूनानी नौं इलीमास छो, अर ऊंको विरोध कैरी के वे राज्यपाल तैं प्रभु यीशु पर विश्वास कन से रुकण चाहे।

⁹ तब शाऊल ल जैको नौं पौलुस भि च, पवित्र आत्मा बट्टी पूर्ण हवे के इलीमास जादूगर का तरपां गौर से देख के बोलि,

¹⁰ “हे कपटी अर चकड़ैति ल पूर्ण शैतान की सन्तान, अर हर एक अच्छी बातों को भि दुश्मन छै, क्य तू प्रभु का सीधा रस्ता तैं टेढ़ा कन नि छुड़ली?

¹¹ अब प्रभु त्वे तैं सजा दयालो; तू थोड़ा बगत तक कु अंधो हवे जाली अर सूरज का उज्यला तैं नि देख सकली।” तब एकदम वेकी आँखों का संमणी अंधेरो हवे गै, अर फिर उ लाचार हवे के इने-उनै ढुंढण लगि गै कि कुई वेको हथ पकड़ी के वेकी मदद कैरो।

¹² तब राज्यपाल ल जु कुछ हवे छो, देखि के अर प्रभु का उपदेश बट्टी चकित हवे के वेल प्रभु यीशु पर विश्वास कैरी।

पिसिदिया प्रदेश का अन्ताकिया शहर मा

¹³ पौलुस अर वेका दगड़िया पाफुस शहर बट्टी समुद्री जहाज मा यात्रा शुरू कैरी, अर पंफूलिया प्रदेश का पिरगा शहर मा जै के पौंछि गैनी; अर यूहन्ना मरकुस ऊं तैं छोड़ी के यरूशलेम शहर कु वापिस ऐ गै।

¹⁴ अर पिरगा शहर बट्टी अगनैं बढ़ि के गलातिया प्रान्त का पिसिदिया जिला का नजदीक अन्ताकिया शहर मा पौछिनी; अर यहूदियों को विश्राम को दिन यहूदियों का मिलणा का भवन मा जै के बैठी गैनी।

¹⁵ मूसा द्वारा लिखीं परमेश्वर की व्यवस्था अर परमेश्वर का तरपां बट्टी बुल्ण वलो की किताब बट्टी पढ़ण का बाद यहूदियों का मिलणा का भवन को सरदारों ल ऊंमा संदेश भेजि, “हे विश्वासी भयों, जु लुखुं का उत्साह कु तुम्हरा मन मा कुई बात हो त बोला।”

¹⁶ तब पौलुस ल खड़ो हवे के अर हाथ बट्टी इशारा कैरी के ऊं तैं शान्त कैरी के बोलि, हे इस्राएलियों, अर पिता परमेश्वर बट्टी डरण वलो अन्यजातियों, सूंणा!

¹⁷ यूं इस्राएलियों का पिता परमेश्वर ल हमारा पूर्वजों तैं चुणि, अर जब यु मिस्र देश मा परदेशी हवे के रौंदा छा, तब ऊंकी गिणती मा उन्नति हवे; अर पिता परमेश्वर ल ऊं तैं मिस्र देश बट्टी बड़ी महान सामर्थ ल भैर निकली।

¹⁸ अर उ कुई चालीस साल तक एकांत जंगल मा ऊं तैं सहन कनु रै, जबकि ऊंल बार-बार ऊंका हुकुम को अणबुलयूं कैरी।

¹⁹ अर पिता परमेश्वर ल कनान देश मा सात अन्य-जाति को नाश कैरी के हमारा पूर्वजों का कब्जा मा कैरी दींनि।

²⁰ हमारा पूर्वजों ल ऊंका पूर्वजों का मिस्र देश मा पौंछि जांण तक लगभग चार सौ पचास साल बाद कनान पर अधिकार कन शुरू कैरी; “पिता परमेश्वर का तरपां बट्टी बुल्ण वला शमूएल तक इस्राएल का लुखुं पर राज्य कनु कु अगुवा नियुक्त करिनि।

²¹ जब शमूएल अभि तक ऊंको अगुवा ही छो, तब ऊंल एक राजा की माँग कैरी, त पिता परमेश्वर ल बिन्यामीन का गोत्र मा एक मनिख, मतलब कीश का नौंना शाऊल तैं ऊंल राजा बणये, अर वेल इस्राएली लुखुं पर चालीस साल तक शासन कैरी।

²² फिर पिता परमेश्वर ल शाऊल तैं राजा की गद्दी बट्टी हटै के राजा दाऊद तैं ऊंको राजा बणै; जैका बारा मा वेल गव्है दींनि, मि तैं एक आदिम, यिशै को नौंनो राजा दाऊद, जु मेरा मन का अनुसार च मिली गै उ ही मेरी सैरी इच्छा तैं पूरी करलो।”

²³ वेका ही वंश मा बट्टी पिता परमेश्वर ल अपड़ी सौं का अनुसार इस्राएलियों मा एक उद्धारकर्ता, मतलब यीशु तैं भेजि।

²⁴ जैका आंण से पैली यूहन्ना ल सभि इस्राएलियों तैं अपड़ा पापों को पश्चाताप कनु अर पिता परमेश्वर की तरपां मुड़णु अर बपतिस्मा लींणे की जरूरत च।

²⁵ अर जब यूहन्ना अपड़ी सेवा पूरी कन पर छो, त वेल बोलि, “तुम कि सुचदियां की मि कु छो? मि मसीह नि छो; पर देखा, जु मेरा बाद एक आंण वलो च, उ मि बट्टी भौत जादा महान च अर मि यु योग्य भि नि छो कि वेका जुत्ता का तस्मों तैं खोल साको।”

²⁶ “हे विश्वासी भयों, तुम जु अब्राहम की सन्तान छा; अर पिता परमेश्वर बट्टी डरण वलो अन्यजाति लुखुं, सूंणा, पिता परमेश्वर ल हम मा यीशु का बारा मा यु सन्देश भेजि कि जु लुखुं तैं ऊंका पापों बट्टी उद्धार कनु कु अयुं च।”

²⁷ यरूशलेम शहर का लुखुं ल अर ऊंका अगुवों ल यीशु मसीह तैं नि पछयांणी अर ऊंल पिता परमेश्वर का तरपां बट्टी बुल्ण वला लुखुं का ऊं वचनों तैं नि समझी जौं तैं उ हर यहूदियों को विश्राम को दिन पढ़दा छा; इलै ऊंल बोलि यीशु मौत का लैक च अर इन कै पिता परमेश्वर का तरपां बट्टी बुल्ण वला लुखुं का वचनों तैं पूरो कैरी।

²⁸ ऊंल मारि डलणा का योग्य कुई भंगार वेमा नि पै, फिर भि राज्यपाल पिलातुस बट्टी बिनती कैरी, कि उ मरै जौं।

²⁹ अर जब ऊंल उ सब कैरी जु पिता परमेश्वर के वचन मा लिखै गै छो, ज्यांमा वे तैं वे सूली पर मुरण शामिल छो जु उ उठै के लीगि छो।

³⁰ पर पिता परमेश्वर ल वे तैं मुरयां मा बट्टी फिर से ज्यूँदो कैरी,

³¹ अर उ ऊं तैं जु वे दगड़ी गलील प्रदेश बट्टी यरूशलेम शहर ऐ छा, भौत दिनों तक अपड़ा शिष्यों तैं दिखै दींणु रै; यु उ ही च जु हम यहूदियूं कु गवाह च।

³² अर हम तुम तैं वीं सौं का बारा मा जु हमारा पुरणो बट्टी पिता परमेश्वर ल कैरी छै, यु शुभ सन्देश प्रचार सुनांणा छा।

³³ पिता परमेश्वर ल यीशु तैं मुरयां बट्टी ज्यूँदो कैरी, उ ही वादा वेल ऊंका वंशजों कु पूरा कैरी। जन कि भजन संहिता की किताब वेका दुसरा संख्या मा नौंनो का बारा मा पिता परमेश्वर ल बोलि, “कि तू मेरू नौंनो छै अर आज बट्टी मि तेरु बुबा बंणि ग्यूं”

³⁴ पिता परमेश्वर ल अपड़ा वचन मा वे तैं मुर्दों मा बट्टी ज्यूँदो अर कभी भि नि सड़ण का बारा मा बोलि। पिता परमेश्वर ल बोलि, “मि त्वे तैं पवित्र अर पक्की आशीष दियुलु, जैको वादा मिल दाऊद राजा बट्टी कैरी छो”

³⁵ इलै दाऊद राजा ल एक और भजन मा भि लिखीं, “तू अपड़ा पवित्र आदिम तैं सड़ण नि दीलि”

³⁶ दाऊद राजा त पिता परमेश्वर की इच्छा का अनुसार अपड़ा बगत मा सेवा कैरी के मोरि गै, अर अपड़ा पुरणों का दगड़ी खडै गै, अर वेकी देह सैड़ी भि गै। यां बट्टी हम जणदां कि दाऊद राजा यु भजन मा अपड़ा बारा मा बात नि कनु च।

³⁷ पर उ यीशु का बारा मा बात कनु च, जै तैं पिता परमेश्वर ल मुर्दों मा बट्टी ज्यूँदो कैरी, अर उ सैड़ी नि सकदु।

³⁸ इलै, हे विश्वासी भयों; तुम जांणि ल्या कि यीशु का द्वारा पापों की माफी को शुभ संदेश तुम तैं दिए गै अर जूं बातों बट्टी तुम मूसा की व्यवस्था का द्वारा निर्दोष नि ठैरे सकदा छा।

³⁹ पर व व्यवस्था ऊं लुखुं कु यीशु पर विश्वास कना का द्वारा निर्दोष ठैरदींनि।

⁴⁰ इलै चौकस रावा, इन नि हो, कि जु परमेश्वर का तरपां बट्टी बुल्ण वलो का तरपां बट्टी किताब मा लिख्युं च, तुम पर भि ऐ जौं।

⁴¹ ऊंल बोलि, “हे निंदा कन वलो, देखा, अर चकित व, अर मोरि हवे जावा! किलैकि मि तुम्हरा दिनों मा एक काम करुलु; जैका बारा मा जु कुई तुम बट्टी वेका बारा मा बात करलो, त तुम कभी विश्वास नि करला”

⁴² जब पौलुस अर बरनबास मन्दिर बट्टी निकलणा छा, तब लोग ऊं बट्टी बिनती कन लगिनि, कि हैंका यहूदियों को विश्राम को दिन हम तैं यु बात फिर सुणये जौं।

⁴³ अर जब यहूदियों का मिलणा का भवन मा बट्टी यहूदी सभा उठि गै त यहूदियों अर यहूदी मत मा बदलियां अन्यजाति भक्तों मा बट्टी बहुत सा पौलुस अर बरनबास का पिछनै हवे गैनी; अर ऊंल पौलुस अर बरनबास बट्टी बात कैरी के समझै, कि पिता परमेश्वर की कृपा मा बणयां रा।

पौलुस का द्वारा अन्यजातियों मा प्रचार की शुरुआत

⁴⁴ हैंका हफ्ता यहूदियों को विश्राम को दिन शहर का लगभग सभि लोग पिता परमेश्वर को वचन सुनणु कु कठ्ठा हवीनि।

⁴⁵ पर यहूदी अगुवा भीड़ तैं देखि के रमसे गैनी, अर अपमान कैरी के पौलुस की बातों का विरोध मा बुल्ण लगि गैनी।

⁴⁶ तब पौलुस अर बरनबास ल निडर हवे के बोलि, “जरूरी छो, कि पिता परमेश्वर को वचन पैली तुम तैं सुणये जांदु; किलैकि जब तुम वे तैं मना कैरी दींद, अर अफ तैं अनन्त जीवन का योग्य नि ठैरांदा, त अब, हम अन्यजाति लुखुं मा जौला।”

⁴⁷ किलैकि प्रभु ल हम तैं य आज्ञा द्ये, “मिल त्वे तैं अन्य-जाति लुखुं कु उज्यलो ठैरे, कि तुम तैं दुनिया मा हर जगह लुखुं तैं उद्धारकर्ता का बारा मा बतांण चयणु च”

⁴⁸ यु सूंणि के अन्यजाति लोग भौत खुश हवीनि, अर पिता परमेश्वर का वचन की बड़ै कन लगि गैनी, अर जथग अनन्त जीवन कु ठैरिनि, ऊंल विश्वास कैरी।

⁴⁹ तब प्रभु को वचन वे सैरा मुल्क मा फैलण लगि गै।

⁵⁰ पर यहूदियों का अगुवों ल ऊंची कुल की भक्त जननों तैं अर शहर का खास आदिमों तैं भड़कै। अर पौलुस अर बरनबास का खिलाफ जुल्म किये के ऊं तैं अपड़ा इलाका बट्टी भैर निकाली दींनि।

⁵¹ तब पौलुस अर बरनबास ल ऊंका संमणी खुट्टों की धूल उखि झाड़ी दींनि, ऊं तैं यु दिखांणु कु कि पिता परमेश्वर ल ऊं तैं अस्वीकार कैरेले छो अर ऊं तैं दंड दयालो; फिर उ इकुनियुम शहर कु चलि गैनी।

⁵² अर अन्ताकिया शहर मा चेला खुशी ल अर पवित्र आत्मा बट्टी भुरदी गैनी।