खास चेलों 11 - गढवली नयो नियमपतरस का द्वारा अपड़ा कामों तैं बतांण 1 फिर प्रेरितों ल अर विश्वासी भयों ल जु यहूदिया प्रान्त मा छा, ऊंल सूंणि कि अन्यजातियों ल पिता परमेश्वर का वचन तैं मनणु लगि गैनी। 2 अर जब पतरस ऊंमा यरूशलेम शहर मा ऐ, त यहूदी विश्वासी लोग जु को खतना हुयुं छो वे पर भंगार लगांण लगि गैनी, 3 कि “तिल अन्यजातियों का घौर मा जै के खांणु किलै खै?” 4 तब पतरस ल ऊं तैं शुरू बट्टी जु बात हवे छै सब पूरा ढंग से ऊं तैं सुणैनी। 5 “वेल बोलि जब मि याफा का नगर मा पिता परमेश्वर बट्टी प्रार्थना कनु छो, वे बगत मिल बेसुद हवे के देखि कि एक बड़ा चदरा का समान कुई चीज चारों तरपां बट्टी लटकी स्वर्ग बट्टी मूड़ी उतरी अर व ठिक मेरा संमणी ऐ। 6 अर जब मिल वे तैं ध्यान से देखि, वेमा धरती का सभि किस्म का पालतू, जंगली जानवर अर सब रिंगण वला गुरो, जीव-जन्तु अर आसमान का चलखुडा दिखिनि। 7 अर फिर मिल या आवाज सूंणि, ‘हे पतरस, उठ अर यूं तैं मारि के खा’ 8 पर मिल बोलि, ‘प्रभु, मिल कभी अपवित्र अर अशुद्ध चीजों तैं नि खै’ 9 तब दुसरी बार स्वर्ग बट्टी या आवाज ऐ, ‘जै तैं पिता परमेश्वर ल शुद्ध कैरेले, तू वे तैं अशुद्ध नि बोल’ 10 तीन बार इन ही हवे, वेका बाद सभि स्वर्ग मा खिंचे गै। 11 वे ही बगत कैसरिया नगर बट्टी एक आदिम जै को नौं कुरनेलियुस छो वेल एक आदिम तैं मि मा भेजि, तीन आदिम वे घौर का संमणी जख हम रुकयां छा पौंछि गैनी अर खड़ा हवे गैनी। 12 तब पवित्र आत्मा ल मि बट्टी बोलि, ‘बेझिझक हवे के यूं दगड़ी जा’ फिर यु छह विश्वासी भैय भि मि दगड़ी एनि, अर हम वे आदिम का घौर का भितर अयां। 13 तब वेल हम तैं बतै, कि वेल एक स्वर्गदूत तैं अपड़ा घौर मा देखि, जैल ऊंमा बोलि, ‘तू कै तैं याफा नगर भेजि के शमौन जु पतरस कहलांद बुलौ। 14 उ त्वे तैं इन बात बतालो, जै बट्टी पिता परमेश्वर त्वे तैं अर तेरु पूरा परिवार तैं बचालो’ 15 जब मिल वे तैं यीशु का बारा मा बतै, तब पवित्र आत्मा ऊं पर ऐ, जन पैली हम पर ऐ। 16 तब मि तैं उ वचन याद ऐ जु यीशु ल हम बट्टी बोलि छो, कि यूहन्ना ल त पांणी ल बपतिस्मा दींनि, पर कुछ दिनों का बाद पिता परमेश्वर तुम दगड़ी रौंण कु पवित्र आत्मा तैं भिजलो। 17 इलै पिता परमेश्वर ल ऊं तैं यु वरदान दींनि, जु हम तैं प्रभु यीशु मसीह मा विश्वास कन से मिली; त मि कु छों जु पिता परमेश्वर का खिलाफ जौं? जब पिता परमेश्वर ल ऊं दगड़ी कुई भेदभाव नि कैरी, तब मि भि किलै कैरू?” 18 यु सूंणि के उ शांत हवे गै; अर ऊंल यु बोलि के पिता परमेश्वर की महिमा कैरी, “पिता परमेश्वर ल अन्यजातियों तैं यु वरदान दियूं च कि उ भि पापों तैं छोड़ी द्या अर अनन्त जीवन पै साका।” अन्ताकिया शहर मा शाऊल अर बरनबास 19 स्तिफनुस की हत्या का बाद, कई विश्वासियों ल यरूशलेम शहर तैं छोड़ी दींनि, अर उ घुमदी-घुमदी फीनीके प्रदेश, साइप्रस द्वीप अर सीरिया प्रदेश का अन्ताकिया शहर मा पौछिनी; पर यहूदी लुखुं तैं छोड़ी के कै और तैं पिता परमेश्वर का वचन नि सुणदा छा। 20 पर ऊंमा बट्टी थोड़ा ही विश्वासी साइप्रस द्वीप का रौंण वला अर कुरेनी शहर का रौंण वला छा, जब उ अन्ताकिया शहर मा छा यूनानी भाषा बुल्ण वला तैं प्रभु यीशु को शुभ सन्देश प्रचार कन लगि गैनी। 21 अर प्रभु को सामर्थ ऊं पर छो, अर भौत स अन्यजाति लुखुं ल ऊं की खबर पर विश्वास कैरी अर प्रभु यीशु तैं स्वीकार कैरी। 22 जब ऊंका बारा मा यरूशलेम शहर का विश्वासियों की मण्डलि ल सूंणि, तब ऊंल बरनबास तैं अन्ताकिया शहर मा भेजि। 23 बरनबास ल उख पौंछि के, उख लुखुं पर पिता परमेश्वर की दया देखि के खुश हवे गै, अर ऊं सभियूं तैं उपदेश द्ये कि तुम पूरा मन से पिता परमेश्वर पर विश्वास कनु कु मजबूत रावा। 24 बरनबास एक अच्छो आदिम अर विश्वास अर पवित्र आत्मा बट्टी भुरयां आदिम छो, वे तैं देखि के भौत लोग पिता परमेश्वर मा विश्वास कैरी के वेमा ऐ मिलिनि। 25 तब बरनबास अन्ताकिया शहर छोड़ी के शाऊल तैं ढुँढ़णु कु तरसुस शहर कु चलि गै। 26 अर जब उ वे तैं उख मिलिनि त वे तैं अफ दगड़ी अन्ताकिया शहर ले एनि। अर इन हवे कि शाऊल अर बरनबास अन्ताकिया शहर मा एक साल तक प्रभु यीशु का बारा मा मण्डलि का लुखुं तैं सिखाैंदी रैनी। तब पैली बार अन्ताकिया शहर मा चेला “मसीही” कहलै गैनी। 27 वे बगत कुछ विश्वासी जु पिता परमेश्वर का संदेश दींणवला छा यरूशलेम शहर बट्टी अन्ताकिया शहर मा एनि। 28 ऊंमा बट्टी एक पिता परमेश्वर का तरपां बट्टी बुल्ण वलो आदिम जै को नौं अगबुस छो, उ खड़ो हवे अर पवित्र आत्मा की सामर्थ बट्टी ऊं तैं बतै कि पूरी दुनिया मा अकाल पुडण वलो च; अर सच मा यु अकाल सम्राट क्लौदियुस का बगत मा पोड़ी। 29 तब विश्वासी चेलों ल फैसला कैरी, कि यहूदिया प्रान्त मा रौंण वला विश्वासी भैय-बैंणों तैं मदद कनु कु अपड़ी-अपड़ी कमै का अनुसार उ पैसा जमा कैरी के भिजुला। 30 ऊंल इन कैरी; अर बरनबास अर शाऊल का हथ अर विश्वासियों का पुरणा अगुवों का हथ दान भेजि। |
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.