खास चेलों 1 - गढवली नयो नियम

शुरुवात

¹ प्रिय थियुफिलुस मेरी पैली किताब मा मिल त्वे तैं ऊं सभि बातों का बारा मा बतै जौं तैं यीशु ल कन अर सिखांण शुरू कैरी स्वर्ग मा उठै जांण से पैली

² पर यांसे पैली की यीशु स्वर्ग मा पिता परमेश्वर का द्वारा उठै जांदु वेल अपड़ा बारह प्रेरितों तैं पवित्र आत्मा का सामर्थ ल आज्ञा द्ये जौं तैं वेल चुणि छो।

³ यीशु का दुख उठौंणा अर मौत का बाद भौत सैरा पक्का सबूतों का द्वारा अफ तैं ज्यूँदो दिखै अर चालिस दिनों तक उ प्रेरितों तैं दिखेंणु रैं अर परमेश्वर का राज्य कि बात कनु रैं।

पवित्र आत्मा की करार

⁴ एक बार जब उ दगड़ा मा छा त यीशु ल ऊं तैं आज्ञा दींनि कि “यरूशलेम शहर तैं नि छुड़यां पर वे दान की जग्वाल करयां जु मेरा पिता परमेश्वर ल तुम तैं दींण की करार कैरी च ज्यांका बारा मा तुम ल मि बट्टी पैली सूंणि येले।

⁵ यूहन्ना बपतिस्मा दींणवला ल त तुम तैं पांणी ल बपतिस्मा दींनि पर कुछ दिनों का बाद तुम तैं पवित्र आत्मा का द्वारा बपतिस्मा दिये जालो।”

⁶ अर बाद मा जब प्रेरित दुबारा यीशु बट्टी मिलींनि, त ऊंल यीशु मा पूछि “हे प्रभु क्य इस्राएलियों तैं आजाद कनु कु अर हमारा राज्य तैं दुबारा से आजाद कनु कु तेरु बगत ऐ गै?”

⁷ यीशु ल ऊंमा बोलि, “ऊं बगतों अर ऊं बातों तैं जनण किलैकि उ भस मेरा पिता परमेश्वर मा ही छिनी वे तैं तय कनु को अधिकार च यु तुम तैं जनणै की जरूरत नि च।”

⁸ पर जब पवित्र आत्मा तुम पर आलो तब तुम सामर्थ पैल्या अर यरूशलेम शहर, यहूदिया प्रान्त मा सामरिया प्रान्त मा अर सैरी धरती का छोड़ तक मेरी गव्है दीला।

यीशु को स्वर्गारोहण

⁹ इन बोलि के देखदी-दिखद पिता परमेश्वर ल यीशु तैं स्वर्ग मा ले लींनि अर एक बादल का कारण उ यीशु तैं और नि देख सकिनि।

¹⁰ वेका जांणा बगत जब उ स्वर्ग जनै दिखंणा छा त अचानक द्वी आदिम, सफेद कपड़ा पैरी के प्रेरितों का संमणी खड़ा हवेनि

¹¹ अर ऊंमा बोलि “हे गलील जिला का मनिख्युं तुम किलै खड़ो हवे के आकाश जनै दिखणा छा? यु उ ही यीशु च जै तैं पिता परमेश्वर ल तुम मा बट्टी स्वर्ग मा ली येलि ठिक इन ही के दुबारा आलो, जन के तुम ल वे तैं स्वर्ग मा जांण देखि।”

झुंड की पिता परमेश्वर बट्टी प्रार्थना

¹² जब द्वी आदिम चलि गैनी, तब सभि प्रेरित जैतून नौं का डांडा बट्टी जु यरूशलेम शहर बट्टी लगभग एक किलोमीटर की दूरी पर छो अर यहूदियों का विश्राम का दिन सीमित दूरी छै यरूशलेम वापिस ऐ गैनी।

¹³ जब उ शहर मा पौंछिनी त वीं मथि का कोठरी मा गैनी। यूं प्रेरित पतरस, यूहन्ना, याकूब, अन्द्रियास, फिलिप्पुस, थोमा, बरतुल्मै, मत्ती, हलफई को नौंनो याकूब, शमौन जु रोमी कानून को विरोधी छो अर याकूब को नौंनो यहूदा जु उख उपस्थित छा।

¹⁴ यु सभि जनन जु उख छै जौं ल यीशु की मदद कैरी छै, अर यीशु की ब्वे मरियम अर यीशु का भैय प्रेरित का दगड़ा अक्सर एकटक पिता परमेश्वर बट्टी प्रार्थना कन मा लगयां छा।

एक नयो प्रेरित को चुनाव

¹⁵ ऊं दिनों मा पतरस सभि विश्वासी भयों का बीच मा जु लगभग एक सौ बीस मनिख छा खड़ो हवे के बुल्ण लगि गै

¹⁶ “हे विश्वासी भयों, पवित्र आत्मा ल बहुत पैली राजा दाऊद का द्वारा यहूदा का बार मा बतये छो, जु कि यीशु तैं गिरफ्तार कन वला लुखुं को मार्ग दर्शने कन वलो बंणि गै यु जरूरी छो कि यहूदा का बारा मा परमेश्वर का वचन मा लिख्युं लेख पूरो हो।

¹⁷ जबकि उ हम मा बट्टी एक छो अर ई सेवा मा भागिदार भि हवे।

¹⁸ जन कि तुम जंणदा छा कि यहूदा ल एक पुंगड़ो मोल लींणु कु यीशु तैं धोखा दींण का अपड़ा बुरा काम कु मिल्यां पैसों को इस्तेमाल कैरी छो। उ उख ही भुयां लमडी और मोरि गै, वेको पुटगा फटी गै अर वेका सभि अंदडा भैर ऐ गै छा।

¹⁹ ई बात तैं यरूशलेम शहर का लोग जांणि गैनी अर इलै उ लोग वीं जगह कु ऊंकी भाषा मा हकलदमा यानि ल्वे कु पुगड़ा बुल्ण लगि गै।

²⁰ राजा दाऊद ल भजन संहिता की किताब मा लिख्युं च ‘वेको घौर उजड़ी जौं अर वेमा कुई नि बसो’ अर राजा दाऊद दुसरी जगह मा इन बुल्द, ‘अर वेको पद कुई और ले ल्यो’

^21-22 इलै यु जरूरी च की एक इन आदिम हमारा बीच मा बट्टी चुणै जौ यीशु मसीह का सभि कामों को गवाह हो प्रभु यीशु को यूहन्ना का बपतिस्मा बट्टी अर वेका हमारा बीच मा बट्टी स्वर्ग मा उठै जांण तक यु आदिम हमारा दगड़ी प्रभु यीशु का मुर्दों मा बट्टी ज्यून्दा हूंणो कु गवाह बणौ!”

²³ तब ऊंल द्वी मनिख्युं को सुझाव द्ये एक यूसुफ तैं जैकु नौं बरसब्बास छो जैकु नौं यूसतुस छो, अर हैंको मतियाह छो।

²⁴ अर या पिता परमेश्वर बट्टी प्रार्थना कैरी, “हे प्रभु तु जु सभियूं का मन तैं जंणदी छै इन प्रगट कैर कि यूं द्वीयूँ मा बट्टी तेरु कु चुणयूं।”

²⁵ इलै की उ ई सेवा कु अर मसीह का प्रेरिताई हूंणु कु जै तैं यहूदा छोड़ी के व मोरि गै अर वीं जगह चलि गै जख वे तैं हूंण चयणु छो।

²⁶ तब ऊंल ऊंका बारा मा चिट्टी डलिनि अर चिट्ठी मतियाह का नौं पर निकली। तब यु ऊं ग्यारा प्रेरितों का दगड़ी गिणेगे।