2 तीमुथियुस 3 - गढवली नयो नियमआखरी दिनों मा चितांण 1 तीमुथियुस, जु बात मि त्वे तैं अब बतौलु, वीं तैं ध्यान से सुनण कि आखरी दिनों मा यीशु मसीह का वापिस आंण से पैली भौत कठिन बगत आलो। 2 किलैकि लोग भस अफ बट्टी प्रेम कन वला, लोभि, डींगमार, घमण्डी, बुरै कन वला, ब्वे-बुबा को आज्ञा टलण वला, अन्यो कैरी कै धन कमौण वला, अपवित्र, मतलबी 3 दया-भाव नि कन वला, दूसरों तैं माफ नि कन वला, भंगार लगांण वला, असंयमि, निठुर, भलै को बैरी, 4 विश्वासघात कन वला, ढीट, घमण्डी, अर पिता परमेश्वर का ही न बल्कि सुख विलास बट्टी प्रेम चाहण वला हवे जाला। 5 उ इन बरतौ करला जन उ पिता परमेश्वर का सम्मान करदा हो, पर उ पिता परमेश्वर की सामर्थ तैं ऊंका बुरा जीवनों तैं बदलण से इंकार करला; इन लुखुं बट्टी बचा। 6 यूं मदि उ लोग छिन जु चुपचाप से घौरों मा घुसि जंदींनि, अर ऊं विश्वास मा कमजोर जननों तैं अपड़ा वश मा कैरी दींदिनि, जु पापों मा दबिं रौदींनि अर हरेक किस्मै कि लालसाओं का वश मा रौदींनि 7 उ हमेशा नई चीज सिखणा रौन्दींनि पर उ मसीह का बारा मा सच्ची शिक्षाओं तैं कभी नि समझ सकदींनि। 8 यु झूठा शिक्षक, सच्चा संदेश को प्रचार कन से रुकदींनि, जन यन्नेस अर यम्ब्रेस ल मूसा को विरोध कैरी छो, ऊंको दिमाग भ्रष्ट च, अर उ सच मा मसीह पर विश्वास नि करदींनि। 9 ऊंकी सफलता भस जरा सी बगत की होली किलैकि जन यन्नेस अर यम्ब्रेस की अज्ञानता सब पर प्रगट हवे, उन ही ऊंकी भि होली। मसीही जीवन मा संघर्ष 10 पर हे तीमुथियुस, तु जणदी ही छै, कि मि क्य सिखांदु छो अर तिल मेरी सी चाल-चलण मा, अच्छी मनसा मा, विश्वास, सहनशीलता, प्रेम, सब्र रखण मा, 11 अर लुखुं ल मि तैं सतै, ज्यांका कारण मिल भौत दुःख उठै, तुम तैं पता च कि अन्ताकिया इकुनियुम अर लुस्त्रा नगरों मा मि पर कन-कन जुल्म हवीनि, फिर भि ऊं सभियूं मा प्रभु ल मि तैं निकाली। 12 तू ढंग से जणदी छै, कि लोग ऊं सभियूं तैं सताला जु मसीह यीशु का सेवक का रूप मा जीवन ज्यूंण चयदींनि। 13 पर दुष्ट लोग अर धोखाबाज लोग और भि जादा दुष्ट काम करला, उ लुखुं तैं धोखा दयाला अर उ अफ भि दूसरों बट्टी धोखा खाला। 14 पर हे तीमुथियुस, त्वे तैं ऊं बातों का विश्वास का दगड़ा मा पकड़ियूँ रौंण चयणु च, जु तिल लुखुं बट्टी सिखिनि, अर जूं पर तु विश्वास भि करदी, आखिर मा, तू जणली कि त्वे तैं सचै कैल सिखै, 15 छुटा बट्टी ही तिल पिता परमेश्वर का वचन तैं जांणि, जु त्वे तैं मसीह यीशु पर विश्वास कन अर उद्धार कु ज्ञान दींण लैक च। 16 सैरो परमेश्वर का वचन परमेश्वर कि प्रेरणा से रचे गै अर यु उपदेश दींणु कु अर समझौंणु कु अर सुधरणु कु अर धार्मिकता कि शिक्षा दींणु कु फैदामंद च 17 कि पिता परमेश्वर का जन सिद्ध बंणि जां अर हरेक भला काम कनु कु तैयार हवे जौं। |
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.