2 कुरिन्थि 3 - गढवली नयो नियममसीही की ज्यूंदी चिठ्ठी 1 क्य हम दुबरा अपड़ी बढ़ै कना रां? या कुछ अन्य आदमियों का जन सिफारिश की चिठ्ठी तुम मा लांण या तुम मा बट्टी लींण चयणी च? बिल्कुल भि न। 2 तुम खुद ही एक चिठ्ठी का जन छा जु हम कु सिफारिश करद; जु हमारा दिल पर लिखीं च, अर हर कुई यु तैं पढ़ी सकद अर तुम्हरा बीच मा हमारा भला कामों तैं पैछाण सकद। 3 यु प्रगट च, कि तुम मसीह की तरपां बट्टी एक चिठ्ठी का जन छा अर य चिठ्ठी हमारी सेवकाई कु सबूत च; जु स्याही ल न, या ढुंगा की पटियों पर न, पर ज्यून्दा पिता परमेश्वर का आत्मा का द्वारा मनिख्युं का दिल की पटियों पर लिखै गै। पौलुस की क्षमता 4 हम यु इलै बुल्दियां किलैकि हम तैं मसीह का द्वारा पिता परमेश्वर पर विश्वास च। 5 हम यु नि बुल्दियां कि हम मा खुद ही सब कुछ कने की क्षमता च; पर पिता परमेश्वर हम तैं यु क्षमता दींद। 6 जैल हम तैं नई प्रतिज्ञा का सेवक हूंणै की क्षमता द्ये, मूसा की व्यवस्था का सेवक हूंणै की न पर पवित्र आत्मा की; किलैकि मूसा की व्यवस्था तैं नि मनणु कु नतीजा त मौत च, पर पवित्र आत्मा अनन्त जीवन दींद। नई प्रतिज्ञा की महिमा 7-8 जब मूसा की व्यवस्था ज्वा ढुंगा की पठालों पर लिखीं छै, दिये गै, वे बगत पिता परमेश्वर की महिमा दिखै द्ये; इस्राएल का लोग लंबा बगत तक मूसा का मुक तैं नि देखि सकिनि किलैकि उ चमकणु छो, जबकि य चमक जादा लम्बा बगत तक नि रै; इलै जु मूसा की व्यवस्था पर जुड़ीं सेवकाई मौत का तरपां लिजांदी त, जै की य महिमा च त वेकी आत्मा सेवकाई की महिमा बट्टी और जादा होली। 9 किलैकि जब भंगारी ठैरांण वली वाचा तेजोमय छै, जु अपड़ा लुखुं तैं पिता परमेश्वर का संमणी धर्मी बणांद और भि जादा महिमामय च अर व और भि तेजोमय किलै नि होली? 10 अर व महिमा की चमक ज्वा मूसा की व्यवस्था का द्वारा छै, वेकी अब कुई चमक नि रै, किलैकि नई प्रतिज्ञा का अनुसार व जादा तेजोमय नि च। 11 किलैकि मूसा की व्यवस्था एक इन चमक का दगड़ी दिए गै ज्वा लम्बा बगत तक नि रै; पर नई प्रतिज्ञा की महिमा भौत जादा च किलैकि य हमेशा तक बंणि राली। 12 इलै इन आस रखि के हम हिम्मत का दगड़ी बोलि सकदा। 13 अर हम मूसा का जन न, जैल अपड़ा मुक पर परदा डाली कि इस्राएल का लोग वेका पर कम हूंद चमक तैं गायब हूंण तक नि देख ल्यां। 14 पर इस्राएल का लुखुं का मन ढीट हवे गै छा, किलैकि आज तक पुरणी वाचा तैं पढ़दी बगत ऊंका मन पर उ ही परदा पुड़यूँ रौंद; पर जब उ मसीह पर विश्वास करदींनि, पर तब ही परदा हटद। 15 अर आज तक जब कभी मूसा की व्यवस्था की किताब पढ़ै जांद, त ऊंका मनों मा परदा पुड़यूं रौंद अर इलै यु तैं पूरा ढंग से नि समझदींनि। 16 पर जब कभी ऊंको मन प्रभु यीशु पर विश्वास करद, तब उ परदा उठि जांद। 17 प्रभु त आत्मा च; अर जख कखी प्रभु कु आत्मा च उख पुरणी प्रतिज्ञा बट्टी आजादी च। 18 हम सब एक शीशा जन पिता परमेश्वर का महिमा का तेज तैं इन मुकूं बट्टी दर्शादा जै पर पर्दा नि पुड़यूँ, त पिता परमेश्वर हम तैं लगातार बढ़यां तेज मा जादा से जादा अफ जन बनांणु च। यु तेज प्रभु बट्टी ही मिल्दा, जु पवित्र आत्मा च। |
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.