2 कुरिन्थि 10 - गढवली नयो नियम

आत्मिक लड़ै

¹ मि उ ही पौलुस छों जु तुम्हरा संमणी डरपोक छो, पर तुम बट्टी दूर जांण पर हिम्मत वलो हवे जांदु; तुम तैं मसीह की नम्रता, अर कोमलता का कारण निवेदन करदु।

² मि य बिनती करदु, कि कुछ लुखुं ल बोलि, कि हम ईं दुनिया का लुखुं का जन काम करदा; इलै जब मि औलु त मि तैं आस च कि मि तैं ऊं दगड़ी कठोर हूंण पुड़लो। मि दृढ़ता ल निवेदन करदु कि जब मि औलु त मि तैं तुम दगड़ी इन बरतौ नि कन पुड़लो।

³ किलैकि जब हम ईं दुनिया मा रौंदा, पर हम अपड़ा दुश्मनों बट्टी दुनिया का मनिख्युं का जन नि लड़दा।

⁴ किलैकि जै हथियारों बट्टी हम लड़दा, उ मनिख्युं वला हथियार नि छिनी, पर गढों तैं ढै दयूंणु कु पिता परमेश्वर का शक्तिशाली हथियार छिनी।

⁵ यांका द्वारा हम वे हर एक विरोध कु, अर वे हर एक घमण्डी तैं, जु पिता परमेश्वर का ज्ञान का विरुद्ध मा मुंड उठौंदी, गिरै दींद; अर हर एक भावनाओं तैं वश मा ले के मसीह का बुल्युं मनणवला बणै दींदु।

⁶ अर तैयार रौंदो कि जब तुम पूरा ढंग से मसीह का बुल्युं मनणवला हवे जा, त हर एक ढंग से बुल्युं नि मनणवला वे आदिम तैं दण्ड द्या।

पौलुस का अधिकार

⁷ तुम भैरा का दिखावा तैं दिखदा, जु आँखों का संमणी च, जु कै कु अपड़ा आप पर यु भरोसो हो, कि मि मसीह कु छो, त उ यु भि जांणि ल्यो, कि जन उ मसीह कु च, उन ही हम भि मसीह का छा।

⁸ किलैकि जु मि वे अधिकार का बारा मा और भि घमण्ड दिखौ, जु प्रभु ल तुम्हरा विश्वास तैं नाश कनु कु न पर तुम्हरा विश्वास तैं बढौंण मा मदद कनु कु हम तैं द्ये, त यु काम कनु कु लज्जित नि हुलु।

⁹ यु मि इलै बुल्णु छो, कि चिठ्ठी का द्वारा तुम तैं डरांण वलो नि ठैरु।

¹⁰ किलैकि तुम मा बट्टी कुछ बुल्दींनि, “वेकी चिठ्ठी त गम्भीर अर प्रभावशाली छिनी; पर जब दिखदा, त बुल्दींनि उ देह कु कमजोर आदिम अर वेकी बात बेकार ही छिनी।”

¹¹ इलै जु इन बुल्द, कि उ यु समझो, कि जन पीठ पिछने चिठ्ठियों मा हमारा वचन छिनी, उन ही तुम्हरा संमणी हमारा काम भि होला।

पौलुस का अधिकार की सीमा

¹² किलैकि हम तैं य हिम्मत नि च कि हम अपड़ा आप तैं ऊं दगड़ी गिंणा, या ऊं बट्टी अफ तैं मिलां, जु अपड़ी बढ़ै करदींनि, अर अपड़ा आप तैं आपस मा नाप तोली के एक दुसरा बट्टी तुलना कैरी के अपड़ा आप तैं मूर्ख ठैरौदींनि।

¹³ हम त वे काम बट्टी भैर जु पिता परमेश्वर ल हम तैं दींनि घमण्ड कभी नि करुला, पर वीं सीमा तक जु पिता परमेश्वर ल हम कु ठैरे, अर वेमा तुम भि ऐ ग्यां अर वेका ही अनुसार घमण्ड भि करीला।

¹⁴ किलैकि हम अपड़ी सीमा बट्टी भैर अपड़ा आप तैं बढौंण नि चनदियां, जन कि तुम तक न पौछणै की दशा मा हूंद, पर तुम तैं मसीह का शुभ सन्देश सुनांणु कु कुरिन्थुस तक यात्रा कन वला हम पैला आदिम छा।

¹⁵ अर हम सीमा बट्टी भैर दुसरों की मेहनत पर घमण्ड नि करदा; पर हम तैं आस च, कि ज्यों-ज्यों तुम्हरो विश्वास बढ़दी जौं त्यों-त्यों हम अपड़ी सीमा का अनुसार तुम्हरा कारण अर तुम्हरा अमणी-संमणी और भौत लुखुं तक पौंछण मा सक्षम होला।

¹⁶ कि हम तुम्हरी सीमा बट्टी भैर दूर-दूर क्षेत्रों मा भि शुभ सन्देश प्रचार सूंणा, अर यु न, कि हम दुसरों की सीमा का भितर बणयां-बणयां कामों पर घमण्ड कैरा।

¹⁷ पर जन कि परमेश्वर जु वचन बुल्द जु घमण्ड कैरो, उ प्रभु पर घमण्ड कैरो।

¹⁸ किलैकि जु अपड़ी बड़ै करद, उ न, पर जै की बड़ै प्रभु करद, उ पिता परमेश्वर का द्वारा सचो कैरी के स्वीकार किये जालो।