1 थिस्सलुनीकी 5 - गढवली नयो नियममसीह का दुबरा औंण कु तैयार रौंण 1 हे विश्वासी भयों, तुम तैं यु सब बतौंण की जरूरत नि च कि प्रभु यीशु दुबरा कब आलो। 2 किलैकि तुम अफी अच्छी तरौं से जंणदा छा कि जन राती चोर अचानक औंद, उन कै ही प्रभु यीशु कु आंणौ को दिन भि अचानक आंण वलो च। 3 जब लोग इन बुलला, “सब कुशल च अर कुछ भि डैर भय नि च” तब अचानक से ऊं पर विणाश ऐ जालो जन कै गर्भवती जनन तैं अचानक से प्रसव कि पिड़ा उठदी; अर उ वे बड़ा क्लेश बट्टी बचि नि सकला। 4 पर हे विश्वासी भयों, तुम त अंधेरा मा नि छा, कि प्रभु यीशु का दुबारा आंणो कु दिन तुम पर चोर का जन अचानक ऐ जौं। 5 किलैकि तुम सभि उज्यला की सन्तान छा, अर दिन की सन्तान छा, हम राती बट्टी अर अंधेरा बट्टी सम्बन्धित नि छा। 6 इलै हम तैं अविश्वासियों जन सियूं नि रौंण चयणु च, पर बिज्यां अर सचेत रौंण चयणु च। 7 किलैकि जु सींदा छिनी, उ राती कु ही सिंदींनि, अर जु नशा मा मतवला हूंदींनि, उ राती कु ही मतवला हूंदींनि। 8 पर हम त उज्यला की सन्तान छा इलै हम तैं अपड़ा मथि काबू रखण चयणु च हमारी विश्वास अर प्रेम हमारी रक्षा कैरो जन सुरक्षा कवच एक सिपै की रक्षा करद अर य आस कि हम अनन्त दण्ड बट्टी बची ग्यां, वे उद्धार का टोप जन च जु एक सिपै की रक्षा करद। 9 किलैकि पिता परमेश्वर ल हम तैं इलै नि चुणि कि अपड़ा गुस्सा बट्टी हम तैं दंड द्यो, पर इलै ठैरे कि हम अपड़ा प्रभु यीशु मसीह का द्वारा उद्धार पै साका। 10 प्रभु यीशु हम कु इलै मोरि, कि हम चै ज्यून्दा रावा चै मोरि भि जावा, जब प्रभु यीशु ओ त हम सब मिली के वेका दगड़ा मा जीवन पां। 11 इलै एक हैंका तैं प्रोत्साहित कैरा, अर एक हैंका तैं मजबूत बणा, जन की तुम करदां भि छा। मंडलि तैं उपदेश 12 हे विश्वासी भयों, हम तुम बट्टी बिनती कना छा, कि जु तुम कु भौत कड़ी मेहनत करदींनि, अर प्रभु मा तुमारा अगुवा छिनी, अर तुम तैं शिक्षा दींदिनि, ऊंको आदर कैरा। 13 जु कुछ उ तुम दगड़ी करदींनि, यु कारण ऊंको भौत आदर कैरा और ऊं तैं भौत प्रेम कैरा, तुम सब एक हैंका दगड़ी मेल से रावा। 14 हे विश्वासी भयों, हम तुम बट्टी बिनती कना छा, कि ऊं लुखुं तैं चिता जु आलसी छिनी, ऊं लुखुं तैं प्रोत्साहित कैरा जु डरपोक छिनी, ऊं तैं ढांढस द्यावा जु कमजोर छिनी, ऊं तैं सम्भाला सभियूं दगड़ी शहनशीलता कु बरतौ कैरा। 15 ईं बात को ध्यान रखा कि कुई भि कै दगड़ी बुरै का बदला मा बुरै नि कैर; पर सदनी भलै कनु कु तैयार रावा अर सभियूं दगड़ी भलै कने कोशिश कैरा। 16 सदनी खुश रावा। 17 सदनी प्रार्थना कन मा लगयां रावा। 18 हरेक हालत मा धन्यवाद द्यवा; किलैकि मसीह यीशु मा तुम कु पिता परमेश्वर कि या ही मनसा च। 19 पवित्र आत्मा का कामों तैं लुखुं का जीवन मा हूंण से नि रोका। 20 पिता परमेश्वर ल अपड़ा लुखुं तैं जु भविष्यवाणी दीं च वेको तिरस्कार नि कैरा। 21 पर हरेक संदेश की परख कैरा यु जनणु कु कि उ पिता परमेश्वर का तरपां बट्टी च य न, अच्छा संदेश तैं स्वीकार कैरा अर ऊंको पालन कैरा। 22 सब किस्मै कि बुरै बट्टी दूर रावा। आशीर्वाद 23 अर तुम्हरी आत्मा, प्राण, अर देह तैं अपड़ा प्रभु यीशु मसीह का फिर वापिस आंण का दिन तक पूरा ढंग से निर्दोष अर बचै के रखा; शान्ति दींण वलो पिता परमेश्वर अफी तुम तैं पूरा ढंग से पवित्र कैरो। 24 तुमारो बुलांण वलो विश्वासयोग्य च, इलै उ तुम तैं पवित्र हूंणु कु बुलांद, त उ तुम तैं पवित्र हूंणा का लैक भि बणालो। 25 हे विश्वासी भयों, हम कु प्रार्थना कैरा। 26 सभि विश्वासी भयों तैं प्रेम से प्रणाम कैरा। 27 मि तुम तैं आज्ञा दींणु छौं, कि या चिठ्ठी सब विश्वासी भयों तैं पढ़ी के सुणै जौं। 28 मि प्रार्थना करदु, कि हमारा प्रभु यीशु मसीह कि कृपा तुम पर हूंणी रौ। |
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.