1 थिस्सलुनीकी 3 - गढवली नयो नियमविश्वास की चिन्ता 1 “आखिरकार, किलैकि हम तुम बट्टी दूर रौंण और सै नि सक्यां” तब हम ल (पौलुस और सिलास) यूं तैं ठैरे कि एथेंस शहर मा इखुली रै जां 2 अर हम ल तीमुथियुस कु जु मसीह का शुभ सन्देश मा हमारो भैय, अर पिता परमेश्वर कु सेवक च, वे तैं तुम मा भेजि, कि उ तुम तैं मजबूत कैरो; अर तुम्हरा विश्वास का बारा मा तुम तैं मदद कैरो। 3 कि कुई भि यूं क्लेशों का कारण अपड़ा विश्वास मा डगमगै नि जौं; किलैकि तुम अफी जंणदा, कि हम तैं कष्ट उठांण पुड़लो। 4 पैली भि जब हम तुमारा इख छा, त तुम मा बुल्दा छा, कि हम पर क्लेश आलो, अर इन ही हवे, अर तुम जंणदा भि छा। 5 यु कारण से जब मि परेशान छो अर जब मि यूं जांणि बगैर रै नि साको कि तुम कन छा त मिल तीमुथियुस तैं तुमारा विश्वास कु हाल समाचार जनणु कु भेजि, किलैकि हम डरदा छा कि कखी इन नि हो, कि अजमैश कन वला शैतान तुम्हरी अजमैश कैरी हो, अर हमारी मेहनत बेकार हवे गै हो। तीमुथियुस का द्वारा उत्साहित 6 पर अब तीमुथियुस जु तुम्हरा इख बट्टी हम मा वापिस ऐ गै वेल इख ऐ के तुम्हरा विश्वास कु अर प्रेम कु शुभ सन्देश प्रचार सुणै, अर या बात भि सुणै, कि तुम सदनी प्रेम का दगड़ी हम तैं याद करद्यां, अर हम तैं दिखणै की लालसा करद्यां, जन हम भि तुम तैं दिखण की लालसा करदां। 7 इलै हे विश्वासी भयों, हम ल अपड़ी सैरी मुसिबत अर क्लेश मा तुम्हरा बारा मा (तीमुथियुस बट्टी) सूंणि के प्रोत्साहित हुयां कि तुम अपड़ा विश्वास मा मजबूत छा। 8 किलैकि अब जु तुम प्रभु मा मजबूत रैल्या यूं हम कु नयो जीवन लांदो। 9 अर ज्वा खुशी हम तैं तुमारा कारण अपड़ा पिता परमेश्वर का संमणी मिलदी वीं खुशी का बदला मा हम पिता परमेश्वर तैं कै ढंग से धन्यवाद द्यां? 10 हम लगातार भौत प्रार्थना करदी रौंदा, कि तुम दगड़ी हम फिर से मिल सका अर जु तुम कु जरूरी च उ तुम तैं सिखै साका, कि तुम पूरा ढंग से प्रभु यीशु पर विश्वास कैरी साका। मंडलि कु प्रार्थना 11 “हम प्रार्थना करदां कि हमारा पिता परमेश्वर अर हमारा प्रभु यीशु तुमारा इख आंणु कु हमारो मार्गदर्शन कैरो।” 12 हम यु भि प्रार्थना करदां कि प्रभु इन कैरो कि, जन हम तुम बट्टी प्रेम करदा, उन ही तुम भि एक दुसरों बट्टी प्रेम कैरा अर सभि लुखुं का दगड़ा मा भौत बढ़दी जावा। 13 हम प्रार्थना करदां प्रभु यीशु तुमारा मनों तैं इन मजबूत कैर कि जब हमारो प्रभु यीशु अपड़ा सब पवित्र लुखुं का दगड़ा मा फिर औ त उ हमारा पिता परमेश्वर का संमणी पवित्रता मा निर्दोष ठैरुनु। |
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.