1 पतरस 2 - गढवली नयो नियम

चुणयूं ढुंगो अर वेका चुणयां लोग

¹ इलै, हर प्रकार का बुरा बरतौ बट्टी छुटकारा पै। दूसरों तैं धोखा नि द्या, कपटी नि बणा। दूसरों बट्टी नि फुकया; दुसरा लुखुं का विरुद्ध बुरी बात नि बोला।

² मि तुम्हरी तुलना नवजात छुटा बच्चा बट्टी करदु; एक नवजात छुटा बच्चा हमेशा अपड़ी ब्वे कु दूध ही चांद कि मजबूत बणौं; उन ही के जन तुम तैं भि पिता परमेश्वर का वचन सुनण की इच्छा हूंण चयणी च कि पिता परमेश्वर मा तुम्हरो विश्वास मजबूत हो अर तुम्हरो उद्धार हवे जौं।

³ किलैकि जन कि पिता परमेश्वर को वचन बुल्द, “तुम ल अनुभव बट्टी जांणि की प्रभु भलो च।”

^4-5 अब तुम प्रभु यीशु का संमणी अयां छा। उ एक घौर का कूणा पर रखयां जरूरी ढुंगा का जन च, पर उ ज्यूँदो ढुंगा का जन च। कई लुखुं ल वे तैं अस्वीकार कैरेले छो, पर पिता परमेश्वर ल वे तैं चुणि अर वे तैं भौत अनमोल मणदो। अर जन के लोग ढुंगों ल घौर बंणौंदींनि, उन के ही पिता परमेश्वर तुम तैं एक दगड़ा मा एक झुण्ड मा जुड़णु च जै मा पिता परमेश्वर को आत्मा रौंद, कि जु यीशु मसीह ल हम कु कैरी, वेका द्वारा तुम ऊं याजकों का जन जु बलिदान चढ़ौदींनि, इन काम कैरा जु पिता परमेश्वर तैं खुश करदींनि।

⁶ यु उन ही च जन पिता परमेश्वर का वचन मा लिख्युं च, “देखा, मिल एक बहुमूल्य ढुंगो चुणि; जु सिय्योन शहर मा घौर तैं मजबूत बनांणु कु इस्तेमाल किये जंदींनि। जु कुई भि वे पर विश्वास करदो, उ लज्जित नि होलो।”

⁷ यु ढुंगो तुम कु भौत कीमत च जु यीशु मसीह पर विश्वास करदींनि। पर जु लोग वे पर विश्वास नि करदींनि, ऊंका बारा मा पिता परमेश्वर कु वचन बुल्द कि, “राजमिस्त्रियों ल जै ढुंगो कु इस्तेमाल कन से मना कैरी दींनि, वीं इमारत की नींव मा सबसे जरूरी ढुंगो बंणि गै।”

⁸ अर फिर पिता परमेश्वर कु वचन यु बुल्द, “यु ढुंगो लुखुं का ठोकर खांण को कारण होलो। य एक चट्टान जु ऊंको लमडणो को कारण होलो।” उ इन कै लम्ड़दींनि किलैकि उ पिता परमेश्वर का संदेश तैं मनणु से इंकार करदींनि। पिता परमेश्वर ल ऊं दगड़ी य ही योजना बणै।

⁹ पर तुम इन नि छा किलैकि तुम पिता परमेश्वर का चुणयां लोग छा, तुम पिता परमेश्वर का याजक छा, जु राजा च तुम पिता परमेश्वर से जुड़िया लोग छा वेल तुम तैं अंधेरा बट्टी अपड़ी अद्भुत उज्यला मा बुलै, कि तुम पिता परमेश्वर का अद्भुत कामों का बारा मा बतै साका।

¹⁰ (पिता परमेश्वर का तरपां बट्टी बुल्ण वलो होशे ल जु लिख्युं च उ तुम्हरा बारा मा सच च।) एक बगत पैली तुम पिता परमेश्वर का लोग नि छा, पर अब तुम पिता परमेश्वर का लोग छा; पैली तुम पिता परमेश्वर की दया तैं नि जंणदा छा पर अब तुम यु तैं जंणदा छा किलैकि वेल पैली बट्टी ही तुम पर अपड़ी दया दिखै।

पिता परमेश्वर कु जींण

¹¹ हे प्रियों मि तुम बट्टी बिनती कनु छो कि तुम ई दुनिया मा परदेसियों अर यात्रियों का जन रौंणा छा। मि तुम बट्टी बिनती कनु छो कि ऊं सैरी पापमय शारीरिक इच्छाओं बट्टी बचा किलैकि उ तुम्हरा अपड़ा आत्मा का विरुद्ध हमेशा लड़दी रौंद।

¹² जु लोग पिता परमेश्वर पर विश्वास नि करदींनि उ तुम पर यु बोलि के गलत भंगार लगै सकदींनि की तुम्हरा काम बुरा छिनी। इलै तुम तैं अपड़ा बरतौ का बारा मा चौकस रांण चयणु च, कि उ तुम्हरा अच्छा बरतौ तैं देखि साका। बाद मा उ स्वीकार करला कि तुम्हरो बरतौ अच्छो च अर जै दिन पिता परमेश्वर दुनिया कु न्याय कनु कु आलो वे दिन परमेश्वर की महिमा करला।

अधिकारियों का अधीन रांण

¹³ प्रभु यीशु कु आदर कनु कु तुम तैं ऊं सभि आज्ञाओं को पालन कन चयणु च जु ईं दुनिया मा अधिकारी छिनी; मतलब, राजा जु की सबसे जरूरी अधिकारी च,

¹⁴ अर राज्यपालों का, जौं तैं ऊंका राजाओं का द्वारा नियुक्त किये जांद। ऊं तैं ऊं लुखुं तैं दण्ड दींण कु भिजे जांद जु गलत करदींनि अर ऊं लुखुं का सम्मान कनु कु जु सै करदींनि।

¹⁵ किलैकि पिता परमेश्वर की य इच्छा च, कि हमारा अच्छा बरतौ का द्वारा, जु लोग पिता परमेश्वर तैं नि जणदींनि, उ अगनैं कु हम पर गलत ढंग से भंगार लगौंण की हिम्मत नि कैरा, किलैकि य बात साफ च की ऊंका झूठा भंगार सच नि च।

¹⁶ तुम कु इन कुई भि नि च जु तुम तैं उ कन से रोक साको जु तुम कन चदयां किलैकि तुम हमारा प्रभु यीशु मसीह का द्वारा पैली ही आजाद करे ग्यां। पर बुरा काम कनु कु यु तैं एक बहाना नि बणा। पर तुम तैं अपड़ा कामों का द्वारा दिखांण चयणु च कि तुम सच मा पिता परमेश्वर का सेवक छा।

¹⁷ सभियूं को आदर कैरा, अपड़ा सभि दगड़िया विश्वासियों बट्टी प्रेम रखा, पिता परमेश्वर बट्टी डैरा, राजा को सम्मान कैरा।

मसीह कु दुःख को उदाहरण

¹⁸ हे सेवकों, तुम जु घौर मा काम करदा, जु विश्वासी छा, तुम तैं अपड़ा स्वामी की आज्ञाओं कु पालन कन चयणु च अर हमेशा ऊंको सम्मान कन चयणु च। इन हर ढंग का स्वामी का दगड़ी कैरा चाहे उ दयालु अर सही हो अर या क्रूर हों।

¹⁹ किलैकि जु हम दुःख सौंदा चाहे हमारी कुई गलती न हो, पर हम भस इलै सौंदा किलैकि हम जंणदा कि पिता परमेश्वर सभि कुछ जंणदु च, त पिता परमेश्वर हम बट्टी खुश हूंद।

²⁰ पर जु तुम तैं गलत कनु कु पिटे जांद, त दण्ड मिलण पर धीरज रखण मा तुम्हरी प्रशंसा कनु कु कुई कारण नि च। पर जु भलै कना का कारण तुम दुःख सौंदयां अर धीरज रखदां, त पिता परमेश्वर खुश हूंद।

²¹ पिता परमेश्वर का द्वारा तुम तैं बुलै अर चुणै जांण का कारणों मा बट्टी एक कारण यु च कि तुम वेको दुःख सै लिला तुम वेको भला काम कैरी के दुःख सहन करदा। मसीह, जैल तुम कु दुःख सै, उ तुम कु एक उदाहरण च। इलै तुम तैं उन ही काम कन चयणु च जन मसीह ल कैरी।

²² पिता परमेश्वर को वचन बुल्द कि, “मसीह ल कभी पाप नि कैरी, मसीह ल कभी कुई झूठ नि बोलि।”

²³ जब लुखुं ल यीशु को अपमान कैरी, त यीशु ल पलटी के ऊंको अपमान नि कैरी। जब लुखुं ल वे तैं दुःख द्ये, त वेल बदला मा ऊं तैं चोट पौछांणै की कोशिश नि कैरी। बल्कि, यीशु ल अपड़ी मदद कु पिता परमेश्वर पर विश्वास कैरी। उ जंणदु छो कि पिता परमेश्वर हमेशा न्यायपूर्ण ढंग से लुखुं को न्याय करद।

²⁴ जब मसीह मोरि, त हमारा पापों का कारण सूली पर वेकी देह तैं दण्ड़ित कैरी। वेल इन इलै कैरी की हम पाप कन बंद कैरा अर धार्मिकता ल जीवन जींण शुरू कैरी द्या, अर ऊं घावों का कारण जु मसीह ल सैनी, हम खूब हवे ग्यां

²⁵ एक बगत पैली, तुम ढिबरों का जन छा जु गलत रस्ता पर जांणि छै जौनु अपड़ो रस्ता हरचै दींनि; पर अब तुम मसीह मा लौटि अयां जु तुम्हरा आत्मा को चरवाहा (अध्यक्ष) अर रखवलो च।