1 कुरिन्थि 8 - गढवली नयो नियममूर्तियों तैं चढ़यूं खांणु 1 तुम्हरी चिठ्ठी मा तुम ल मूर्तियों का संमणी चढ़यूं बलि कु खांणु का बारा मा पूछि छों, कि हम सभि यु बारा मा जंणदा छा; पर ज्ञान बड़ा मोन तैं पैदा करद, पर अगनैं बढ़ण मा हम एक-दुसरा की मदद प्रेम का दगड़ी करदां। 2 जु तुम तैं लगद कि तुम कुछ जंणदा छा, त तुम हक्कीकत मा कुछ भि नि जणदां जन तुम तैं जनण चयणु च। 3 पर जु कुई पिता परमेश्वर बट्टी प्रेम रखद, त पिता परमेश्वर वे आदिम तैं जंणदु च। 4 त फिर, मि तैं मूर्तियों का संमणी चढ़यूं बलि का खांणु का बारा मा पुछयां सवालों कु जवाब दींण चयणु च; हम जंणदा छा कि भस एक ही ज्यूँदो पिता परमेश्वर च अर ईं दुनिया मा मूर्तियां बेजान छिनी। 5-6 पर फिर भि, आकाश अर धरती पर मा भौत स लुखुं तैं परमेश्वर अर प्रभु बुल्दींनि; पर हमारो एक ही पिता परमेश्वर च जु स्वर्ग मा च, वेल सभि कुछ बणै, अर हम वेका द्वारा ही ज्यून्दा छा; उन ही कै, हमारो एक ही प्रभु च अर उ यीशु मसीह च। 7 पर हमारा कुछ विश्वासी अभि तक भि नि जणदींनि कि मूर्तियों मा कुई शक्ति नि च, किलैकि उ पैली ऊं मूर्तियों की पूजा करदा छा, अब जब उ ऊं मूर्तियों तैं चढ़यूं बलि कु खांणु खंदींनि, उ गलत सुचदींनि कि उ अभि भि ऊं मूर्तियों की पूजा मा शामिल छिनी, अर उ यूं सोचि के परेशान हुन्दींनि कि जु उ मूर्तियों तैं चढ़यूं खांणु खंदींनि त ऊंल पाप कैरेले। 8 पर खांणु हम तैं पिता परमेश्वर का नजीक नि लांद; अर खांणु खांण बट्टी मना कैरी कै भि हम पिता परमेश्वर तैं न खुश नि करदां, अर खांणु खांण अर नि खांण हमारा पिता परमेश्वर का नजर मा महत्व नि रखद। 9 पर चौकस रावा, इन नि हो, कि तुम्हरी य आजादी कखी ऊं लुखुं कु जु विश्वास मा कमजोर छिनी ठोकर कु कारण बंणि जां। 10 तुम जंणदा छा, कि यु मूर्तियां हक्कीकत मा परमेश्वर नि छिनी इलै तुम मूर्तियों का मन्दिर मा बलि कु खांणु भि खै सकदियां। पर जु कुई विश्वास मा कमजोर च उ तुम तैं जु उख खांणु खांण देखु त मूर्तियों तैं चढ़यूं मांस खांण कु प्रोत्साहित हूंद, जबकि उ सुचद कि इन कन गलत च। 11 इन कै तेरु ज्ञान का कारण जु विश्वासी भैय विश्वास मा कमजोर च उ मसीह मा विश्वास कन बन्द कैरी दयालो, जैकु यीशु मसीह ल अपड़ा आप तैं बलिदान कैरी। 12 जु हमारा यु काम कन का कारण हमारा विश्वासी दगड़िया अफ तैं भंगारी महसूस करद, त हम वेका अर मसीह का खिलाफ मा भि पाप करदां। 13 इलै, जु मेरा मूर्तियों का संमणी चढ़यूं खांणु बट्टी दुसरा विश्वासी भैय का विश्वास बट्टी पिछनै हटणों कु कारण बणद, त मि तैं उ खांणु कभी भि नि खांण चयणु च। |
Garhwali New Testament(गढवली नयो नियम), 2020 by The Love Fellowship is licensed under a Creative Commons Attribution-ShareAlike 4.0 International License.