Solomone 5 - Geeshsha Maxaafa

Panthaa

¹ Ta miche, ta mushurate, taani ta atakiltiya giddo gelas. Ta karbiyanne ta shitto ciishsha qoras; taani eessa uythi mas; ta woyniyanne ta maatha uyas. Iya laggeto, miite uyite; siiqo alana gakanaw uyite.

Yerusalaame Geela7ota Geela7iw

² Taani dhiskas; shin ta wozanay barkis; ta siiqoy haysada yaagidi pengiya qonkishin si7as. “Ta miche, ta siiqe, ta yegelsse; borey bayna ta holle, taw pengiya dooya. Ta huuphey akan laakis; ta binaanay qamma puusen irxis.”

³ Ta ma7uwa qaaras, zaarada ma7oyee? Ta tohuwa meecetas, zaarada qitayoyee?

⁴ Ta siiqoy ibitha xoo7era ba kushiya soo yeddis; ta wozanay iya gisho seellees.

⁵ Ta siiquwas dooyanaw dendas; pengiya dooyanaw kobiya oykiya wode, ta kushiyape karbey, ta biradhiyafe shittoy xokees.

⁶ Ta siiquwas kariya dooyas, shin I deenna; iya qaala si7anaw daro amottas. Minthada koyas, shin iya demmabike; xeegas, shin taw koybeenna.

⁷ Katamaa naageysati tana demmidi, wadhidosona; madunxisidosona. Katamaa dirsaa naageysati, ta laxana qaari ekidosona.

⁸ Hinteno, Yerusalaame geela7oto, ta siiquwa demmiko, taani iya siiquwan hargidaysa, hadara iyaw odite.

Yerusalaame Geela7ota

⁹ Neno, maccasa ubbaafe lo77iyara, ne laggey haratape waanidi dummatii? Neeni nuna hadara gey, I haratape aybin dummatii?

Geela7iw

¹⁰ Ta siiqoy mala lo77onne ayanta; tammu mukulu addeta giddon iya meli baawa.

¹¹ Iya huuphey al7o worqa daanees; iya binaanay lo77onne quuro mela kareethi.

¹² Iya ayfey shaafa matan eqida, maathan meecetida holleta daanees.

¹³ Iya shakalay sawiya qimamey toketida madabeda lo77ees; iya mettershay karbe shittoy xokiya wora ciishshada lo77ees.

¹⁴ Iya qesey al7o shuchan alleeqetida worqa xam7ada lo77ees; iya asatethay sanpare al7o shuchan alleeqetida dangarsa zaale mela.

¹⁵ Iya tohoti worqa baason eqida salo shucha tuussi daanosona; iya malay zigan alleeqetida Libaanose zuma mela.

¹⁶ Iya doonay eessada mal7ees; iya kumetha asatethay lo77ees. Hinteno Yerusalaame geela7oto, ta siiqoynne ta laggey haysa daannes.