Solomone 2 - Geeshsha Maxaafa

Geela7iw

¹ Taani Saaronan doliya ciishshanne zangaaran doliya suufe ciishsha mela.

Panthaa

² Ta siiqiya maccasa giddon be7iya wode, aguntha giddon bentiya suufe ciishsha mela.

Geela7iw

³ Ta siiqoy hara panthata giddon xeelliya wode woran de7iya apile mithaa mela. Tana daro ufaysin, iya kuyaa giddon uttas; iya ayfey min tana mal7ees.

⁴ I tana gibira miya keethi gelsis; ba siiquwa bandirada ta bolla dhoqu dhoqu oothis.

⁵ Taani iya siiquwan oyketada hargida gisho, zabibe ayfe muzidi tana gashtisite; apile muzidi ta wolqaa minthite.

⁶ Ba haddirsa kushiya tana borkotisis; ba ushacha kushiyan tana qoommis.

⁷ Hinteno, Yerusalaame yalaga maccasaw, siiqoy baw dosidi dendana gakanaw, iya hinte barkethonna mela, ta hintena gen7eninne wora woshi7en ammatayis.

⁸ Ta siiquwa girsay deriya bollara gupishenne, zumaa bollara xongetishe yeysi si7etees.

⁹ Ta siiqoy woshi7e woyko gen7e mari daanees; Heko, nu keethaa matan eqis; maskootera soo xeellees; magarajuwa giddora xeellees.

¹⁰ Ta siiqoy, haysada yaagees; “Ta siiqe, denda! Ta yegelsse, haaya, issife ane boos.

¹¹ Heko, balgoy aadhis; irayka eqis.

¹² Biittan ciishshi ciiyis; yethi yexiya ageenay gakis; holle yethi nu biittan si7etis.

¹³ Balase mithay ayfe doomis; woyney ciiyis; ciishsha sawoy biittan tonku gees. Ta siiqe, denda; ta yegelsse, haaya; ane issife boos.”

Panthaa

¹⁴ Aafo doonan zaalla qophon, qosetida holle daaniyare; ane issi toho tana ne som7uwa bessa; ne girsa sissa. Ne qaalay tana mal7ees; ne som7oy daro lo77ees.

Yerusalaame Geela7ota

¹⁵ Nu woyney ciiyis; nu woyne gadiya iissiya workanata, he guutha butaleta xihen oykite.

Geela7iw

¹⁶ Ta siiqoy tabaa; taanika iyabaa; ciishshata giddon I ba wudiya heemmees.

¹⁷ Sa7i geeyana gakanaw, kuyay dhayana gakanaw, ta siiquwaw, gen7eda woyko woshi7e marada, aafotiya deriyara woxashe haa simma.