Solomone 1 - Geeshsha Maxaafa

¹ Mazmure ubbaafe aadhiya Solomone mazmurey haysa.

Geela7iw

² Ne siiqoy woynepe aadhidi ufaysiya gisho tana zaara zaara yeera.

³ Ne tiyetiya shittoy waanidi sawii! Ne sunthay goggiya shitto mela; Geela7oti nena siiqey hessasa.

⁴ Tana neera ekada ba; ane issife woxoos! Kawaw, tana ne quruxuwan gelsa. Nenan nu ufaytoos; ne siiquwa woyne ushshafe aathidi nashshoos. Maccasi ubbay nena siiqeysa bessa.

Yerusalaame maccasata Geela7iw

⁵ Hinteno, Yerusalaame maccasato si7ite; taani kareethi gidikoka mala lo77o. Ta kareethatethay Qedaare dunkaane mela; shin ta malay Solomone magarajota mela.

⁶ Ta malaa kareethiday awa; taani kareethi gidida gisho tana boropite. Ta ishati, ta aaye nayti taara ooyetidi, tana woyne gade naagisidosona; hessa gisho ta woyniya naagabike.

⁷ Ta siiquwaw, ane taw oda; ne dorsaa wudiya awun heemmay? Seeta gallas enta awun shempisay? Nena demmanaw ne laggeta wudiya kaallada, ayis guuluntada biya maccas gido?

Panthaa

⁸ Maccasa ubbaafe lo77iyare, Bessaa eronna ixiko dorsata geedo kaalla. Ne deesha marata henthanchota dunkaaniya matan heemma.

⁹ Ta siiqe! Gibxe kawo para gaareta goochiya, parata giddon de7iya magaayeda lo77aasa.

¹⁰ Ne haythan de7iya alleequwara shiiqidi, ne shakalay waanidi lo77i! Ne qoodhey al7o shuchan alleeqetis.

¹¹ Nuuni new biran cadetida, worqa alleequwa oosisana.

Geela7iw

¹² Kawoy gayta bolla uttidashin, ta shittuwa sawoy keethan tonku gis.

¹³ Ta siiqoy ta dhanthata giddon de7iya, xuntetida sawiya karbe daanees.

¹⁴ Ta siiqoy, Engaada woyne gaden, dolida heena ciishsha mela.

Panthaa

¹⁵ Ta siiqe, neeni waana lo77ay! Neeni waana lo77ay! Ne ayfeti holle ayfeda lo77oosona.

Geela7iw

¹⁶ Ta siiquwaw, neeni waanna lo77ay! Ayba ufaysay; nu arsay cil7o maata mela ufaysees.

¹⁷ Nu keethaa tuussay ziga; nu kaaray xiiddan oyketis.