ዮሃኒሳ ቆንጬ 4 - Geeshsha Maxaafa

Salon De7iya Araata

¹ Hessafe guye, taani salo xeelliya wode dooyetida penge be7as. Qassi ta kase si7ida moyze girsaa melay taako, “Ha keya; haysafe guye, hananaw de7iyaba ta nena bessaana” yaagis.

² He wode ta Ayyaanan haaretada de7ayis. Heko, saluwan araata bolla issoy uttidaysa be7as.

³ He uttidaysa malay yasphedenne sardiyoone al7o shucha mela. Iya araata yuushuwan al7o margide shuchi daaniya zuulli de7ees.

⁴ He araata yuushuwan laatamanne oyddu araatati de7oosona; enta bolla bootha ma7o ma7idi, huuphen worqa kallachaa wothida laatamanne oyddu cimati uttidosona.

⁵ Araatape wol7anthi, guunthinne deshoy keyees. Araata sinthan laapun poo7iya xompeti de7oosona; enti laapun Xoossaa ayyaanata.

⁶ Araata sinthan birille daaniya phooliya burcuko abbay de7ees. Sintharanne guyera ayfey de7iya oyddu de7ora de7iya medhetethati araata yuushuwaninne araata giddon de7oosona.

⁷ Koyro medhetetha medhoy gaammo daanees; nam7anthoy boori daanees; heedzanthoy ase daanees; qassi oyddanthoy piradhiya arganthi daanees.

⁸ Oyddu medhetethata ubbaas usupun qefey de7ees; enta asatethaa ubbay ayfen kumis. Enti qammanne gallas qanxonna, “Geeshshaw, geeshshaw, geeshshaw, Godaw, Ubbaafe Wolqaama Xoossaw, Kaseka, ha77ika de7eyso, sinthafe yaanayso” yaagosona.

⁹ He medhetethati araatan uttidaysasinne merinaw de7eysas saba, bonchonne galata immida wode,

¹⁰ laatamanne oyddu cimati araatan uttidaysanne merinaw de7eysa sinthan gufannidi goyinnidosona; banta kallachaa araata sinthan wothidi,

¹¹ “Nu Godaw, nu Xoossaw, neeni boncho, sabanne wolqaa ekanaw bessaasa. Neeni ubbaa medhadasa; ubbabay ne sheniyada hanis, medhetis” yaagidosona.