ዮሃኒሳ ቆንጬ 15 - Geeshsha Maxaafa

Wursetha Boshata

¹ Taani salon hara gitanne malaalsiya malaata be7as. Xoossaa wursetha hanquwa qoncisiya laapun boshata oykida laapun kiitanchoti de7oosona.

² Qassi tamara walaketida burcuko abba daaneysa be7as. He abba gaxan do7aa, iya misiliyanne iya sunthaa taybuwa xoonidaysata be7as. Xoossay entaw immida diithaa oykidi eqidosona.

³ Enti Xoossaa aylliya Muse mazmuriyanne Dorsa mazmuriya haysada yaagidi yexoosona. “Godaw, Ubbaafe Wolqaama Xoossaw, ne oosoy gitanne malaalsiyaba. Dere ubbaa kawaw, ne ogey xillonne tuma.

⁴ Geeshshi ne xalaala gidiya gisho, Godaw, new yayyonnaynne ne sunthaa bonchonay oonee? Ne xillo oosoy asa ubbaas qonce gidiya gisho, kawotethi ubbay ne sinthe yidi goyinnana” yaagidi yexoosona.

⁵ Hessafe guye, salon dooyetidi de7iya Xoossa Keethaa, ika Markatetha Dunkaaniya be7as.

⁶ Laapun boshata oykida laapun kiitanchoti Xoossa keethafe keyidosona. Enti geeshshinne phooliya liino ma7o ma7idosona; banta tiran worqa danco dancidosona.

⁷ Oyddu medhetethatape issoy, merinaw de7iya Xoossaa hanqoy kumida laapun worqa xuu7ata laapun kiitanchotas immis.

⁸ Xoossaa bonchuwafenne iya wolqaafe dendoysan Xoossa Keethay cuyan kumis. Laapun kiitanchoti oykida laapun boshati poletana gakanaw Xoossa Keetha oonika gelanaw danda7ibeenna.