Mazmure 92 - Geeshsha Maxaafa

Xoossa Oosoy Gita

Sambaata gallasa mazmure

¹ Godaa galatoy lo77o; Ubbaafe Dhoqa Xoossaw, ne suntha saboy lo77o.

² Wonta wonta ne siiquwa odoy, qamma ne ammanetetha awaajoy lo77o.

³ Tammu shayan waaxetida diithan maasinqo kaa7ishe nena galatoy lo77o.

⁴ Taani ne oosuwan ufaytida gisho, ne kushe oosuwa gisho nena galatayis.

⁵ Godaw, ne oosoy ay mela gite! Ne qofay ay mela ciimmo!

⁶ Eeya asi eranaw danda7enna; wozani bayna asi akeekanaw danda7enna.

⁷ Iitati maatada diccikoka, iita ootheysati daaykoka, enti merinaw dhayana.

⁸ Shin abeeti Godaw, neeni merinaw ubbaafe dhoqa.

⁹ Abeeti Godaw, tuma ne morketi dhayana; iita oothiya ubbay piski gaana.

¹⁰ Ta kaciya mentha kaceda dhoqu oothadasa; lo77o zayte ta huuphen tiyadasa.

¹¹ Ta morketi xoonetishin ta ayfen be7as; tana un7etheysati waassishin ta haythan si7as.

¹² Xilloti zambada diccana; Libaanose zigada daayana.

¹³ Enti Godaa keethan toketida mitha mela; enti nu Xoossaa dabaaban daana.

¹⁴ Enti ceeggidika ayfana; enti irxanne cil7o gididi daana.

¹⁵ Enti, “Goday suure; I ta zaalla; iyan iitatethi baawa” yaagana.