Mazmure 83 - Geeshsha Maxaafa

Xoossaw Si77i Goopa

Asaafa Mazmure

¹ Abeeti Xoossaw, si77i goopa; Xoossaw sirphi goopa; muumopa.

² Ne morketi ne bolla dendeysa, nena ixeysati ne bolla makalleysa be7a.

³ Enti ne asaa bolla geeman duulatoosona; neeni dosiya asaa bolla maqetoosona.

⁴ “Haayite, enta kawotethaa dhaysoos; Isra7eele geetetiya sunthay merinaw hassayetonna mela oothoos” yaagosona.

⁵ Enti issi wozanan gididi maqetoosona; ne bolla dendanaw caaqidosona.

⁶ Enti, Edoomenne Isma7eela asaa, Moo7abenne Aggaari kochata;

⁷ Gebaalanne Amoone asaa, Amaaleqa, Filisxeemenne Xiroosa asaa.

⁸ Asooreti entara gahetidosona; Asooreti Looxe asaas wolqaama maado gididosona. Salaha

⁹ Neeni, Midiyaame, Sisaaranne Yabina bolla Qisoona shaafan oothidaysada enta bolla ootha.

¹⁰ Enti Endooran dhayidosona; enta ahay denban wooqidi attis.

¹¹ Enta halaqata Oreebanne Zebada ootha; enta haareyisata Zabheelanne Silmanada dhaysa.

¹² Enti, “Nuuni Xoossaa asaa laata nuus buzo oothana” yaagidosona.

¹³ Ta Xoossaw, enta baanada laalla; carkoy efiya suullada ootha.

¹⁴ Tami wora meysada, tama lacoy deriya xuuggeysada,

¹⁵ ne uushuwan enta yedetha; ne gotiyan enta dagantha.

¹⁶ Godaw, asay ne sunthaa koyana mela, enta som7uwa yeella mayza.

¹⁷ Enti merinaw yeellato; hirgo; kawuyidi dhayo.

¹⁸ Ne sunthay Godaa gidida ne xalaali, Ubbaafe Dhoqa Xoossay, sa7a ubbaa haareysa enti ero.