Mazmure 81 - Geeshsha Maxaafa

Shaqara Ba7aale Wode Yexiya Saba

Zammaareta halaqaas xaafetida Suusul7en yexetiya Asaafa Mazmure

¹ Nuus wolqa gidida Xoossaas ufaysan yexite; Yayqooba Xoossaas ililite.

² Yethi doomite; karaabo baqite; diithaninne maasinqon yexite.

³ Ageeni xeeriya wode, qassi dhuma uttiya wode, ba7aale gallasan moyze punnite.

⁴ Hessi Isra7eele biittan higge; Yayqooba Xoossay immida woga.

⁵ I Gibxe biitta shocida wode, Yoosefa kochaas ha wogaa awaajis. Eronna doonan haysada yaagishin si7as;

⁶ “Hinte hashiya toohope, hinte kushiya keeshepe shempisas.

⁷ Hinte metuwan tana xeegideta; ta hintena ashshas; taani dechiya shaara giddofe hintena allas; Mariba pultuwa matan ta hintena paacas.” Salaha

⁸ “Ta asaw, ta hintena seereysa si7ite; Isra7eele asaw hinte tana si7iko aybee?

⁹ Hinte giddon allaga xoossi de7opo; hara xoosse goyinnofite.

¹⁰ Gibxe biittafe hintena kessida, taani Godaa hinte Xoossaa; Ne doona loythada hakanka; taani iyan kunthana.

¹¹ “Shin ta asay tana si7ibookona; Isra7eeley taw kiitetibeenna.

¹² Hessa gisho, enti banta qofaa kaallana mela, simmonna enta wozanaas aathada immas.

¹³ Ta asay tana si7idaako aybe; Isra7eeley ta ogiya kaallidaako aybi de7i;

¹⁴ Taani enta morketa eeson xoonanashin; enta ixeyisata bolla ta kushiya denthanashin.

¹⁵ Godaa ixeysati iya sinthan hokana; enta seeray merinaw gidana.

¹⁶ Taani hintena lo77o giste muzana; zaallafe keyiya eessan hintena kalsana.”