Mazmure 76 - Geeshsha Maxaafa

Xoossa Sinthan Eqanay Oonee?

Asaafi Zammaareta Halaqaas Diithan Yexida Mazmure.

¹ Xoossay Yihudan eretis; iya sunthay Isra7eelen gita.

² Iya dunkaaney Saalemana; I de7iya bessay Xiyoonena.

³ Yan xongetiya morke dongiya, gondalle, mashshenne ola miisheta mentherethis. Salaha

⁴ Abeeti Xoossaw, ne bonchoy ay mela gite! Neeni ne morketa xoonada zumaape simmiya wode, ne teemay ay mela yashshi!

⁵ Gooba tooranchoti bonqetidosona; enti wolqaama dhisko dhiskidosona; entafe issoyka ba kushiya denthibeenna.

⁶ Abeeti Yayqooba Xoossaw, ne seerida wode, para asatinne parati kundidi attidosona.

⁷ Shin abeeti Xoossaw, neeni yashshaasa; ne hanqoy suulliya wode, ne sinthan oone eqanay?

⁸ Neeni pirdaa salope sissida wode, biittay dagaman si77i gis.

⁹ Neeni biittan qohetida asaa ashshanawunne entaw pirdanaw dendiya wode hessi hannis. Salaha

¹⁰ Ne ase hanqikoka new boncho gidees; Olape attida asati ne ba7aale bonchana.

¹¹ Godaas hinte Xoossaas qangethi gathite; hinteno iya matan de7iya kawotethato, yashshiya iyaw imota ehite.

¹² I halaqata ayyaana kawushshees; wolqaama kawotaka daganthees.