Mazmure 72 - Geeshsha Maxaafa

Ufaysan Naagetiya Kawa

Solomone Mazmure

¹ Xoossaw, ne suure pirdaa kawas, nu xillotethaa kawa na7aas imma.

² I ne asaas xillotethan pirdana; qohetidaysatas suuren daynnatana.

³ Dereti duretethi, zumati xillotetha ayfe ne asaas ayfo.

⁴ Kawoy qohetidaysata gisho mooteto; manqota ashsho; un7etheyisata mentho.

⁵ Xoossaw, I awadanne ageenada de7o; yeletethaafe yeletethaa gakanaw de7o.

⁶ Kawoy goshshan bukiya ira melanne biitta kalsiya puuse ira mela gido.

⁷ Iya laytha ubban xillo asati daayo; ageeni dhayana gakanaw sarotethi daro.

⁸ Abbaafe abba gakanaw, Efraxiisa shaafape sa7aa gaxa gakanaw I haaro.

⁹ Bazzon de7iya asati iya goyinno; iya morketi baana laaco.

¹⁰ Tarsesanne yuushoy abban teqetida biittata, kawoti iyaw giira giiro; Arabenne Tophe kawoti iyaw imota eho.

¹¹ Kawoti ubbay iyaw gulbato; kawotethati ubbay iyaw kiiteto.

¹² Iyako waassiya manqota, qohetidaysatanne maadoy baynayisata I ashshana.

¹³ Manqotasinne daaburanchotas I qadhetees; manqota shempuwa hayqope ashshees.

¹⁴ Enta suuthay iya sinthan al7o gidiya gisho, I, enta qohopenne iitape wozana.

¹⁵ Kawoy daro laythi gam7o; Arabe biitta worqay iyaw yo. Asay iya gisho ubba wode woosso; gallas ubban I anjeto.

¹⁶ Biittan kathi palaho; dereti kathan kametto. Libaanose deriya bolla kathi ayfiyada ayfo; denbi maatan kumiyada asay katamaa kumo.

¹⁷ Kawa sunthay merinaw de7o; awada ubba wode xeegetishe gam7o. Asa ubbay iya baggara anjetana; kawotethati iya “anjetidaysa” yaagana.

¹⁸ Malaalisiyaba barka oothiya Goday, Xoossay Isra7eele Xoossay galatetto.

¹⁹ Iya boncho sunthay merinaw galatetto; iya bonchoy sa7a ubbaa kumo. Amin7i! Amin7i!

²⁰ Isseye na7aa Dawita woosay haysan poletis.