Mazmure 70 - Geeshsha Maxaafa

Xoossaw Tana Maaddanaw Gam7ofa

Dawita Qofiso Mazmure

¹ Abeeti Xoossaw tana ashshanaw haa simma; abeeti Godaw, tana maaddanaw ellesa.

² Tana wodhanaw koyeysati, yeellatonanne haniyaba dhayo. Ta qohetetha amotteysati, kawuyidi guye simmo.

³ Taako iyaw “hashshu! hashshu!” gidaysati xoonetida gisho yeellato.

⁴ Nena koyiya ubbay nenan ufaytonne malaaleto. Qassi ne atotetha dosiya ubbay, “Xoossay gitato” yaago.

⁵ Taani manqonne metootancho; abeeti Xoossaw, ellesada taako haaya. Ta maadeynne tana ashshey nena gidiya gisho; abeeti Godaw, gam7ofa.