Mazmure 67 - Geeshsha Maxaafa

Ne Som7uwa Nuus Poo7isa

Zammaareta Halaqaas Diithan Yexetida Saba Mazmure.

¹ Xoossay nuus qadheto; nuna anjo; iya som7oy nu bolla poo7o. Salaha

² Ne ogey biitta bolla, ne atotetha wolqay, kawotethata ubban ereto.

³ Abeeti Xoossaw, asay nena galato; asa ubbay nena galato.

⁴ Kawotethay malaaletidi ufaysan yexo; ayis giiko, neeni asaas xillotethan pirdaasa; sa7an de7iya kawotethata kaalethaasa. Salaha

⁵ Abeeti Xoossaw, asay nena galato; kawotethati ubbay nena galato.

⁶ Biittay kathi immana; Xoossay, nu Xoossay nuna anjis.

⁷ Xoossay nuna anjida gisho, biitta gaxaa gakanaw de7iya asay iya yayyo.