Mazmure 57 - Geeshsha Maxaafa

Ne Bonchoy Sa7a Ubban Gido

“Dhaysofa” geetetiya diitha cuudhethan yexetida woosa.

¹ Tana maara; abeeti Xoossaw, tana maara; ta neeko baqatayis. Dhayoy aadhana gakanaw, ne qefiya garsan qosetayis.

² Taani Ubbaafe dhoqa Xoossako, ba qofaatho oothiya Xoossako waassayis.

³ Xoossay salope maado kiittidi tana ashshana; tana yedheyisata kawushana; Xoossay ba siiquwanne ba ammanetetha taw kiittana. Salaha

⁴ Taani ta morketape giddon, ase miya gaammotape giddon de7ayis. Enta achay tooranne donge toora mela; enta inxarsay qara mashsha mela.

⁵ Abeeti Xoossaw, ne salope aadhada dhoqu dhoqu ga; ne bonchoy sa7a ubbaa kammo.

⁶ Enti ta tohuwas xihe wothidosona; taani un7etada hokas. Enti ta ogiyan olla bookidosona; shin he ollan bantaw kundidosona. Salaha

⁷ Ta wozanay mino; abeeti Xoossaw, ta wozanay mino; taani nena mazmuren sabbana.

⁸ Ta shempe, barka; diithinne maasinqoy dendite; taani guura barkana.

⁹ Abeeti Godaw, ta nena asaa giddon galatana; kawotethata giddon nena sabbana.

¹⁰ Ne siiqoy salotape dhoqa; ne ammanetethay shaarape bolla.

¹¹ Abeeti Xoossaw, ne salope aadhada dhoqu dhoqu ga; ne bonchoy sa7a ubbaa kammo.