Mazmure 55 - Geeshsha Maxaafa

Ne Toohuwa Xoossa Bolla Yegga

Dawiti Zammaareta Halaqaas Diithan Yexida Akeeka Mazmure.

¹ Abeeti Xoossaw, ta woosa si7a; ta magannuwa qelli goopa.

² Tana si7a; ta woosaas zaaro imma; ta qofay tana waaysin, ta un7etas.

³ Ta morketa girsa si7ada dagammas; iitata mandiya gaason kokoras. Enti ta bolla meto ehoosona; yilon dendidi tana morkoosona.

⁴ Ta wozanay dirgees; hayqo hirgay tana wodhees.

⁵ Tana yashshinne kokorsi oykis; iita dagami ta bolla wodhis.

⁶ Holleda taw qefey de7iyako, paallada shempoy de7iya bessi gakanashin.

⁷ Taani haakada baanashin; bazzon aqanashin. Salaha

⁸ Taani gotepenne carkofe baqatada, ta qosetiya bessi demmanashin.

⁹ Abeeti Godaw, katamaa giddon ooshshinne gene be7ida gisho iitata odaa laalla.

¹⁰ Iitati gallasinne qamma katamaa gimbe dirsaa yuuyosona; waayeynne metoy katamaa giddon de7ees.

¹¹ Dhayoy iya giddon de7ees; naaqoynne cimoy iya dabaabape shaaketenna.

¹² Tana cayey ta morkiya gidenna; iya gidiyako ta danda7anashin. Ta bolla ceeqetey tana ixeysa gidenna; iya gidiyako ta iyape qosetanashin.

¹³ Shin hessa oothey nena, ta laggiya; ta dabbuwanne ta siiquwa.

¹⁴ Nu issoy issuwara ulo oda odetida; Xoossa keethan dabaaban asaara issife simeretida.

¹⁵ Enta wozanan iitatethi de7iya gisho, ta morketi qoponna hayqo; enti paxa de7ishe duufo gelo.

¹⁶ Shin taani Xoossaa xeegana; Goday tana ashshana.

¹⁷ Wonta, gallasinne omarsi waassana; ta metuwa iyaw odana; I tana si7ana.

¹⁸ Daroti tana morkikoka, I tana toorape ashshees.

¹⁹ Benipe ba araatan uttida Xoossay, banta ogiya laammonna gishonne iyaw yayyonna gisho tana si7idi enta kawushana. Salaha

²⁰ Ta laggey ba dabbota qohis; entara caaqida caaquwa menthis.

²¹ Iya doonay oysape liiqo; shin ba wozanan ola denthees. Iya inxarsay zaytepe aadhida shugo; shin qanxanaw giigida qara mashsha mela.

²² Ne toohuwa Xoossa bolla yegga; I nena katisana. Xoossay xilloti, dagammana mela oothenna.

²³ Shin Abeeti Xoossaw, iita asata wolqaama ollan holana. Suuthu gusseysatinne cimmeysati, banta laythaafe baggaaka de7okona; shin taani nenan ammanetana.