Mazmure 52 - Geeshsha Maxaafa

Xoossa Siiqoy Merinaasa

Edoome biitta asi gidida Doyqi Saa7olako bidi, “Dawiti Abimeleke soo bis” yaagidi odi simmin, Dawiti xaafida mazmure.

¹ Neno, wolqaama uraw, iitatethan ayis otortay? neno Xoossan kadhetidayso ubba wode ayis ceeqetay?

² Neno, wordo odeteyso, ne harata dhaysanaw maqetaasa; ne inxarsay qara maqla mela.

³ Ne lo77o aggada iita dosaasa; tuma aggada wordo odetaasa. Salaha

⁴ Neno, wordanchuwaw, ne bosha qaala ubbaa dosaasa.

⁵ Xoossay nena merinaw menthana; Xoossay nena mentherethananne ne keethaafe dafidi kessana; nena de7on de7eyisata giddofe shoddidi yeggana. Salaha

⁶ Xilloti hessa be7idi yayyana; enti haysada yaagidi, ne bolla miicana;

⁷ “Xoossaa baw geshe oothiboonna, ba duretethan ammanetida, iita ooson minnida, addiya haysa be7ite” yaagana.

⁸ Shin taani Xoossaa keethan aaciya shamaho mela; iya siiquwan taani merinaw ammanetayis.

⁹ Ne oothida gisho merinaw ta nena galatana; neeni lo77o gidiya gisho ne sunthan ufaysi oothana; geeshshata sinthan ta nena sabbana.