Mazmure 51 - Geeshsha Maxaafa

Taw Geeshsha Wozana Imma

Dawiti Barsaabera laymatida wode nabiya Naatani iyaw odi simmin Dawiti yexida mazmure.

¹ Abeeti Xoossaw, ne merinaa siiquwada tana maara; ne qadheta daruwa mela ta nagaraa qucha.

² Ta iitatethaafe tana meecca; ta nagaraape tana geeshsha.

³ Taani ta qohuwa erayis; ta nagaray ubba wode ta sinthana.

⁴ Taani nena, ne xalaala qohas; ne sinthan iitabaa oothas. Hessa gisho, ne hanquwan ne like; ne pirdanka ne xillo.

⁵ Heko ta yeletiya wode nagarancho; ta aaye ulon buroo attiya, wodepe doomada taani nagarancho.

⁶ Neeni asa wozanape tumatethi koyaasa; ta gaatha asatethaa cincatethi tamaarsa.

⁷ Hisoophe boncon tana wurxa; ta geeyana; tana meecca; ta shachafe aadhada booxana.

⁸ Ne tana ufaysinne lo77oba sissa; ne mentherethida ta meqethaa zaarada ufaysa.

⁹ Ne som7uwa ta nagaraape hara soo zaara; ta bala ubbaa qucha.

¹⁰ Abeeti Xoossaw, geeshsha wozana tanan medha; qaaxonna ayyaana ta giddon ooratha.

¹¹ Tana ne sinthafe yeggofa; ne Geeshsha Ayyaana taape ekofa.

¹² Ne atotetha ufaysaa taw zaara; ta new kiitetana mela tana zempisa.

¹³ Ta he wode higge mentheyisata ne ogiya tamaarsana; nagaranchotika neeko simmana.

¹⁴ Abeeti Xoossaw, tana ashshiya Xoossaw, suuthu gussiya nagarape tana ashsha; he wode ta inxarsay ne xillotetha yexana.

¹⁵ Abeeti Godaw, ta doona dooya; ta inxarsay ne galataa awaajana.

¹⁶ Ne yarshon ufaytiyako, ta new yarshanashin, ne xuussa yarshon ufaytaka.

¹⁷ Xoossaa yarshoy aada ayyaana; Xoossaw, ne meqidanne kawuyida wozanaa kadhaka.

¹⁸ Abeeti Xoossaw, dosan Xiyoones keeha; Yerusalaame gimbeta gimba.

¹⁹ He wode ne xillotetha yarshoninne xuussa yarshon ufaytana. pollo shiqiaya mehe yarshon ne ufaytana; kormati ne yarsho bessan yarishetana.