Mazmure 50 - Geeshsha Maxaafa

Xoossay Tuma Daynna

Asaafa Mazmure

¹ Wolqaama Goday, Xoossay odees; dolohape wuloha gakanaw biitta ubbaa xeegees.

² Medhon polo yegelsi gidida Xiyoonepe Xoossay poo7ees.

³ Nu Xoossay yaana; si77i geenna; eexiya tamay iya sinthana; wolqaama gotey iya yuushuwana.

⁴ Xoossay ba asaa pirdiya wode, salotanne sa7aa xeegees.

⁵ “Yarshon taara caaqida, ta geeshshata taako shiishite” yaagis.

⁶ Xoossay pirdiya gisho, saloti iya xillotethaa awaajosona. Salaha

⁷ “Ta asaw, si7ite; ta hintew odayis; Isra7eele asaw, ta ne bolla markatana; taani Xoossay, ne Xoossaa.

⁸ Ne yarshuwa gishonne ne xuussa yarshuwa gisho, nena borike.

⁹ Ne daraape kormata, ne girbiyafe kole ekanaw koyke.

¹⁰ Woran de7iya do7ati ubbay tabaa; mukulu zumaa bolla de7iya mehetika taassa.

¹¹ Taani dhoqa deriyan de7iya kafota ubbaa erayis; denban de7iya medhetethati tayisata.

¹² Tana koshaykoka nena oychike; sa7inne sa7an kumidaba ubbay tabaa.

¹³ Taani kormata ashuwa maynayee? woyko deeshata suuthaa uyanayee?

¹⁴ Xoossas galata yarsho imma; Ubbaafe dhoqa Xoossaas ne qangetha gatha.

¹⁵ Meto gallas tana xeega; ta nena ashshana; neka tana bonchana” yaagees.

¹⁶ Shin Xoossay iita asaa haysada yaagees; “Ta higgiya ne nabbabanaw new ay maati de7ii? Woyko ta caaquwa ne doonan qoncisanaw new ay maati de7ii?

¹⁷ Neeni ta timirtiya ixadasa; ta qaala guye yeggadasa.

¹⁸ Kaysuwa be7ida wode neeni iyara dabbotadasa; laymateyisata maabaran geladasa.

¹⁹ Ne doona iitabaa odetanaw billa yeddadasa; Ne inxarsay wordo haasaya meezetis.

²⁰ Uttada ne ishaa zigiradasa; ne aaye na7aa bolla iitaba odetadasa.

²¹ Ne haysa ubbaa oothiya wode, taani si77i gida gisho tana ne mela gada qopadasa. Shin ha77i ta nena hanqana; ne nagaraa ne sinthan taybana.

²² Hinteno, Xoossaa dogeysato, haysa akeekite; hessi hanonna ixiko ta hintena mentherethana; he wode hintena ashshanay baawa.

²³ Taw galata yarshey tana bonchees; ba ogiya suurisida asas taani Xoossaa atotetha bessaana” yaagees.