Mazmure 48 - Geeshsha Maxaafa

Xiyooney Nu Xoossa Zuma

Qore Nayta Mazmure

¹ Goday gita; nu Xoossaa kataman iya geeshsha zumaa bolla gita galati iyaw bessees.

² Biitta ubbaa ufaysi gidida, pudeha baggara de7iya Xiyoone derey, dhoqanne lo77o; I gita kawa katama.

³ Xoossay he gimbiya giddona; ika iyaw geshe gideysa erisis.

⁴ Kawoti banta tooranchotara shiiqidosona; Xiyoone olanaw yidosona.

⁵ Iya be7idi dagammidosona; guye simmidi baqatidosona.

⁶ Enti yan de7ishe yashshan kokoridosona; iqethi oykida maccasada inxaxidosona.

⁷ Doloha bagga wolqaama carkon meqiya Tarsesa markabeta mela gididosona.

⁸ Nu si7idaysada, Ubbaafe Wolqaama Godaa kataman, nu Xoossaa kataman I oothidaba be7ida; Xoossay he katamaa merinaw minthidi naagees. Salaha

⁹ Abeeti Xoossaw, ne keethan merinaa ne siiquwa qopoos.

¹⁰ Abeeti Xoossaw, ne sunthada ne galatay sa7aa gaxaa gakis; ne ushacha kushey xillotethan kumidaysa.

¹¹ Ne pirdaa gaason Xiyoone asay ufayto; Yihuda kumethay ufaysan ililo.

¹² Xiyoone yuushuwan hemetite; I dirsa yuuyite; I shakota taybite.

¹³ Yaa yeletas odana mela iya gimbiya akeekite; miixata wochite.

¹⁴ Hinte, “Merinaw Xoossay nu Xoossaa; I nuna hayqana gakanaw kaalethana” yaagidi odite.