Mazmure 45 - Geeshsha Maxaafa

Xoossaa Araatay Merinaasa

Akeekan xaafida siiqo mazmure.

¹ Taani ta yethaa kawas sissana; ta wozanay lo77o qofa pultees; ta inxarsay lo77o xaafiya asa bi7ire mela.

² Asa ubbaafe neeni mala lo7o; ne mettershay aadho keehatetha qaalan kumis; Xoossay nena merinaw anjis.

³ Wolqaama kawaw, ne mashshaa danca; bonchonne teema ma7a.

⁴ Ne tumatethaa, ne aadatethanne ne xillotetha gisho, ne teema ma7ada xoonanaw denda; ne ushacha kushey malaalsiyaba besso.

⁵ Ne toorati qara; enti kawa morketa wozanaa caddo; kawotethati ne tohuwa garsan kundo.

⁶ Xoossaw, ne araatay merinaw de7ees; ne kawotethaa xam7ay xillotetha xam7aa.

⁷ Neeni xillotethi dosada geellatethi ixaasa; Hessa gisho, Xoossay, ne Xoossay, ne laggetape aathidi, nena ufaysa zayten tiyis.

⁸ Godare uuthan, karbeninne burguden walaketida shitton, ne ma7oy puuketis. Dangarsa zaalen alleeqetida, ne kawo gadhon diixetiya diithay nena ufaysees.

⁹ Kawo keethan de7iya maccasata giddon; kawota macca nayti de7oosona. Kawiya Ofira worqan alleeqetada, neepe ushacha baggan eqasu.

¹⁰ Ta naatte, si7a; wozanan wotha; ne haytha haa zaara; ne deriyanne ne aawa keethaa doga.

¹¹ Kawoy ne malan ufaytis; ne godaa gidiya gisho iya boncha.

¹² Xiroosa asay new woyto ekidi yaana; dureti nena aaddashana.

¹³ Kawa na7iya, kawo keethan waanna lo77ay! I yaagano ma7oy worqan alleeqetis.

¹⁴ Ba alleeqo ma7uwa ma7ada, kawako moyzetasu. I geela7o laggeti iyo kaallidi, iya sinthe ekidi yidosona.

¹⁵ Enti ufaytishe yidi, kawo gadho geloosona.

¹⁶ Kawaw, ne aawata bessaa ne nayti laattana; biitta ubban ne enta shuumana.

¹⁷ Ta ne sunthaa yeleta ubban, hassayetanaada oothana. Hessa gisho, asay merinaw nena galatana.