Mazmure 40 - Geeshsha Maxaafa

Maade Demmanaw Woossiya Woosa

Zamaareta halaqaas Dawiti xaafida mazmure.

¹ Taani Godaa danda7an naagas; I taako simmidi ta waasuwa si7is.

² Dhayo ollafe, silimo urqafe tana kessis; ta tohuwa zaalla bolla essis; ta hemethaa minthis.

³ Ta doonan ooratha yethi wothis; hessika nu Xoossay galatetto yaageysa; daroti be7idi yayyana; Godan ammanetana.

⁴ Godan ammanetiya, otoranchota xeellonnay, wordotara hemetonnay, anjetida asi.

⁵ Godaw, ta Xoossaw, neeni daro malaalsiyaba oothadasa; neera liketey oonika baawa! Neeni nuus qopida lo77o qofaa, oonika taybanaw danda7onna; Hessi taani odin wuriyaba gidenna.

⁶ Neeni yarshonne imo koyabaaka; shin nena si7ana mela ta haythaa dooyadasa; xuussa yarshonne nagara yarsho koyabaaka.

⁷ Hessa gisho taani, “Xaatha maxaafan tabay xaafetidaysada taani yas.

⁸ Ta Xoossaw, taani ne sheniya oothanaw dosayis; ne higgey ta wozanan de7ees” yaagas.

⁹ Gita shiiqon, ne xillotetha odana; Godaw neeni ereysada, taani markateysa aggike.

¹⁰ Ta ne xillotethaa ta wozanan qosabike; ne ammanetethanne ne ashuwa odas. Ne siiquwanne ne tumatethaa, gita shiiquwan genthabike.

¹¹ Godaw, ne maarotethaa taape haassofa; ne siiqoynne ne tumatethay, tana ubba wode naago.

¹² Tayboy bayna iitabay tana teqis; ta balay tana goozis; ta xeellanaw danda7ike Ta nagaray ta huuphe binaanape daris; ta wozanay ta giddon til7is.

¹³ Godaw, tana ashshanaw ero ga; ta Godaw, tana maaddanaw ellesa.

¹⁴ Tana wodhanaw koyeysati yeellato, kawuyo; Ta qohetetha amotteysati kawuyidi guye simmo.

¹⁵ Taako, “Iyaw hashshu, hashshu” geysati xoonetidi yeellato.

¹⁶ Shin nena koyiya ubbay, nenan ufayto; hashshu go. Ne atotetha dosiya ubbay, “Goday gita” yaago.

¹⁷ Taani manqonne metootancho; shin Goday tabaa qopo! Tana maaddey ashshey nena; ta Xoossaw, gam7ofa.