Mazmure 39 - Geeshsha Maxaafa

Gita Xoossi-Laafa Asi

Dawiti zammaareta halaqa, Edotaames xaafida mazmure.

¹ Taani, “Ta inxarsan nagara oothonna mela, ta ogiya naagana. Iita asati ta de7iya wode, ta doona barana” yaagas.

² Shin doona muumeda si77i gas; hari attoshin lo77oba odeteysa aggas; shin ta waayey haa daris.

³ Ta wozanay ta gaathan teellis; ta qofay tamada eexis; yaatin ta inxarsan haasaya doomas.

⁴ Godaw, ta de7uwa wursethaanne ta daanaw attida gallasaa tana bessa; ta de7oy ay mela qantheko tana erisa.

⁵ Neeni ta laytha takadhada wothadasa; Ta laythay ne sinthan baynaba mela; tuma asi ubbay issi shempo mela. Salaha

⁶ Tuma asi aadhiya eesho mela; I coo daaburees; shalo shiishees; shin ooni go7etaneko erenna.

⁷ Godaw, ha77i ta naagey oonee? Taani nenan ufaysi oothayis.

⁸ Ta bala ubbaafe tana ashsha; eeyatan tana tooshisopa.

⁹ Hessa ubbaa oothiday nena gidiya gisho taani muumas; doonaka pogabike.

¹⁰ Ne xam7a ta bollafe dentha; mino ne kushiya gaason ta daaburas.

¹¹ Ase iya nagaraa gisho seerasa; iya al7o de7uwa bilada wursaasa; tuma asi ubbay issi shempo mela. Salaha

¹² Godaw, ta woosa si7a; tana maaddanaw ta waasuwa hayza. Ta afuthaa be7ada si77i goopa; taani ta aawatada bete asinne imathe gidada neera de7ayis.

¹³ Ta shaaketanapenne baanape sinthe taani ufaytana mela tana agga.