Mazmure 37 - Geeshsha Maxaafa

Xoossay Ba Asaa Aggenna

Dawita Mazmure

¹ Iitaa ootheyisata gaason yilotopa; nagara ootheyisata qanaatopa.

² Enti maatada eeson melana; boncoda shullidi qoqofetana.

³ Godan ammaneta; lo77oba ootha; biitta bolla utta; palahin de7a.

⁴ Godan ufayta; I ne wozanaa amuwa immana.

⁵ Ne ogiya hadara Godaas imma; iyan ammaneta; I new oothana.

⁶ I ne xillotethaa wonta xalqeda, ne pirdaa seeta gallasa awada poo7isana.

⁷ Godaa sinthan si77i gada de7a; danda7an naaga; Iita asata halchoy poletin be7ada yilotopa.

⁸ Hanqo agga; yilo teqa; hessi meton yeggees.

⁹ Iita ootheysati dhoqolletidi dhayana; shin Godan ufaysi wotheysati biitta laattana.

¹⁰ Iita ootheysati guutha wodepe guye de7okona; ne enta koyada demmaka.

¹¹ Shin aadati biitta laattana; sarotethan ufaytidi daana.

¹² Iita asi lo77o asi dhaysanaw maqetees; ba acha enta bolla garcees.

¹³ Shin Goday iitata bolla miicees; entaw dhayo gallasi yeysa erees.

¹⁴ Iita asati manqotanne metootanchota wodhanaw, suure hemeteyisata shukanaw, banta mashsha shoddoosona; banta dongiya waaxoosona.

¹⁵ Shin enta mashshay enta wozanan gelana; enta dongey meqana.

¹⁶ Xillo asas de7iya guuthabay, iita asas de7iya darobaape lo77o.

¹⁷ Ayis giiko, iitata wolqay meqana; shin Goday xillota zempisees.

¹⁸ Suure asata ogiya Goday erees; enta laatay merinaw entaba gidana.

¹⁹ Iita wode suure asati yeellatokona; kosha wode enti kallidi maana.

²⁰ Shin iita asati hayqana; Godaa morketi ciishshada qoqofetana; cuyada ayfepe geemmana.

²¹ Iita asi tal7idi zaarenna; shin xillo asi keehatethan immees.

²² Godan anjetidaysati biitta laattana; shin I baaddidaysati dhayana.

²³ Asa ogey Godaa ufaysiko, Goday iya tanguwa kaalethees; minthees.

²⁴ I dhubetikoka kundenna; Goday iya kushiya oykidi katisees.

²⁵ Taani paamas; ha77i cimas; shin xillo asi yegetin, iya nayti kathi woossishin be7abike.

²⁶ I ubba wode keehatethan immees; coo tal7ees; iya nayti haratas anjo gidana.

²⁷ Iitape haaka; lo77o ootha; ne adussa laythi daana.

²⁸ Goday xillo pirda dosees; ammaneteyisata I yeggenna. Enti merinaw naagetoosona; shin iitata kochay dhayana.

²⁹ Xilloti biitta laattana; yan merinaw daana.

³⁰ Xillo asa doonape cincatethi keyees; iya inxarsay xillo odetees.

³¹ Xoossa higgey iya wozanan de7ees; iya tohoy dhubetenna.

³² Iita asi xillo asi geeddees; iya wodhanaw koyees.

³³ Shin Goday iya kushen aathidi immenna; pirdetanaw eqiya wode iya bolla pirdisenna.

³⁴ Godan ufaysi ootha, iya kiitaa naaga; nena biitta laatisidi gitayana; iita asati dhayishin ne be7ana.

³⁵ Nagaranchoy Libaanose zigada, diccidi dhoqu dhoqu gin ta be7as.

³⁶ Shin ta simmada yan demmabike; koyinka bentibeenna.

³⁷ Borey bayna asi be7a; suure asi akeeka; saro asas wursethay lo77o gidana.

³⁸ Shin nagaranchoti dhayana; enta wursethay dhoommana.

³⁹ Xillota atotethay Godaape yees; I meto wode enti naagetidi attiya besse.

⁴⁰ Goday xillota maaddees; ashshees; enti iyako baqatida gisho, I enta iitatape ashshees; naagees.