Mazmure 36 - Geeshsha Maxaafa

Al7o Gidida Xoossa Siiqo

Godaa aylley, Dawiti zammaareta halaqaas xaafida mazmure.

¹ Iita asi ba wozanan iitabaa qopees; I ba wozanan Xoossas yayyenna.

² I bana daro nashshiya gisho; ba nagaraa be7anaw woyko ixanaw danda7enna.

³ Iya doonan geneynne wordoy kumis; Cincatethinne lo77oba ooso aggis.

⁴ Ba hiixan zin7idi gene qopees; bana lo77o gidonna ogen kaalethees; iitabaa ixenna.

⁵ Godaw, ne siiqoy salota gakees; ne tumatethay shaarape aadhees.

⁶ Ne xillotethay dhoqa deretape aadhees; ne pirday abba ciimmuwafe ziqa; Godaw, neeni asenne do7a naagasa.

⁷ Xoossaw, ne siiqoy ay mela al7o! Asay ne qefiya garsan qosetidi attees.

⁸ Enti ne gibiraape midi kalloosona; ne keehatetha shaafape uyidi aloosona.

⁹ De7o pultoy neepe keyees; ne poo7uwan nuuni poo7o be7oos.

¹⁰ Nena ereysatas ne siiqoy, wozana suuretas ne xillotethay qanxetenna.

¹¹ Otoranchota tohoy tana yedhofo; nagaranchota kushey tana yedethofo.

¹² Iita asata kundethaa be7ite; enti kundidosona; dendanaw danda7okona.