Mazmure 34 - Geeshsha Maxaafa

Xoossay Keeha Gideysa Be7ite

Dawiti gooshshu daanidi shiiqida gisho, Abimeleke sinthafe goodetidi keyda wode yexida mazmure.

¹ Taani ubba wode Godaa galatana; iya galatay ta doonape pacenna.

² Taani Godan ceeqetayis; aadati hessa si7idi ufayto.

³ Taara Godaa bonchite; iya sunthaa issife dhoqu dhoqu oothoos.

⁴ Taani Godaa koyin, I taw zaaris; ta yayyiyaba ubbaafe tana ashshis.

⁵ Iyako xeelliya ubbay poo7osona; enta som7oy yeellatenna.

⁶ Ha manqoy waassis; Goday iya waasuwa si7is; iya meto ubbaafe iya ashshis.

⁷ Godaa kiitanchoy iyaw yayyeyisata naagees; enta yuushon gididi enta ashshees.

⁸ Goday keeha gideysa laacidi be7ite; iyako baqatiya asi anjetidaysa.

⁹ Hinteno, geeshsha asaw, Godaas yayyite; iyaw yayyeysatas aykoyka pacenna.

¹⁰ Gaammoti miyaba dhayidi koshatoosona; shin Godaa koyeysatas lo77obay pacenna.

¹¹ Nayto, haa yiite; si7ite; ta hintena Godaa yashshi tamaarsana.

¹² Lo77o de7o daanawunne keehaba be7anaw adussa laythi daanaw, amottey oonee?

¹³ Ne inxarsay iitabaa odetonaada, ne doonay cimmonnaada teqa.

¹⁴ Iitape haaka; lo77oba ootha; sarotethi koya; kaalla.

¹⁵ Godaa ayfey xillota xeellees; iya haythay enta waasuwa si7ees.

¹⁶ Enta qofisiyaba biittafe dhaysanaw, Goday iita ootheyisata ba hanqo ayfen xeellees.

¹⁷ Xilloti waassoosona; Goday enta waasuwa si7ees; I enta meto ubbaafe ashshees.

¹⁸ Wozani meqidaysatas Goday matana; I ufaysi qanxidaysata ashshees.

¹⁹ Xillo asas metoy daro; shin Goday iya he ubbaafe ashshees.

²⁰ Goday iya meqethata naagiya gisho, entafe issoyka meqenna.

²¹ Iitata enta iitatethay wodhana; xillota ixeysati pirdetana.

²² Goday ba aylleta wozees; iyako baqatiya oonika pirdetenna.