Mazmure 33 - Geeshsha Maxaafa

Keeha Xoossay Sabeto

¹ Hinteno, xilloto Godaas ufaysan ililite; suure asati iya galatanaw bessees.

² Maasinqon Godaa galatite; tammu shayan waaxetida diithan yexite.

³ Ooratha yethi iyaw yexite; diithi loythidi diixishe ililite.

⁴ Godaa qaalay tuma; iya ooso ubbay ammaneteysa.

⁵ Goday xillotethinne tuma pirda dosees; iya maarotay sa7aa kumis.

⁶ Godaa qaalan saloti medhetidosona; iya doonape keyiya shempuwan salon de7iya medhetethati yeletidosona.

⁷ Abba haatha issi bessan eelisis; ciimmo haatha minja keethan wothis.

⁸ Sa7a ubbay Godaa yayyo; asa ubbay Godaa boncho.

⁹ Iya odan ubbay hanis; I kiittin minnidi eqis.

¹⁰ Goday kawotethata halchuwa hada oothees; enta qofaa laallees.

¹¹ Godaa halchoy merinaw eqidi de7ees; iya wozanaa qofay yeletetha ubbaasa.

¹² Xoossay entaw Godaa gidida kawotethay, I babaa oothidi doorida asay anjetidaysata.

¹³ Goday salon uttidi xeellees; asa koche ubbaa be7ees.

¹⁴ Goday ba araatan uttidi, sa7an de7iya ubbaa be7ees.

¹⁵ Enta wozanaa medhiday iya; enti oothiyaba ubbaa I erees.

¹⁶ Kawoy ba wotaadare darotethan attenna; olanchoy ba wolqaa minotethan kessi ekenna.

¹⁷ Paran xoonana gidi naagoy hada; I ba minotethan ashshanaw danda7enna.

¹⁸ Godaa ayfeti iyaw yayyanne iya maarotan ufaysi oothiya asaa be7oosona.

¹⁹ Hessika enta hayqope ashshanaasanne kosha wode enta naaganaassa.

²⁰ Nuuni Godaa ufaysan naagoos; nuna maaddeynne nu gondalley iya.

²¹ Iya geeshsha sunthan nuuni ammanetiya gisho, nu wozanay iyan ufaytees.

²² Godaw, nuuni nenan ufaysi oothidaysada, ne maarotay nu bolla gido.