Mazmure 32 - Geeshsha Maxaafa

Nagari Atto Geetetida Asi Anjetidaysa

Akeekan xaafetida ginxo

¹ Iya nagaray atto geetetidaynne iya nagaray kametida uray anjetidaysa.

² Goday iya iitatethaa taybonna asi, iya qofan cimoy bayna asi anjetidaysa.

³ Taani ta nagaraa paaxonna aggada, kumetha gallas oolidaysi, ta asatethaa daabursis.

⁴ Gallasinne qamma ne kushey tana deexis; haathi dhayin bone awan melidibada, ta wolqay wuris. Salaha

⁵ Taani ta nagaraa new paaxas; ta naaquwa neepe genthabike. “Ta nagaraa Godaas paaxana” yaagas; tana deexida nagaraa atto gadasa. Salaha

⁶ Hessa gisho, xillo asi oonika, ne bentiya wode nena woosso; iita di7oy yaa wode he uraa gakenna.

⁷ Ne taw qosetiya bessi; ne tana metope naagasa. Atotetha yethi yexiya asaa ta yuushuwan wothadasa. Salaha

⁸ Xoossay, “Ta nena tamaarsana; ne baana ogiya bessaana; ta nena zorananne naagana” yaagees.

⁹ Bixaalaninne puulon oyketonna; kiitetonna wozani bayna baquloda woyko parada hanopite.

¹⁰ Iitatas waayey darana; shin Godan ammaneteyisata siiqoy kammana.

¹¹ Hinteno, xilloto, Godan ufaytitenne hashshu giite; hinteno, wozana suureto, ililite.