Mazmure 26 - Geeshsha Maxaafa

Xillo Asa Woosa

Dawita Mazmure

¹ Abeeti Godaw, ta suuretethan hemetida gishonne sidhey bayna nenan ammanetida gisho, taw pirda.

² Abeeti Godaw, tana paaca; tana pilgada be7a; ta wozanaa xomoosa.

³ Ne siiqoy ta sinthan de7iya gisho, ta ubba wode ne tuma ogiyan hemetayis.

⁴ Cimmiya asaara ta uttike; cubbota maabaran gelike.

⁵ Iitata duulata ta ixayis; makallachotara issife uttike.

⁶ Abeeti Godaw, ta xillotethaa bessanaw ta kushiya meeccayis; ne yarsho bessa yuuyayis.

⁷ Galata mazmure yexashe ne malaalsiya ooso ubba odana.

⁸ Abeeti Godaw, ne keethaanne, ne bonchoy aqiya bessaa ta dosayis.

⁹ Tana nagaranchotara issife pittofa; asa suuthu gusseysatara ta shempuwa dhaysofa.

¹⁰ Enta kushen iita halchoy de7ees; enta ushacha kushen wodhaafey kumis.

¹¹ Shin ta suuretethan hemetana; tana woza; taw qadheta.

¹² Ta tohoy demba bessan eqis; gita shiiquwan Godaa galatana.